Jeremia 5:6 - O Debleskro Drom 2021 (Sinte)

⁶ Doleske wenna lewe dran o weesh un marenn len; diwje djukle dran o diwjo un truk them dandrenn len an kotja, un bare diwje margodje lurenn glan lengre forja. Hakeno, koon win wella, wella an kotja dandedo. Lengri doosh hi bud un phari. Bud kope djan le mandar krik.

O Debleskro Lab 2024 (Sinte-Manouche)

⁶ Doleske venna leve dran o veesh oun marenn len; divye djoukle dran o divyo oun trouk them dandrenn len an kotya, oun bare divye margodje lourenn glan lengre forya. Hakeno, koon vin vella, vella an kotya dandedo. Lengri doosh hi boud oun phari. Boud kope djan le mandar krik.

Jeremia 5:6 ပူးပေါင်းရင်းမြစ်များ

2. Familjakro liil 36:14

Ninna i tsele pralstune an o them Juda un i rashaja un i menshe an o them kran pengri doosh gomme bareder pengro djipah: Jon djiwan pal ko djungelo koowa, hoi i menshe an i wawar themma kran, un kran o baro Debleskro kheer pale-tchiddo, ko kheer, hoi job wi-rodas, te djiwell lo kote an o foro Jerusalem.

Esra 10:10

Un o Esra, ko rashai, stas pre un rakras lentsa un penas: “Tumer peran o Deblestar tele, kai lan tumenge romjen kol menshendar, kai gar tumendar hi, un jaake anan tumer budeder doosh ap Israel.

Esra 9:6

un penom: “Miro Dewel, me ladjau un trashau man, te hadap mire jaka pral pash tute, miro Dewel; mari doosh was pral maro shero, un maro tchilatchepen hi baro bis pral an o bolepen.

Hiob 10:16

Te hadau miro shero pre, palle leh tu man palla, har te wals i lewo, un sikreh tiri bari soor, te dukress man.

Debleskri gili 104:20

Tu peneh, te well rati, un koi wenn i tsele weshengre vieche win.

Debleskri gili 80:13

Hoske phagal tu kol barra tele, hoi trul leste pre-tchiddo wan? Kanna nai lell hakeno peske drake lestar tele, kai kote djal.

Jesaja 1:23

Tire pralstune hadan pen pral mande un djan khetne i tchorepangre. Un hakeno lendar mukell pes te ginell. Un kol tchawe, kolen kek dai un kek dad hi, kolenge krenn le kek tchatchepen win. Un ko koowa kol djuwjendar, kolengro rom meras, mukenn le gar glan pende te well.

Jesaja 59:12

Baro Dewel, bud kope peram tutar tele. Mari doosh, hoi mer ap mende lam, sikrell har tchilatcho ham. Ko tchilatchepen, hoi kram, hi glan mare jaka, un mer djinah, hawo djunglepen ap tute kram:

Jeremia 14:7

Baro Dewel, mari doosh hi glan mare jaka tardo. Bud kope djam tutar krik, un shunam gar ap tute. Ab pale ap mari rig, te dikell hakeno, har kamlo hal!

Jeremia 2:15

O lewo dell gole pral leste, dell sorelo gole un krell leskro them paash. Un leskre forja wenn pre chatchedo jaake, kai nai djiwenn kek koi dren.

Jeremia 2:17

Kowa lauter hi tiri doosh! Bud kope kamas o baro Dewel, tiro rai, tut ap o tchatcho drom te anell. Un tu mukal les!

Jeremia 2:19

Dran tiro tchilatchepen well kowa ap tute. Tu shunal gar. Doleske leh tu sawi phagi. Tu hunte djiness un haiwess, hawo pharo koowa un duka ap koleste wenna, kai djal peskro baro Deblestar krik, un kamell lestar buder tchi te djinell. Kowa penell o baro Dewel, ko rai pral o bolepen un i phub.

Jeremia 2:31

O baro Dewel penell: Tumer tchilatche menshe! Denn garda ap kowa, hoi me tumenge penau! Hom me i Israelenge i mulo them, i them, kai kek pani hi? Hoske penenn mire menshe: ‘Mer nai djah, kai kamah, un hunte nashas tuke gar buder gar pal.’

Jeremia 25:38

Job djas win, har i terno lewo win well dran peskro khatepen, te marell lo. Un lengro them atchas khetne stakedo tchiddo. Jaake baro his o kurepen, un o baro Debleskri choli pral lende.

Jeremia 30:14

Tire tsele pirne bistran tut, putchenn buder gar pal tute. Me dom tut dawa, har jekes, koles kamom te marell. Krom miro dji tuke pandlo, har dom tut dawa tiri bari doshake un ko bud tchilatcho koowa, hoi kral.

Jeremia 30:15

Hoske deh tu gole pral tiro phagepen? Kowa, hoi tuke duka krell, nai krell kek sasto. Tiri doosh hi baro, un tiro tchilatcho koowa hi bud. Doleske dom tut kai phagi.

Jeremia 30:24

O baro Debleskri choli mukell gar tele, bis te kras lo, hoi les glan hi. I tsiro well, kai haiwenn tumer kowa.

Jeremia 4:7

I marepaskro, hoi marell i menshen an bud themma, stas pre. Har i lewo, hoi well dran o weesh, kras lo pes ap o drom, te dell job tumaro them paash un chatchrell tumare forja jaake, kai nai djiwell kek koi dren.

Jeremia 49:19

Har i lewo win well dran i burra pash o pani Jordan, wau me, un tradau i Edomarjen sik dran lengro them, un tchiwau koles pral o them, kones me win rodom. Kek hi har me! Kek hunte penell mange, hoi te krap! un kek rai hi sorleder har me!

Jeremia 8:5

Hoske nashrenn pen kal menshe an o foro Jerusalem pale te pale, un rissrenn gar trujel? Jon atchenn pash kol chochene deblende, un kamenn gar palpale pash mande te well.

Jeremia 8:7

O storcho tel o bolepen djinell peskro tsiro, un kol wawar tchirkle rikrenn o tsiro dren, kai wenn le pale.

Ropaskre gilja 1:5

Kolla, kai kamenn o foreske tchilatchepen te krell, len hi kanna penepaske pral leste, un lenge djal mishto. O baro Dewel anas koi bibacht pral o foro te dell lo les i phagi leskri bud doshake. Un kolla, kai lan o foro dren, lan i tchawen pandles, un tradan len glan pende win dran o them.

Ezekiel 16:25

Un kote kai i dromma khetne wenn, kral mangepaskre platse un kral te was tiro shukapen tchadepaske. Un sowal hakeneha, kai was tuke ap o drom. Un tiro lubjengro koowa was budeder un budeder.

Ezekiel 22:27

Tire pralstune hi har diwje djukle, kai marenn, un hi boklo pal rat. Jon marenn menshen, te lenn le lengro koowa penge.

Ezekiel 23:19

Un joi kras kowa gomme djungleder, un lake was ko tsiro an o shero, har li terni his, un an o them Egiptia i lubni was.

Daniel 7:4

O ersto his har i lewo, un les his tchirklengre mussja har i adlari. Un me dikom, har i bare tchirklengre mussja lestar krik lino wan. Un ko viecho was pre hadedo i phubjatar, un pre-tchiddo ap peskre pire har i mensho. Un les was o dji i menshestar dino.

Daniel 7:6

Un pal kowa dikom i wawar vieches, hoi win dikas har i bari margodja. Koles his star tchirklengre mussja ap peskro dumo. Un ko vieches his star sherja un les was bari soor dino pral i menshende.

Hosea 5:14

Me hom o themeske Efrajim har i lewo, un o khereske Juda har i terno lewo. Me dandrau len an kotja, un djau mange. Me hidjrau len krik, un kek nai lell len dran miro wast win.

Habakuk 1:8

Lengre graja hi sikeder har i bare diwje margodje. Un jon dandrenn sikeder har i diwje djukle an i rati. Lengre bud lurde wenna dran i dur them, un klissenna jaake sik har i adlari tele djal, te taprell lo i vieches.

Zefanja 3:3

Lengre pralstune hi har lewe, kai denn i bari gole. Lengre tchatchepangre mursha hi har diwje djukle an i rati, kai chan lauter, hoi maran le, un mukenn tchi pral o wawar diweske.

4. Mose 32:14

Un kanna krenn tumer ko emligo koowa! Tumer han tchatche tchawe tumare dadendar! Mursha, kai o Debleskro drom tele djan un krenn, te well o baro Debleskri choli pral Israel bareder.

Debleskro tsiro 13:2

Un ko viecho, hoi me dikom, his har i bari diwji margodja. Leskre herja his baro un sorelo. Un an leskro mui his bare danda. Un ko baro lolo sap das les peskri soor un peskro beshepaskro, te was ko viecho i baro rai, koles bud penepaske hi.