Jeremia 51:12 - O Debleskro Drom 2021 (Sinte)

¹² Hadenn o kurepaskri plachta pre, te sikrenn, kai djan tumer an o kurepen o foreha Babilon. Tchiwenn bud kurepangren trul o foro! Tchiwenn ninna kol lurden kote koi, kai garda denn! Tchiwenn ninna lurden khatemen pal o foro, te nai perenn le i Babilonarjen an o dumo. O baro Dewel krell, hoi job pes glan las, un hoi lo pral i menshende an o foro Babilon rakras.

O Debleskro Lab 2024 (Sinte-Manouche)

¹² Hadenn o kourepaskri plarhta pre, te sikrenn, kay djan t'mer an o kourepen o foreha Babilon. Čivenn boud kourepangren troul o foro! Čivenn ninna kol lourden kote koy, kay garda denn! Čivenn ninna lourden khatemen pal o foro, te nay perenn le i Babilonaryen an o doumo. O baro Devel krell, hoy yob pes glan las, oun hoy lo pral i menshende an o foro Babilon rakras.

Jeremia 51:12 ပူးပေါင်းရင်းမြစ်များ

Gosewe laba 21:30

Kote dell kek goswepen, tchi hoi jek feteder nai djinals un penals, har nai krell o baro Dewel.

Jesaja 11:12

Un job tchiwell i sikepen pre, te sikrell lo kol menshen an i wawar themma, te anell lo kolen khetne, kai dran Israel un Juda win tradedo his. Kolen anell lo pale dran hake rigja i phubjatar.

Jesaja 13:2

Ap i bari nangi berga tchiwenn i sikepen pre! Denn soreles i lurden khetne gole! Sikrenn len i wastentsa, te djan le dren an o foreskre wudja, kai i raja djiwenn.

Jeremia 23:20

O baro Debleskri choli mukell gar tele, bis te kras lo, hoi les glan his. I tsiro well, kai haiwenn tumer kowa.

Jeremia 4:28

I phub rowella, un o bolepen riwell pes an kalepen. Me, o baro Dewel penom, hoi kamau te krell, un kowa khaitell man gar, un mukau gar kolestar tele.

Jeremia 50:2

Denn win gole an i wawar themma! Halauter hunte shunenn! Hadenn tumari themeskri plachta pre! Hakeno te shunell kowa! Rikrenn les gar pale! Penenn: O foro Babilon hi dren lino, Lengro dewel Bel nai kras tchi, lengro dewel Marduk hi khetne phagedo; lengre mule debla nai kran tchi, lengre figure hi pash kerdo!

Jeremia 50:25

O baro Dewel kras peskro kurepaskro kheer pre, un las o marepaskre koola win, kolentsa job an peskri choli ap o them Babilonia pre djal. Job, o baro Dewel, ko rai pral o bolepen un i phub, les hi kote bud te krell.

Jeremia 51:11

I Babilonarja kran o baro Debleskro kheer paash. Doleske las pes o baro Dewel glan, te phagell lo o foro Babilon tele. Job das i rajende dran o them Media bud soor an lende, te djan le ap o foro Babilon pre. Tchinenn tumare faile! Lenn tumare sasterne betcheskre patria an o wast!

Jeremia 51:27

Hadenn o kurepaskri plachta pre ap i phub! Phurdenn an i phurdepaskri an i tsele themma! Denn i rajen pral i wawar themma gole, te djan le an o kurepen o foreha Babilon! Penenn i bare rajenge pral i themma Ararat, Minni un Ashkenas, te bitchrenn le lurden, te kurenn le pen i menshentsa an Babilon! Rodenn lurdengre pralstunen win! Anenn jaake bud graja khetne har stepangre!

Jeremia 51:29

I phub trissella un darella! Kowa, hoi o baro Dewel pes glan las, well jaake: O foro Babilon un o tselo them Babilonia well i mulo them, kai buder kek nai djiwella.

Ropaskre gilja 2:17

O baro Dewel kras, hoi lo peske glan las. Un kras kowa, har lo menge glan i rah tsiro trad das. Les khaital tu gar, har mukas lo tut khetne te dell, un kolen, kai ap tute djan, i sorleder te well. Har tu peral, nai san le.

Joel 3:2

An ko tsiro tchorau miro ducho ninna win pral i budepangre, mursha har djuwja.

Nahum 2:1

Tumer menshe an Juda, dikenn: Pral i berge well i mursh, kai anell i latcho lab. Job penell: O kurepaskro tsiro hi trujel! Rikrenn pale tumare bare diwessa un awenn bachtelo koi dren! Denn o Debleske kowa, koleske tumen sowel dan. Ko tchilatcho, kai halauter paash das, well buder gar an tumaro them. Job hi buder gar koi.

Josua 8:14

Un har kowa o baro rai pral o foro Ai dikas, djas lo peskre tsele lurdentsa sik win dran o foro, te kurenn le pen i Israelentsa kote, kai tapran le len o wawar kopo, ap ko drom pash o pani Jordan. Job djinas gar, te his ninna Israelitarja khatemen ap i wawar rig o forestar.