Jeremia 5:9 - O Debleskro Drom 2021 (Sinte)

⁹ Un me hunte dap len kek phagi? penell o baro Dewel, un dap hawe menshen har kalla gar pale, hoi jon kran?

O Debleskro Lab 2024 (Sinte-Manouche)

⁹ Oun me hounte dap len kek phagi? penell o baro Devel, oun dap have menshen har kalla gar pale, hoy yon kran?

Jeremia 5:9 ပူးပေါင်းရင်းမြစ်များ

Gosewe laba 6:29

Jaake djal koleske, kai pash i romjate i wawarestar djal. Hakeno, kai lat an-taprell, lell peskri phagi.

Jesaja 1:24

Doleske penell o baro Dewel, ko rai pral o bolepen un i phub, kai hi o Israeleskro sorelo Dewel: Dikenn tumen glan! Me dau tumen pale, hoi ap mande kran, tumen, kai kamenn man gar. Miri bari choli well pral tumende, kai krenn lauter wawartchandes, har me kamau.

Jesaja 57:6

Un ap kol latche platse an i tala tchorenn tumer lenge chapen un pipen win. Doleske well ko diwes, kai wenn kote maredo tchiddo! Patsenn tchatchepah, te dau jekes, kai sawo koowa krell, kowa gar pale?

Jeremia 23:2

Doleske penell o baro Dewel, ko Dewel pral o Israel, ap i pralstunende, kai hunte dans garda ap leskre menshende: Tumer rikran mire menshen gar khetne. Jon hi har bakre, kai wan kate te kote tradedo. Tumer dan gar garda ap lende. Kanna dau me garda, te lenn tumer tumari phagi ko tchilatchepaske, hoi kran.

Jeremia 32:31

Bari choli chatchas an mande pral kau foro jaake rah har lo tardo hi. Doleske hunte tchiwap les glan mande krik, te dikap les buder gar.

Jeremia 44:22

un job nai dikas buder gar, har djan ap tumaro tchilatcho drom un kran sawo djungelo koowa! Doleske was tumaro them i mulo them. I menshe, kai shunenn kolestar, denn i wasta pral o shero khetne. Un te kamenn le jekes te praassell, penenn le: Mu djal tuke har o themeske Juda! Kek mensho djiwell buder koi. Jaake hi kowa kau diwes!

Jeremia 5:10

Nashenn pre, kai lengre drakengre ruka tardo hi, un krenn len paash! Ma tserdenn i tsele burra win! Mukenn tchomone tardo! Tserdenn i kashta i drakentsa win, kolla hi gar mange.

Jeremia 5:29

Mukap me len kowa te krell un penap tchi koi pre, penell o baro Dewel. Dap me sawe menshen kek phagi?

Jeremia 6:11

Tiri choli pral lende chatchell ninna an mande. Me nai rikrau lat gar pale. Koi penas o baro Dewel ap mande: Palle tchore miri choli pral lende win: pral kol tchawende ap o drom, un pral kol terne murshende. Jon lauter, mursha un djuwja, ninna kol phure un an-dikle, wenn pandles krik anlo.

Jeremia 6:6

Kawa penell o baro Dewel, o rai pral o bolepen un i phub: Denn i ruka tele an o foro Jerusalem, un krenn i drom, hoi djal pre ap o foreskri massuri o forestar Jerusalem! An kau foro hi tchi har tchilatchepen dren. Doleske lell lo peskri phagi.

Jeremia 9:8

Dap me sawe menshen kek phagi, penell o baro Dewel. Mukap me kal menshen jaake te djal, un krap lenge tchi?

Jeremia 9:9

Me kamau pral kau them an i berge rowell, un pral ko senelo pralstuno them i ropaskri gili te giwell. Lauter hi pre-chatchedo. Kek mensho djal koi trujel. Kek grumja un bakre denn kote gole. Ninna kol tchirkle un i diwje vieche nashan penge, un mukenn pen buder gar te dikell.

Ropaskre gilja 3:42

Mer anam doosh pral mende kokres, un shunam gar ap tute. Kowa bistral tu menge gar.

Ropaskre gilja 4:22

Tumer an o foro Zion, palle hi tumari doosh tumendar krik lino! O baro Dewel mukell tumen buder gar pandles krik te anell. Palle anell job tumari doosh, tumer Edomarja, ap tumare sherja pale, un tchakrell ko tchilatcho koowa pre, hoi kran.

Ezekiel 7:9

Me dikau buder gar latches ap tumende. Man khaitenn tumer gar. Ko djungelo koowa, hoi kran, well ap tumare sherja pale. Un tumer lenn tumari phagi. Un tumer dikenn un haiwenn palle, te hom me o baro Dewel, kowa kai tumen dell.

Hosea 2:13

Me krau, te wenn i Israelitarja buder gar bachteles khetne ap kol bare diwessa. Ap kek Debleskro diwes, ap kek diwes, kai well o newo tchon diklo, un ap kek wawar baro diwes wenn le buder khetne.

Hosea 8:13

Jon anenn mange viechen, un chan pen tchalo ap ko mass. Me, o baro Dewel, dikau gar latches koi pre. Lengri doosh bistrau me gar, un lengro tchilatchepen well pral lende: Jon hunte djan pale an o them Egiptia pale.

3. Mose 18:25

O tselo them was koleha pale-tchiddo kerdo. Me anau lengri doosh ap lende pale, un krau, te wenn kol menshe win tradedo dran ko them, kai le djiwenn.

3. Mose 26:25

Me mukau kurepen an tumaro them win te phagell, un dau tumen pale, te rikran gar dren, hoi mantsa win kran. Un te khatrenn tumer tumen palle an tumare forja, palle bitchrau i pharo nasslepen mashkral tumende, un dau tumen an i wasta kolendar, kai kurenn pen tumentsa.

Nahum 1:2

O baro Dewel hi i Dewel, kai kamell, te mangenn i menshe kek wawar debles an har les kokres. Leskri choli well pral kolende, kai hadenn pen pral leste. Kolen, kai kamenn lestar tchi te djinell, dell job i phagi. Un bistrell gar, hoi jon ap leste kran.

5. Mose 32:35

Job penell: Me hom kowa, kai dau len halauter ap lengro shero pale an ko tsiro, kai trissenn lengre herja. Gar dur hi o diwes, kai well lengri bibacht pral lende. Un kowa, hoi ap lende well, kowa well sikepah.

5. Mose 32:43

Tumer menshe dran i wawar themma, sharenn o baro Debleskre menshen! Kolla, kai maran leskre budepangre, kolenge dell job halauter pale ap lengre sherja. Un job dell kolen halauter pale, kai kuran pen leha. Un lell krik o praassepen, hoi ap o them peskre menshendar hi.