Jeremia 50:26 - O Debleskro Drom 2021 (Sinte)

²⁶ Awenn pral kau them haki rigjatar, krenn leskre djobenge khera pre, witsrenn halauter khetne ap i phub, un chatchrenn les pre, te atchell tchi pral!

O Debleskro Lab 2024 (Sinte-Manouche)

²⁶ Avenn pral kava them haki rigyatar, krenn leskre djobenge khera pre, vitsrenn halauter khetne ap i phoub, oun rhačrenn les pre, te ačell či pral!

Jeremia 50:26 ပူးပေါင်းရင်းမြစ်များ

Jesaja 10:6

Me bitchrom len pash kol menshende, kai kamenn mandar tchi te djinell, un ap kolende chojedo hom, te djan le ap lende pre, un randenn len win un tchorenn len win, un stakrenn len khetne har i tchik ap o drom.

Jesaja 14:23

Me krau dran o foro i sapeni platsa, kai i stachelengre djiwenn. Un khossau o tselo foro krik, har jek i besa lell un o kheer win khossell. Kowa penau me, o baro Dewel, ko rai pral o bolepen un i phub.

Jesaja 25:10

O baro Dewel rikrell peskro wast pral kai berga. I menshen an o them Moab stakrell lo tel peskre herja khetne, jaake har phuss khetne stakedo well, hoi an i tchik tchiddo hi.

Jesaja 45:3

Me dau tut brawlepen, hoi khatedo his, un kutch koowa, hoi mishto tchakedo his. Te haiwess tu, te hom me o baro Dewel, ko Dewel pral o Israel, un dom tut gole pash tiro lab.

Jesaja 5:26

Un job bitchrell i sikepen i menshenge an i them, hoi dur krik hi. Un job sholell, te wenn le dran o palstuno i phubjatar. Dik, kote wenn le – jaake sik har djala!

Jeremia 50:10

Jon tchorenn o tselo them Babilonia win. Halauter kai kote randenna, wenn tchalo. Kowa penell o baro Dewel.

Jeremia 50:13

Miri choli well jaake pral o foro Babilon, te djiwell nai kote kek mensho buder. Tchi har barra atchell lestar pral. Hakeneske, kai dikell kowa, atchell o rakepen krik. Job trissell peskro shero pral i tseli bibacht hoi kau foro tapras.

Jeremia 50:15

Denn i kurepaskri gole haki rigjatar! Dikenn, o foro dell pre! Leskre turme phagenn khetne. Leskre massurja hi tele phagedo. O baro Dewel dell o foro Babilon peskri phagi. Denn o foreske halauter pale pale, hoi kau foro ninna kras!

Jeremia 50:23

Babilonia, tu hal har i depaskro saster, kai das wawar themma an kotja. Kanna weh tu ninna tele phagedo un an kotja dino. I menshenge an i wawar themma atchell o rakepen krik, te dikenn le tut.

Jeremia 50:41

Denn garda: Bud menshe wenna dran lengro them, hoi kote tchiddo hi, kai norden hi. Awa, bud menshe pengre bare rajentsa krenn pen ap o drom dran ko dur them, te djan le an o kurepen.

Jeremia 51:44

O baro Dewel penell: Awa, me dom o chocheno debles Bel an o them Babilonia peskri phagi, un tserdom dran leskro mui kowa, hoi job pre chas. I menshe dran wawar themma nashenn leske buder gar palla. I massurja o forestar Babilon peran khetne.

Jeremia 51:64

un pen: “Jaake hunte djal o foro Babilon tele, un well buder gar pre dran koi bari bibacht, hoi o baro Dewel pral kau foro anell.” Palle hi ko foro buder gar koi. Kalla his o Jeremijeskre laba.

Micha 7:10

Kolla, kai rikrenn man tele un putchenn mandar ‘kai hi tiro baro Dewel’, jon hunte dikenn kowa, un hunte ladjenn. Un mire jaka dikenn, har le khetne stakedo wenna, har tchik ap i drom.

Mateo 6:26

Dikenn ap i tchirkle! Jon witsrenn kek djob an i phub, te well lo baro. Witar gar anenn le o baro djob dren, te tchiwenn le les an o djobeskro kheer. Tumaro dad an o bolepen dell len te chal. Tumer han budeder moldo har jon.

Debleskro tsiro 14:19

Un ko bolepaskro witsras peskri tchuri pral i phub, un tchinas i drake tele, un witsras len an i bari piri, kai wenn i drake stakedo. Koi bari piri hi o Debleskri choli.

Debleskro tsiro 19:15

Un dran leskro mui well i charo win, hoi latches tchinella. Koleha kurell lo pes i menshentsa an i tsele themma, un well sorleder har jon. Job anell len i sasterno wasteha. Jaake har jek i drake paash stakrella, te well i mool win, jaake stakrell lo kolen paash, kai gar ap leste shunenna, un anell i choli o sorelo Deblestar ap lende.