Jeremia 44:10 - O Debleskro Drom 2021 (Sinte)

¹⁰ Bis ap kau diwes khaitas tumen tumari doosh gar. Tumer hadenn man gar, un djiwenn gar pal mire laba un pal miro tchatchepen, hoi me tumenge un tumare phurenge dom.

O Debleskro Lab 2024 (Sinte-Manouche)

¹⁰ Bis ap kava dives khaytas t'men t'mari doosh gar. T'mer hadenn man gar, oun djivenn gar pal mire laba oun pal miro čačepen, hoy me t'menge oun t'mare phourenge dom.

Jeremia 44:10 ပူးပေါင်းရင်းမြစ်များ

1. Rajengro liil 21:29

“Dikal tu kowa, har kras pes o Ahab tiknes glan mande? Doleske mukau koi bibacht gar te well, jaake rah har job djiwell. An ko tsiro, kai leskro tchawo o baro rai hi, anau me koi bibacht pral leskro kheer.”

2. Rajengro liil 22:19

Un kral tiro dji lenge pre. Un kral tut tiknes glan o baro Debleste, har tu shunal, hoi me penom pral kau foro un kol menshende, kai kate djiwenna, te djal lenge jaake djungeles, te atchell wawar menshenge o rakepen krik i trashatar. Un kowa, kai kamell te well i bibacht pral i wawareste, penella: ‘Tuke te djal, har djas o foreske Jerusalem!’ Har tu kowa shunal, kral tire koola paash, kai ap tute his, un rowal glan mande. Doleske shunom me tut ninna”, penell o baro Dewel.

2. Familjakro liil 32:26

Koi khaitas o Hiskijes, kai phurdas lo pes pre. Job un i menshe an Jerusalem dikan pengri doosh dren. Doleske was koi choli o baro Deblestar gar pral lende jaake rah, har o Hiskija djiwas.

2. Familjakro liil 33:12

Har lo an bari daar his, mangas lo o ropah o baro Debles, kai leskro Dewel un o Dewel leskre phurendar his, un penas leske, har bud les leskri doosh khaitas.

2. Familjakro liil 33:19

An o liil, hoi i dikepangre tchinan, hi tchinlo, har o Manasse o baro Debles mangas, un har kowa les shunas, ninna leskri tseli doosh, un har lo o baro Debles mukas, un kai lo mulne platse kras, un chochene deblen pre tchiwas, ninna koi figura, hoi i Ashera sikras, – kowa lauter, hoi lo kras, glan te dikas lo peskri doosh dren glan o baro Debleste.

2. Familjakro liil 34:27

Un kral tiro dji lenge pre. Un kral tut tiknes glan o baro Debleste, har tu shunal, hoi me penom pral kau foro un kol menshende, kai kate djiwenna, un kral tire koola paash, kai ap tute his, un rowal glan mande. Doleske shunom me tut ninna’, penell o baro Dewel.

Debleskri gili 34:18

Te denn kolla ap leste gole, kai rikrenn ap leste, palle shunell len o baro Dewel, un lell len win dran lengri tseli bibacht.

Debleskri gili 51:17

Baro Dewel, kre miro mui pre, te rakrap, hoi sharell tut!

Debleskri gili 78:10

Jon rikran pen gar ap o Debleskre laba, hoi job lentsa win kras, un kaman gar ap leskro drom te djal.

2. Mose 10:3

Kote djas o Mose un o Aron pash o Farao dren un penan ap leste: “Kawa penell o baro Dewel, o Dewel pral i Hebrearja: ‘Har rah kameh tu gar te dikell, kai hom sorleder har tu? Muk mire menshen te djal, te nai mangenn le man an!

2. Mose 9:17

Tu patseh, tu nai kreh mire menshentsa, hoi kameh, un mukeh len gar te djal.

2. Mose 9:30

Tu un tire pralstune, kowa haiwom, tumer darenna gomme gar o baro Deblestar.”

Gosewe laba 14:16

O gosewo darella un rikrell pes pale o tchilatchepastar. O dinelo well sik chojedo un patsell, te nai djal leske kek tchilatchepen.

Gosewe laba 16:6

Ab latches un rike pash o Debleste, un job bistrell tiri doosh. Te djiweh leha, rikreh tut pale o tchilatchepastar.

Gosewe laba 28:14

Bachtelo hi kowa, kai hako tsireske o Debleha djiwell! Kowa, kai mukell peskro dji har i bar te well, perell an i bibacht.

Gosewe laba 8:13

Kowa, kai kamell o baro Debleha te djiwell, kowa kamell o tchilatchepen gar glan peskre jaka te dikell, kowa dikell gar tele ap o wawareste un phurdell pes gar pre, kowa djal gar i tchilatcho drom, un rakrell kek chochepen.

Jesaja 42:24

Koon his kowa, kai mukas o Jakobes win te randell, un das o Israeles i tchorepangren an i wasta? His kowa gar o baro Dewel? Job hi, koleske o dumo sikram un leskro drom gar djam, un ap leskre laba gar shunam.

Jesaja 57:15

Me, o pralstuno, kai hadedo hom, un hako tsiro djiwau, un kokres o tchatcho Dewel hom, penau: Me djiwau an o pralstunepen an miro bolepaskro kheer, un ninna pash o mensheste, kai i phagedo un tele-rikedo dji an leste hi, te dap pale soor koleste, kai tele rikedo hi, un mukap koles pre te djiwell, koleskro dji phagedo hi.

Jesaja 66:2

Me, o baro Dewel, krom miro wasteha kowa lauter, hoi koi hi. Un me dikau kamles ap koleste, kai hi tele rikedo un phagedo an peskro dji, un kai darell glan miro lab.

Jeremia 10:7

Hakeno hunte trashell tutar un hunte hadell tut. Tu hal o baro rai pral i themma! Ap tute hunte shunenn le. Mashkral kol tsele gosewende un bare rajende ap kai phub hi kek jaake har tu hal.

Jeremia 26:4

Pen lenge: Kowa hi, hoi o baro Dewel penell: Me bitchrom tumenge mire rakepangre, kai mange budrenn, te penenn le tumenge, hoi te krenn. Bud kope bitchrom len pash tumende. Tumer dan gar jak ap kowa, hoi le penan. Te shunenn tumer gar ap mande un djan gar ap miro drom, hoi tumende sikrom, un denn gar jak ap i laba, hoi mire rakepangre tumenge penenn,

Jeremia 32:23

Un har jon an o them dren wan, un les penge lan, shunan jon gar ap tute, djan witar gar ap tiro drom. Un halauter, hoi tu lenge soreles penal, te krenn le les, kowa kran jon gar. Doleske mukal ninna kau tseli bibacht pral lende te well:

Jeremia 36:24

Kek kolendar, kai shunan kol laba, las traash un sikras, kai kol laba leske an o dji djan, gar o baro rai un witar gar kol pralstune pash leste.

Jeremia 44:23

Tumer chatchran sungepaskro koowa i bolepaskri rajetsake, un kran, hoi djungeles hi glan o baro Debleskre jaka, un shunan gar ap leste, un djiwan gar pal leskre laba un pal leskro tchatchepen, un kran gar, hoi job tumendar kamas. Doleske was sawi bibacht pral tumende, jaake har kau diwes hi.

Jeremia 5:3

Baro Dewel, tire jaka dikenn ap i djipen an o tchatchepen. Tu dal len i phagi. – Jon haiwenn kowa gar. Tu kral len paash mulo. – Un jon atchan, har jon hi. Jon djan pal pengro shero. un kamenn gar pengro tchilatcho drom te mukell.

Jeremia 6:15

Jon hunte ladjans pen ko djungelo koweha, hoi jon kran. Kowa krenn le gar. Jon ladjenn gar. Jon djinenn gar, hoi ladj hi. Doleske wenn jon maredo khetne kol wawarentsa. Te wau me, un dau len i phagi, atchell kek lendar djido, penell o baro Dewel.

Jeremia 8:12

Jon hunte ladjans koleske hoi jon kran, koweha man choiran. Kowa krenn le gar. Jon ladjenn gar. Hoi ladj hi, djinenn le gar. Doleske wenn jon maredo khetne kol wawarentsa. Te wau me, un dau len i phagi, hunte perenn le, penell o baro Dewel.

Ezekiel 9:4

un penas ap leste: An o foro Jerusalem hi gomme menshe, kolengro dji rowell un dell gole pral kau bud djungelo koowa, hoi kate kerdo well. Dja an o tselo foro trujel, un kre i sikepen glan ap kolengre sherja.

Mateo 27:54

Ko pralstuno lurdo un kol wawar, kai khetne leha ap o Jesuseste jak dan, kolla dikan, te was i phub trisslemen, un hoi lauter koi djas. Koi tapras len i bari daar. Un jon penan: “Kau mursh his tchatchepah o Debleskro tchawo.”

Louka 23:40

Ko wawar tchingras ap leste un penas: “Muk tele! Dareh tu gar o Deblestar, kanna kai hal ap o trushel?

Remarja 11:20

Kowa hi tchatcho. I bibolde patsan gar o Debles. Jaake hi le har kol kashta, hoi wan tele tchinlo. Tumer han har wawar kashta, hoi wan dren tchiddo ap ko rukeste kokres dran tumaro patsepen. Doleske ma krenn tumen bares! Denn jak!

1. Petro 5:6

Doleske krenn tumen tikno tel o Debleskro sorelo wast! O Debleskro tsiro wella, kai job tumen bares krella.

Debleskro tsiro 15:4

Tutar darella hakeno, tiro labestar penenn le: Har baro un shukar hi lo! Maro rai, o baro Dewel hal tu. Kek wawar hi jaake har tu. I raja wenna dran hake themma; glan tute witsrenn le pen tele, te sharenn le tut. Lauter dikan, har pal o tchatchepen tu djal, har tu i menshende lengri phagi dal.