Jeremia 39:5 - O Debleskro Drom 2021 (Sinte)

⁵ I lurde dran Babilonia lan len palla, un tapran o Zedekja an o telstuno them pash o foro Jericho, un pandan les un anan les pash o Nebukadnezar, ko baro rai dran o them Babilonia. Kowa his an o foro Ribla an o them Hamat. Job rakras pral leste i phagi win.

O Debleskro Lab 2024 (Sinte-Manouche)

⁵ I lourde dran Babilonia lan len palla, oun tapran o Sedekya an o telstouno them pash o foro Yericho, oun pandan les oun anan les pash o Neboukadnezar, ko baro ray dran o them Babilonia. Kova his an o foro Ribla an o them Hamat. Yob rakras pral leste i phagi vin.

Jeremia 39:5 ပူးပေါင်းရင်းမြစ်များ

2. Samuel 8:9

Ko rai pral o foro Hamat – leskro lab his Toi, – his an o kurepen o rajeha Hadad-Eser. Har o Toi kanna shunas, kai maras o David koleskre tsele lurden, bitchras lo peskro tchawes, o Joram, pash o baro rajeste David, un parkras pes pash leste un mukas les te penell, te well les bud bacht, un anas peha rupene koola un sonakangre koola un sawe dran lolo saster.

2. Rajengro liil 17:24

Har i Israelitarja dran o them Samaria krik anlo wan, mukas o baro rai pral o them Assur menshen dran wawar forja te well, te djiwenn le kote. Kolla wan dran i forja Babilon, Kuta, Awa, Hamat un Sefarwajim, un djiwan kanna an kol forja an o them Samaria. Un jaake lan le kau them dren.

2. Rajengro liil 23:33

O Farao Necho tchiwas les stildes an o foro Ribla an o them Hamat, te atchell lo buder gar baro rai an o foro Jerusalem. Un job tchiwas i sijaan ap o them: 70 (efta-deesh) zentnarja rup un 35 (trijanda te pantch) kilogramme sonakai.

2. Rajengro liil 25:6

I lurde dran o them Babilonia lan o baro rajes Zedekja un pandan les un anan les an o foro Ribla pash o baro rajeste pral o them Babilonia. Un jon rakran i phagi pral leste win.

2. Familjakro liil 33:11

Doleske mukas o baro Dewel i pralstunen pengre lurdentsa dran o them Assur pral lende te well; kolla tapran o Manasse i sasteha un pandan les shellentsa dran lolo saster, un anan les an o them Babilonia.

Jesaja 22:3

Tumare pralstune lurde nashan khetne penge. Kek failo was karje dino, har wan le tapedo. Lauter wan tapedo un pandlo fothe dur jon ninna nashan.

Jeremia 21:7

Un koi pal dau me o Zedekja, ko baro rajes pral Juda, an kol wasta o baro rajestar pral Babilonia, o Nebukadnezar, ninna leskre pralstunen un kol menshen kate an kau foro, kolla, kai gar meran ap o nasslepen, an o kurepen un i bokatar. Kowa penau me, o baro Dewel. Me dau tumen an i wasta kolendar, kai kamenn tumen te marell. O Nebukadnezar mukell tumen lauteren o chareha mulo te dell, un les khaitell kowa gar, un job krell peskro dji tumenge pandlo.

Jeremia 24:8

O baro rai Zedekja dran o them Juda un kol pralstune, kai leske budrenn, un kol tsele menshe, kai pral atchan an o foro Jerusalem un an o them Juda, ninna kolla, kai nashan penge an o them Egiptia, kolentsa lauterentsa krau me jaake har kol djungele faigentsa, hoi jaake djungele hi, te nai chal len kek. Kowa penau me, o baro Dewel.

Jeremia 38:18

Te djah tu gar win pash o pralstunende o baro rajestar dran o them Babilonia, palle dau kau foro an lengro wast. Un jon chatchrenn kau fores pre. Un tu nai nasheh witar gar lendar krik.

Jeremia 38:23

Tire tsele romja un tire tsele tchawe wenn pash i Babilonarja win anlo. Un tu ninna nai nasheh gar lendar krik. Jon taprenn tut, un denn tut an i wasta o baro rajestar dran Babilonia. Un kau foro well tele chatchedo.

Jeremia 4:12

na-a, ko phurdepen, hoi lenge bitchrau, hi bud sorleder. Palle dau len lengri phagi.

Jeremia 44:30

Me dau o baro rajes pral o them Egiptia – leskro lab hi Farao Hofra – an i wasta kolendar, kai kamenn les te marell, jaake har dom o Zedekjes, ko rajes dran o them Juda, an o wast o rajestar pral o them Babilonia, kowa kai kamas les te marell. Leskro lab hi Nebukadnezar. Kowa penau me, o baro Dewel.

Jeremia 49:23

Laba pral o foro Damaskus. I menshe an i forja Hamat un Arpad shunan tchilatcho koowa. Jon lan bari daar un djinenn gar, hoi te krenn. I traash well pral lende har o baro pani, hoi gar tardo atchell.

Ropaskre gilja 1:3

I menshe dran Juda hi pandle budepangre, hunte budrenn tel dawa, un djiwenn an wawar themma. Ninna kote hunte well len daar. Halauter, kai len palla lenn, wenna un rikrenn pengro wast ap lengri meen.

Ropaskre gilja 4:20

Maro rajes, koles o baro Dewel win rodas, lan le pandlo. Job his kowa, kolestar maro djipen was, un lestar patsam, te rikrell lo peskro wast pral mende, te nai krenn men i wawar themma tchi.

Ezekiel 23:24

Un jon wenn pral tute pengre wurdjentsa o kurepaske, ninna kol wurdjentsa, hoi hidjrenn chapen un wawar koowa, un bud bud lurdentsa. Un jon wenn trul tute trujel, un hidjrenn bare un tikne shilte, un sasterne stadja. Lenge dau tut an i wasta, te denn le tut tiri phagi pal lengro tchatchepen.

Habakuk 1:7

Daar un traash krenn le. Jon krenn penge pengro tchatchepen, un krenn jaake har jon kamenn.

4. Mose 13:21

Un jon djan koi, un dikan, har ko them hi an o mulo tato them Zin un dureder pre, o tselo drom bis pash o foro Rehob pash Lebo-Hamat.

Josua 13:5

un ko tselo them, kai i Gebalarja djiwenn, un kote, kai o kham pre-djal kol tsele berge, kai kharenn Libanon, fun o foro Baal-Gad, hoi tella pash i berga Hermon tchiddo hi, bis tele ap o drom, hoi an Lebo-Hamat djal;

Josua 4:13

Jaake 40.000 (star-deesh-serja) lurde djan an o kurepen an o telstuno them pash o foro Jericho. Un o baro Dewel his lentsa.

Josua 5:10

Un har i Israelitarja pengre plachtene khera pre tchiwan pash Gilgal an o telstuno them, kai o foro Jericho tchiddo hi, kote chan le ap i rati ko chapen, hoi kharella ‘Passa’. Kowa his ap o deesh-te-starto diwes an ko tchon.

Čačepangre 3:3

I pantch raja pral i Filistarja, i tsele Kanaanitarja un i Sidonarja un i Hiwarja, kai ap i berge Libanon djiwan mank i berga Baal-Hermon un Lebo-Hamat.