Jeremia 32:24 - O Debleskro Drom 2021 (Sinte)

²⁴ I Babilonarja hi trul o foro tardo, un tchiwan phub pre, te krenn le i drom, te nai djan le an o foro dren. Kau drom djal bis pash o foreste. Sik hunte perell o foro an lengre wasta. Un i menshendar koi dren merenn bud i bokatar un ap o djungelo nasslepen. Un wawar wenn maredo o chareha. Jaake har tu kowa penal, jaake was ninna; tu nai dikeh kokres, har hi.

O Debleskro Lab 2024 (Sinte-Manouche)

²⁴ I Babilonarya hi troul o foro tardo, oun čivan phoub pre, te krenn le i drom, te nay djan le an o foro dren. Kava drom djal bis pash o foreste. Sik hounte perell o foro an lengre vasta. Oun i menshendar koy dren merenn boud i bokatar oun ap o djoungelo nasslepen. Oun vavar venn maredo o rhareha. Yaake har tou kova penal, yaake vas ninna; tou nay dikeh kokres, har hi.

Jeremia 32:24 ပူးပေါင်းရင်းမြစ်များ

2. Samuel 20:15

Lentsa was lo pash o foro Abel-Bet-Maacha. Un i lurde, kai o Joabeha djan, wan un tchiwan pen trul o foro, un pandan jaake o Shebaes dren. Glan o foro hadan le phub win un kran i baro drom, kai djas pral bis ap kol glanstune barra, hoi trul o foro pre-tchiddo his. Un jon nashan glan un kaman kol barra trujel te witsrell.

Jesaja 37:33

Doleske penell o baro Dewel pral o baro rajeste dran o them Assur: Na-a, job well gar an kau foro, un dell kek failo karje an kau foro dren. Glan kau foro nai tchiwell lo kek lurden, kai rikrenn pengre shilte pre. Un kek phub mukell lo pre te tchiwrell, te nai djal lo koi pral an o foro dren.

Jeremia 16:4

Lendar hunte merenn ap pharo nasslepen, un kek rowell pral lende un paskrell len. Jon atchenn tchiddo ap i hachetikri phub har viechengro ful. Wawar merenn an o kurepen. Un ninna wawar merenn i bokatar. Un i tchirkle un i diwje vieche chan len pre.

Jeremia 20:5

Ko tselo brawlepen an kau foro dau me kolen, kai len win randenn. I tsele lowe, hoi i menshe an Jerusalem dran pengri budi khetne anan un lengro kutch koowa un o tsele brawlepen kol rajendar pral o them Juda lenn le pentsa un anenn les an o them Babilonia.

Jeremia 24:10

Me anau kurepen, bok un nasslepen mank lende, bis te kek lendar pral atchas an kau them, hoi dom len un lengre phurende.

Jeremia 29:17

O baro Dewel, ko rai pral o bolepen un i phub penell: Me bitchrau kurepen, bok un nasslepen mank lende, un krau lentsa, har te wans le djungele faige, hoi nai chal kek.

Jeremia 29:18

O kurepen, i bok un o nasslepen lenn len palla. Un i menshe dran i tsele themma ap kai phub denn i wasta khetne pral o shero, te dikenn le len. An hako them, kai tradau len, dikenn le ap lende har ap praassede menshende, kolendar darenn le. Un jon denn shol pral lende un praassenn len.

Jeremia 32:25

Un tu, baro Dewel, miro rai, peneh ap mande: ‘Gin tuke i kotar them, un plaisse kol lowe, te well lo tute! Un le murshen pashel, te dikenn le halauter, har tu gineh ko kotar them.’ Kowa penal, ninna te well kau foro an o wast i menshendar dran o them Babilonia dino!

Jeremia 32:28

Doleske penau: Tchatcho hi, me dau kau foro an o wast i lurdendar dran o them Babilonia un an o wast lengro baro rajestar, o Nebukadnezar. Job well pral kau foro un lell les peske dren.

Jeremia 32:3

Glan i tsiro stilas les o baro rai pral o them Juda, o Zedekja, doleske, kai penas o Jeremia glan-wi: Kowa penell o baro Dewel: Me dau kau foro an o wast o baro rajestar dran o them Babilonia, un job lell ko foro peske dren,

Jeremia 32:36

Doleske hi kanna jaake: Tumer penenn: Kau foro well an i wasta o baro rajestar dran Babilonia dino. Un i menshe an kau foro wenn maredo o chareha, merenn i bokatar un ap i djungelo nasslepen. Ninna te well kowa jaake, penau me, o baro Dewel, kai o Israeleskro Dewel hi, pral kau foro:

Jeremia 32:5

Un o baro rai dran Babilonia mukell o Zedekjes an o them Babilonia te anell; kote atchell lo ninna, bis te dau me les peskri phagi, penell o baro Dewel. Ninna te kurenn tumen i lurdentsa dran o them Babilonia, djal tumenge kowa gar mishto win.

Jeremia 33:4

O baro Dewel, kai o Israeleskro Dewel hi, penell pral i khera an kau foro un pral kol khera i bare rajendar pral o them Juda, hoi phagan le tele, te krenn le o foreskre massurja lentsa sorleder un bareder, te nai wenn gar i Babilonarja pral pengre pre-tchidde dromma an o foro dren.

Jeremia 34:17

Doleske penell o baro Dewel: Tumer shunan gar ap mande un mukan tumare phralen un phenjen gar win te djal, kai ninna Israelitarja hi har tumer, doleske mukau me, o baro Dewel tumen te djal, te wenn maredo o chareha, merenn ap o djungelo nasslepen un i bokatar. Te dikenn i menshe an tsele themma ap i phub, hoi tumentsa djal, denn le i wasta pral o shero khetne.

Jeremia 52:4

Har o Zedekja an o enjato bersh baro rai his, was o baro rai pral o them Babilonia, o Nebukadnezar, peskre tsele lurdentsa glan o foro Jerusalem. Kowa his ap o deshto diwes an o deshto tchon. Un job tchiwas peskre lurden trul o tselo foro, un mukas tchik pre te witsrell trul o foro, te krell lo i drom, hoi djal pral ap o foreskri massuri.

Jeremia 52:6

Ap o enjato diwes an o starto tchon was i bok bares an o foro, un i menshen his buder tchi te chal.

Jeremia 6:6

Kawa penell o baro Dewel, o rai pral o bolepen un i phub: Denn i ruka tele an o foro Jerusalem, un krenn i drom, hoi djal pre ap o foreskri massuri o forestar Jerusalem! An kau foro hi tchi har tchilatchepen dren. Doleske lell lo peskri phagi.

Ezekiel 14:21

Un kanna penell o baro Dewel, maro rai: Ap ko tsiro, kai bitchrau star phare dawa pral ko foro Jerusalem – kurepen, bok, diwje vieche un pharo nasslepen, – te merenn i menshe un vieche koi dren,

Ezekiel 21:22

Jaake kamau ninna me, o baro Dewel, mire wasta khetne te dell i choljatar. Un pal kowa hom buder gar chojedo.

Ezekiel 21:27

Ko sikepen sikrell ap i tchatchi rig un penell leske, te djal lo peskre lurdentsa an o foro Jerusalem. Kote denn le bari gole – i bari kurepaskri gole. Jon tchiwenn bare pesse rukengre kotja pash i wudja an o foreskri massuri, te denn le kolentsa i wudja dren. Ninna tchiwenn le tchik pre win trul i massuri, te nai djan le pral ap i massuri. Un jon krenn turme, te denn le karje an o foro.

Ezekiel 26:8

Tire gaba, hoi wergel tutar ap o them hi, dell lo o chareha. Trul tire massurja mukell lo phub pre te tchiwell, te nai djan le pral wergel. Ninna mukell lo turme te krell, kolendar denn le karje an o foro. Un job mukell shilte pre te tchiwell, pal lende i lurde tardo hi.

Ezekiel 4:2

Kau barreha sike, har ko foro dren lino well! Kre bare turme trul leste, un tchip tchik khetne, te kress i drom, hoi djal ap o foreskre massurja pre. Tchip lurden trul o foro trujel! Un tchip bare pesse rukengre kotja pash i massurja trul o foro, kolentsa i massurja paash dino wenn.

Habakuk 1:10

Jon sanenn pral i bare rajende un pralstunende an wawar themma. Kol tsele forja, kai sorele massurja trul lende tardo hi, hi lenge har tchitcheske; jon tchiwenn tchik pre glan i massurja, un djan pral wergel, un lenn kol forja dren.

Zakarie 1:6

Kol laba, hoi jon, mire budepangre, tumare phurenge penan, tapran len. Koi mukan le pengro tchilatcho drom, un penan: Kowa, hoi o baro Dewel, ko rai pral o bolepen un i phub, mentsa kras, hi i phagi maro tchilatcho djipaske un ko tchilatcho koowa, hoi kram, jaake har penas lo.

Mateo 24:35

O bolepen un i phub atchenna gar. Mire laba atchenna hako tsiro.

5. Mose 4:26

Kau diwes dau man sowel glan o bolepen un i phub, te krenn tumer sawo koowa, djiwenn gar rah an o them, hoi tumer dren lenna wergel o pani Jordan. Kokres i tikno tsiro atchenn tumer koi. Palle wenn tumer lauter krik tradedo.