Jeremia 51:44 - O Debleskro Drom 2021 (Sinte)

⁴⁴ O baro Dewel penell: Awa, me dom o chocheno debles Bel an o them Babilonia peskri phagi, un tserdom dran leskro mui kowa, hoi job pre chas. I menshe dran wawar themma nashenn leske buder gar palla. I massurja o forestar Babilon peran khetne.

O Debleskro Lab 2024 (Sinte-Manouche)

⁴⁴ O baro Devel penell: Ava, me dom o rhorheno debles Bel an o them Babilonia peskri phagi, oun tserdom dran leskro mouy kova, hoy yob pre rhas. I menshe dran vavar themma nashenn leske bouder gar palla. I massurya o forestar Babilon peran khetne.

Jeremia 51:44 ပူးပေါင်းရင်းမြစ်များ

2. Familjakro liil 36:7

Ninna ko kutch kowestar dran o baro Debleskro kheer mukas o Nebukadnezar an o foro Babilon te anell, un tchiwas kowa kote an peskro debleskro kheer.

Hiob 20:15

Leskro randedo koowa hi har i chapen, hoi hunte tchadell lo pale win. O Dewel lell ko randedo koowa lestar krik.

Jesaja 2:2

Well i tsiro, koi hi koi berga, kai o baro Debleskro kheer tardo hi, bareder har i tsele wawar berge, un dikell tele ap i tsele tikne berge. Un i menshe dran bud themma nashenn pash kai berga,

Jesaja 21:9

Kanna dikom i murshes ap i wurdin dui grajentsa. Un ko mursh das gole: O foro Babilon peras, peras. Un i tsele chochene debla hi paash dino ap i phub.

Jesaja 60:5

Palle dikeh tu kowa, un bari bachtjatar chatchell tiro mui har i momeli, un tiro dji trissella un djal dur pre. Bud brawlepen dran wawar themma well anlo pash tute, fun wergel o baro pani well lo pash tute.

Jeremia 50:15

Denn i kurepaskri gole haki rigjatar! Dikenn, o foro dell pre! Leskre turme phagenn khetne. Leskre massurja hi tele phagedo. O baro Dewel dell o foro Babilon peskri phagi. Denn o foreske halauter pale pale, hoi kau foro ninna kras!

Jeremia 50:2

Denn win gole an i wawar themma! Halauter hunte shunenn! Hadenn tumari themeskri plachta pre! Hakeno te shunell kowa! Rikrenn les gar pale! Penenn: O foro Babilon hi dren lino, Lengro dewel Bel nai kras tchi, lengro dewel Marduk hi khetne phagedo; lengre mule debla nai kran tchi, lengre figure hi pash kerdo!

Jeremia 51:18

Jon molenn tchi, un hi sapaske. An ko tsiro, kai rakrell o baro Dewel o tchatchepen win, hunte djan jon tele.

Jeremia 51:34

O foro Jerusalem penell: O Nebukadnezar, ko baro rai dran o them Babilonia, chas man pre un maras man. Har i baro panjeskro sap chas lo man, un kras peskro per pesso miro brawlepah. Palle witsras lo man krik har i khoro, kai tchi dren hi. “Mu well pral o foro Babilon ko tchilatchepen, hoi was menge ninna kerdo”, penenn i menshe ap i berga Zion. “I Babilonarja mukan maro rat te nashell. Kanna mu nashell lengro rat!”

Jeremia 51:47

Dikenn, ko tsiro wella, kai krau me kol mule deblen an Babilonia paash. O them Babilonia djal tele an ladj. Un kolla, kai wan maredo, atchenn kote ap i phub tchiddo.

Jeremia 51:53

Ninna te stakrals o foro Babilon pral an o bolepen, un te krans le pengre massurja jaake baro, te nai stakrals kek pral wergel, bitchrau me marepangre, kai wenn pral lende. Kowa penell o baro Dewel.

Jeremia 51:58

Kawa penell o baro Dewel, ko rai pral o bolepen un i phub: I massurja ko baro forestar Babilon wenn tele phagedo bis ap i phub, un o foreskre bare wudja wenn chatchedo. Palle hi koi budi tchitcheske kerdo, hoi menshe dran wawar themma kran. Koleske jon pen tele maran, kowa chatchrell pre.

Daniel 1:2

Un o baro Dewel, maro rai, das o Jojakimes, ko baro rajes pral o them Juda, an o wast o baro rajestar dran o them Babilonia. Ninna ko shukar koowa, hoi an o Debleskro kheer his, kolestar peras an leskre wasta. Un job anas kowa an o them Shinar, an o kheer leskro deblestar. Un tchiwas les pash ko brawlepen leskro deblestar pashel.

Daniel 3:29

Un jaake penau me kanna: Koon i tsele menshendar dran hako them un rakepen rakrell djungeles pral ko Debleste, koles o Shadrach un o Meshach un o Abed-Nego an-mangenn, kowa well an kotja dino. Un koleskro kheer well pash dino. Hi kek wawar dewel, kai nai lell jekes jaake dran o merepen win har job.”

Daniel 4:1

Me, o Nebukadnezar homs bachtelo an miro kheer, un man his lauter, hoi kamom.

Daniel 4:22

Tu weh pale-tchiddo un hunte djiwess pash i viechende un buder gar mank i menshende. Jon denn tut khass te chal har i grumjen. Un tu tchiweh tut win tele. Un o brishin perell ap tute tele un krell tut sapenes. Un efta bersha djan jaake trujel, bis te tu haiweh, te hi o pralstuno Debles i tsele rajengre themma an peskro wast, un job dell kol themma koleste job kamell.

Daniel 5:19

Doleske daran un trissan i menshe dran hako them un rakepen lestar. Un job maras, jaake har job kamas, un mukas koles te djiwell, kones job kamas, te atchell lo djido. Job hadas menshen un kras wawaren tikno, jaake har leske shukar his.

Daniel 5:26

Un kawa hi, hoi i laba kharenna: ‘mene’ kharell ‘khetne ginlo’. O Dewel ginas i diwessa khetne, kai hal rai; un ko tsiro hi trujel.