Jeremia 32:41 - O Debleskro Drom 2021 (Sinte)

⁴¹ Miro dji sala, te nai krau lenge latchepen. Un me mukau len soreles an kau them well, un jon hunte mukenn les buder gar. Tchatchepah, kowa krau miro tselo djijeha un miri tseli sorjah.

O Debleskro Lab 2024 (Sinte-Manouche)

⁴¹ Miro dji sala, te nay krau lenge lačepen. Oun me moukau len zoreles an kava them vell, oun yon hounte moukenn les bouder gar. Čačepah, kova krau miro tselo djiyeha oun miri tseli zoryah.

Jeremia 32:41 ပူးပေါင်းရင်းမြစ်များ

Debleskri gili 80:8

Tu, Dewel un rai pral o bolepen un i phub, hade men pale pre! Dik latches ap mende, jaake djal menge pale mishto.

Jesaja 60:21

Tire menshe hi halauter an o tchatchepen tardo. Un kau them hi lenge hako tsireske. Jon hi har i tikne ruka, hoi tchiwom an i phub, un hoi bares wan. Mire wastentsa krom len, te sikrap miro railepen.

Jesaja 62:4

Tu weh gar buder kharedo ‘muklo foro’ un tiro them ‘mulo them’. Tu weh gole dino ‘o Debleskri pirni’, un tiro them ‘bachteli romni’. O baro Dewel dikell latches ap tute, un romedinerell pes tiro themeha.

Jesaja 62:5

Jaake har i terno mursh peske i terni tchai lell, jaake lenn tire menshe o them Juda penge. Un jaake bachtelo ko bijabeskro hi pral i terni tchai, kolah job bijab krell, jaake bachtelo hi tiro Dewel pral tute.

Jesaja 65:19

Me ninna, wau bachtelo pral Jerusalem, un miro dji giwell pral mire menshende. Ropen well kote buder gar shunlo, witar gar dell jek gole i darjatar.

Jeremia 18:9

I wawar kopo penau me ap i menshende an i rajeskro them, kai krau len baro un sorelo.

Jeremia 24:6

Ap lende dikau latches, un anau len pale pale an kau them. Un mukau len pale bares te well, un krau len gar paash, krau len pale soreles, un tradau len buder gar dran lengro them win.

Jeremia 31:28

Jaake har garda dom, te wan le win tserdedo un khetne phagedo, paash kerdo, un tele dino un dukedo, jaake dau palle garda, te wenn le pale bares un soreles, penell o baro Dewel.

Ezekiel 36:36

Un kol menshe an i wawar themma trul tumende, kai djido atchan, kolla dikenn un haiwenn, te krom me, o baro Dewel, kowa newes, hoi tele-phagedo his, un mukom senlepen un djob bares te well kote, kai tchi bares was. Me, o baro Dewel, penom kowa glan-wi, un me krau kowa ninna jaake.

Hosea 14:5

Jaake penell o baro Dewel: Me anau mire menshen pale ap miro drom, kai le tele peran. Me kamau len o djijestar, un hom buder gar chojedo ap lende.

Amos 9:15

Me anau mire menshen pale an lengro them, hoi lende dom. Un kek nai tserdell len dran lengro them win. Kowa penell tumaro baro Dewel.

Micha 7:18

Kek Dewel hi har tu, kai lell o tchilatchepen krik, hoi mer kram, un kai bistrell koi doosh, hoi anam ap mende – mer, kai tire menshendar pral atcham. Tu atcheh gar chojedo pral mende hako tsiro, un kreh tiro dji pre menge.

Zefanja 3:17

Tumaro baro Dewel hi pash tumende, job hi sorelo un hi ap tumari rig. Leskro dji giwell pral tumende, un job hi tumenge latcho. Tumari doosh lell lo tumendar krik an peskro baro kamlepen, un job dell gole i bachtjatar pral tumende,

5. Mose 28:63

Un jaake har o baro Debleske shukar his, te krell lo tumenge latchepen, un te krell lo tumendar bud menshe, jaake well leske palle shukar, te krell lo tumenge tchilatchepen, bis te atchenn gar bud tumendar pral. Un dran ko them, kai kanna dren djan, te lenn les tumenge dren, wenn tumer palle win tserdedo.

5. Mose 30:9

Tumaro baro Dewel dell tumen bacht an halauter, hoi tumer krenn; tumer lenn bud tchawe, bud vieche un bud djob ap tumari hachetikri phub, te djal tumenge latcheder har mishto. Leske hi shukar te krell lo tumenge latchepen, jaake har leske shukar his, te kras lo latchepen ap tumare phurende.