Jeremia 5:17 - O Debleskro Drom 2021 (Sinte)

¹⁷ Jon chan tiro djob un tiro maro, tire tchawen, tire tchen, tire bakren un grumjen, tire drake, tire faigetikre ruka. Tumer patsenn, te djal tumenge tchi an tumare sorele forja. Kolen lenn jon tumendar o chareha krik.

O Debleskro Lab 2024 (Sinte-Manouche)

¹⁷ Yon rhan tiro djob oun tiro maro, tire čaven, tire čen, tire bakren oun groumyen, tire drake, tire faygetikre rouka. T'mer patsenn, te djal t'menge či an t'mare zorele forya. Kolen lenn yon t'mendar o rhareha krik.

Jeremia 5:17 ပူးပေါင်းရင်းမြစ်များ

Jesaja 62:8

O baro Dewel das pes sowel un das peskro tchatcho wast pre, un hadas peskri soreli mussi, un penas, te dell kek tsiro buder, kai mukell lo kolen tiro djob te chal, kai kurenn pen tuha, un witar gar i menshen dran wawar themma tiri mool te pijell, kolake tu jaake phares budral.

Jesaja 62:9

Awa, kolla, kai o djob dren anan, kolla chan les ninna un sharenn o baro Debles. Un kolla, kai i drake dren anan, kolla pijenn ninna i mool lendar ap i platse glan miro kheer.

Jesaja 65:22

Jon tchiwenn kek kheer pre tardo, un i wawar djiwell palle dren. Un jon tchiwenn tchi an i phub, un i wawar chal les palle. Jaake phuro i ruk well, jaake phuro wenn ninna mire menshe. Un mire wi-rodede menshe wenn i rah tsiro bachteles pral kowa, hoi lengre wasta kran.

Jeremia 1:15

Shun mishto: Me dau gole i tsele menshen an kol themma, hoi an o norden tchiddo hi, te wenn jon, penell o baro Dewel. Lengre raja tchiwenn pengre beshepangre glan kol wudja o forestar Jerusalem, un trul leskre massurja un trul kol tsele forja an o them Juda.

Jeremia 25:37

Lengro them, hoi jaake shukar his, hi palle i mulo them. O baro Dewel an peskri choli kras les paash.

Jeremia 4:26

Me dikom pal ko latcho them. Kowa was i mulo them. Un i tsele forja his paash tchiddo glan o baro Debleste un leskri soreli choli.

Jeremia 4:7

I marepaskro, hoi marell i menshen an bud themma, stas pre. Har i lewo, hoi well dran o weesh, kras lo pes ap o drom, te dell job tumaro them paash un chatchrell tumare forja jaake, kai nai djiwell kek koi dren.

Jeremia 5:18

Me, o baro Dewel, kamau mire menshen gar lauteren te marell an ko tsiro.

Jeremia 50:17

O Israel his har i nashedo bakro, hoi lan i lewe palla. Ko ersto his o baro rai dran o them Assur, kowa chas les. Pal leste was o baro rai pral o them Babilonia, o Nebukadnezar. Kowa dandras ko mass tele, hoi ap leskre kokale atchas.

Jeremia 50:7

Halauter, kai len hatsan, chan len pre. Un kolla, kai his chojedo ap lende, penan: Mer krah tchi, hoi gar tchatcho hi! Jon anan doosh ap pende, har mukan le o baro Debles, kai das len lauter, hoi len hunte well djipaske, un ap koleste lengre phure patsan.

Jeremia 8:13

Te kamau pash mire menshende latchepen te hatsell, hom har i hacho, kai kamell drake un faige dren te lell, un kai hatsell kek drake un kek faige ap i ruka. Ninna kol patria peran tele, penell o baro Dewel. Doleske dom kal menshen pre. Wawar menshe lenn penge lengro them.

Jeremia 8:16

Kolla, kai kamenn te kurenn pen mentsa, hi pash o foro Dan tardo. Fun kotar shunah koi gole lengre grajendar. O tselo them trissell koi goljatar hoi i graja denn. Jon wenna un chan ko tselo them pre, lauter, hoi ap ko them hi, kol forja un lauter, hoi koi dren djiwella.

Ropaskre gilja 2:12

Ap pengre dajende penenn le ropah: “Man hi bok! Man hi trush!” un perenn khetne ap i dromma har dukede lurde, un merenn an i mussja pengre dajendar.

Ropaskre gilja 2:2

I gaba un i khera kras lo paash, an kolende o Jakobeskre tchawe djiwan. Un jon khaitan les gar. I sorele forja an o them Juda phagas lo tele an peskri choli. Pral lengro them anas lo ladj, un lengre raja witsras lo an i tchik.

Ezekiel 36:4

Doleske shunenn, tumer berge Israel, hoi o baro Dewel penell! Kawa penell o baro Dewel, maro rai, ap i bare un tikne berge, ap i panja un tale, ap i barra, hoi i tele-phagede kherendar pral atchan, un ap i mukle forja. I menshe dran i themma trul tumende, randan tumen win, un tumer wan lenge sapaske.

Hosea 2:12

Glan lakre pirnengre jaka riwau lat nanges win. Un kek nai lell lat dran miro wast win.

Hosea 8:14

I Israelitarja bistran koles, kai kras len. Jon krenn penge bare shukar khera. Un i menshe an o them Juda krenn penge sorele forja. Me, o baro Dewel, witsrau i jag an lengre forja, hoi lengre khera pre chatchrell.

Joel 2:3

Glan lende djal i jag un pal lende chatchell i phub. Glan ko tsiro, kai wenn le, hi o them har o Debleskri baar Eden, un te djan le pral wergel, atchell i diwjo paash them. Kek nai nashell lendar krik.

3. Mose 26:16

palle krau tumentsa jaake: Bari bibacht anau pral tumende, pharo nasslepen, hoi tumenge o djipen randell. Tumer chatchenn glan fibro, tumare jaka nai dikenn buder gar mishto, un kek soor atchell an tumende. Tchitcheske witsrenn djob win an i phub. Kolla, kai kurenn pen tumentsa, chan les pre.

Zefanja 3:6

O baro Dewel penell: Me krom, te hi tsele natsjone buder gar koi. Lengre forja hi paash. Lengre sorele khera hi tele phagedo, Kek menshe djiwenn buder koi. Ap i dromma djal buder kek mensho. Halauter hi krik.

Maleachi 1:4

Te penenn ninna leskre tchawe, kol Edomarja: ‘Ninna te wan mare forja paash dino, mer tchiwah len newes pre’, palle penau me, o baro Dewel, ko rai pral o bolepen un i phub: ‘Ninna te tchiwenn le kol forja pale pre, me dau halauter pale paash.’ Un wawar menshe penenn pral lende ‘tchilatcho them’ un ‘kalla hi menshe, pral kolende o baro Dewel pes choirella an hako tsiro’.

5. Mose 28:33

Lauter, hoi ap tiri hachetikri phub baro was, koleske tu phares budral, chan sawe menshe, kai wenn dran i dur them. Un tu weh sorjah tele rikedo, un hunte budress tel duka tiro tselo djipen.