Jeremia 37:10 - O Debleskro Drom 2021 (Sinte)

¹⁰ Te nai marans tumer ninna i tsele lurden dran o them Babilonia khetne, kolla kai kurenn pen tumentsa, un te atchans lendar kokres i wast pherdo pral, kai dukedo hi, palle stakrans le dran pengre plachtene khera pre, un chatchrans kau fores tele.

O Debleskro Lab 2024 (Sinte-Manouche)

¹⁰ Te nay marans t'mer ninna i tsele lourden dran o them Babilonia khetne, kolla kay kourenn pen t'mentsa, oun te ačans lendar kokres i vast pherdo pral, kay doukedo hi, palle stakrans le dran pengre plarhtene khera pre, oun rhačrans kava fores tele.

Jeremia 37:10 ပူးပေါင်းရင်းမြစ်များ

Jesaja 10:4

Te han gar mank kolende, kai mulo dino wan, atchell tumenge tchi pral, har te tchiwenn tumen glan tele kolentsa, kai pandle wan. Un pral kowa lauter mukell o Debleskri choli tumendar gar tele, un leskro wast atchell pre hadedo, te dell lo tumen i phagi.

Jesaja 13:15

Koon an o foro Babilon hatslo well, well tele tchurje dino. Un koon tapedo well, well o chareha mulo dino.

Jesaja 14:19

Tu hal an i tchik witsedo, har i kotar kasht krik witsedo hi. Tut hi kek muleskro kheer, hal rido har kolla, kai wan maredo o chareha, hal witsedo lentsa an i barrengri phub un khetne stakedo.

Jesaja 30:17

I sero mursha tumendar nashenn penge glan jekeste, kai peskro mui pre krell un penell ‘Kanna lenn tumare dawa.’ Awa, glan pantch sawendar nashenn tumer lauter krik. Tumare tsele lurdendar atchell tchi pral har koi plachta ap i kasht, hoi pre tardo tchiwan pral ap i berga, te dikenn le lat fun dural.

Jeremia 21:10

Djinenn, man hi soreles glan, te anap bibacht pral kau foro, un wau gar ap leskri rig, penell o baro Dewel. Kau foro perell an o wast ko baro rajeske pral Babilonia. Kowa tchiwell jag ap leste un chatchrell les pre.

Jeremia 32:29

Un kol lurde dran o them Babilonia, kai trul kau foro tardo hi, wenna dren, un chatchrenn kau foro tele kol tsele kherentsa, kai was ap i dache sungepaskro koowa chatchedo o chocheno debleske Baal, un mool win tchoredo kol wawar chochene deblenge. Doleske was i choli an mande.

Jeremia 37:11

Har i egiptikre lurde pash Jerusalem wan, mukan i Babilonarja o foro Jerusalem.

Jeremia 37:8

Un i Babilonarja wenn kate pale un rikrenn kau foro an pengro wast, un lenn kau foro penge dren, un chatchrenn kau fores tele.

Jeremia 49:20

Shunenn, hoi o baro Dewel peske glan las, te krell lo ap i Edomarja, un hoi kamell lo te krell i menshentsa an o foro Teman. Tchatchepah, jon halauter wenn krik tradedo har bakre, ninna lengre tikne tchawe wenn krik tserdedo. Hakeneske, kai dikell kowa, atchell o rakepen krik.

Jeremia 50:45

Shunenn, hoi o baro Dewel peske glan las te krell lo ap o foro Babilon, un hoi kamell lo te krell i menshentsa an o them Babilonia. Tchatchepah, jon halauter wenn krik tradedo har bakre. Ninna lengre tikne tchawe wenn krik tserdedo. Hakeneske, kai dikell kowa, atchell o rakepen krik.

Jeremia 51:4

Palle hi i mule lurde tchiddo an o tselo them Babilonia, un tele tchurje-dine ap i dromma.

Ropaskre gilja 1:15

O baro Dewel stakras mire sorele kurepangren khetne, kai pash mande his; Job mukas i marepaskro chapen win te kharell, te nai wenn mare terne mursha maredo. Jaake har drake khetne stakedo wenn, te well i mool win, stakras lo i menshen dran Juda khetne.

Joel 2:11

O baro Dewel dell bari gole glan peskre kurepangre, te penell lo len, hoi te krenn le. Bud bud hi le un len hi bari soor, un krenn, hoi lo lenge penell. Awa, o diwes o baro Deblestar hi baro un pherdi traash. Koon nai rikrell les win?