Jeremia 3:25 - O Debleskro Drom 2021 (Sinte)

²⁵ Mer hunte ladjams men, un mari ladj hunte tchakrals men har i plachta! Maro tselo djipen djiwam jaake, har o baro Dewel, maro rai, gar kamas. Mer un mare phure djiwam jaake, un shunam gar ap kowa, hoi job menge penas, te kras mer.

O Debleskro Lab 2024 (Sinte-Manouche)

²⁵ Mer hounte ladjams men, oun mari ladj hounte čakrals men har i plarhta! Maro tselo djipen djivam yaake, har o baro Devel, maro ray, gar kamas. Mer oun mare phoure djivam yaake, oun shounam gar ap kova, hoy yob menge penas, te kras mer.

Jeremia 3:25 ပူးပေါင်းရင်းမြစ်များ

Debleskri gili 106:6

Mer anam doosh ap mende jaake har mare phure, un kram gar, hoi tchatcho hi. Na-a, mer kram tchilatcho koowa.

Debleskri gili 106:7

Mare phure haiwan gar ko baro sorelo koowa, hoi tu an o them Egiptia kral, un bistran har bud lenge latches hals, un hadan pen pral tute pash o Baro Lolo Pani.

Debleskri gili 109:29

An i ladj ap kolende lauterende, kai anan doosh ap mande pre. Lengri ladj mu well jaake baro, te wenn le latar tchakedo har i bajah.

Gosewe laba 13:18

An tchorwlepen un ladj well kowa, kai mukell pes tchi te penell. An-diklo well kowa, kai shunell, te well lo trad dino.

Gosewe laba 5:13

Hoske shunom gar ap mire sikepangre, un dom jak ap lengro rakepen?

Jesaja 48:8

An kek tsiro shunan tumer, hoi penom, witar gar kaman kowa te djinell. Un i rah tsiro his tumare kanda pandlo mire labenge. Tchatchepah, me djinom tumaro phukepen. Un jaake rah har ap i phub han, wenn tumer kharedo: Kolla, kai kamenn tchi o Deblestar te djinell.

Jesaja 50:11

Tumer lauter, kai i jag krenn, un kashta tchinenn un an-chatchenn, te denn tchurje lentsa, nashenn an tumari jag! Un chatchrenn tumen kokres kol kashtentsa, hoi an-chatchan! Kawa hi, hoi ap tumende well dran o wast o baro Deblestar: An phare duka wenn tumer koi tchiddo.

Jeremia 11:13

Jaake bud forja tumen hi, jaake bud deblen hi tumen, tumer menshe an Juda. Un jaake bud dromma an Jerusalem hi, jaake bud chatchepangre kran tumer, kai chatchrenn viechen o djungelo debleske Baal.

Jeremia 12:13

Mire menshe tchiwan djob an i phub, un subjengro senlepen lan le khetne. Jon maran pen tele, un lan tchi dran lengri phari budi. Lauter his tchitcheske! His koi bari choli o baro Deblestar, hoi kras lauter paash.

Jeremia 14:20

Baro Dewel, mer dikah dren, kai djiwam gar tuha, un mare phure tchilatchepen kran. Mer lam doosh ap mende glan tute.

Jeremia 14:7

Baro Dewel, mari doosh hi glan mare jaka tardo. Bud kope djam tutar krik, un shunam gar ap tute. Ab pale ap mari rig, te dikell hakeno, har kamlo hal!

Jeremia 2:17

Kowa lauter hi tiri doosh! Bud kope kamas o baro Dewel, tiro rai, tut ap o tchatcho drom te anell. Un tu mukal les!

Jeremia 2:19

Dran tiro tchilatchepen well kowa ap tute. Tu shunal gar. Doleske leh tu sawi phagi. Tu hunte djiness un haiwess, hawo pharo koowa un duka ap koleste wenna, kai djal peskro baro Deblestar krik, un kamell lestar buder tchi te djinell. Kowa penell o baro Dewel, ko rai pral o bolepen un i phub.

Jeremia 2:2

Dja koi, un rake glan i tsele menshende an o foro Jerusalem, un pen: Kowa penell o baro Dewel: Israel, me djinau, har ap mande rikral har terno hals, un har kamal man har i pirni peskro pirnes, un har tu mantsa djal an o mulo tato them, an ko them, kai tchi bares well an i phub.

Jeremia 2:26

Har i tchorepaskro hunte ladjell peske, te well job tapedo, jaake hunte ladjenn penge kol menshe an o them Israel, ninna kol bare raja, un pralstune un rashaja un Debleskre rakepangre,

Jeremia 20:18

Hoske wom dran miro dakro per win, te dikap ropen un duka, un djiwap hako diwes an ladj?

Jeremia 22:21

Jerusalem, har djas tuke gomme mishto, dom me tut trad. Tu penal, me dau gar jak ap kowa, hoi lo rakrell. Jaake kral hako tsiro. Ninna har tu gomme terno hals, shunal gar ap mande.

Jeremia 3:13

Tu hunte kress tchi, har te dikess dren, kai anal doosh ap tute, har hadal tut pre pral o baro Debleste, kai tiro Dewel hi. Tu nashal kai te koi trujel, te mangess wawar deblen an tel hake senele ruka, un shunal gar ap mire laba, penell o baro Dewel.

Jeremia 31:19

Har dikom miri doosh dren, mukom miro tchilatcho drom, un har khaitas man, hoi krom, dom mire wasta pral o shero khetne. Ko wi-ladjedo koowa, hoi krom, har terno homs, koleske ladjom un wom lolo i ladjatar.”

Jeremia 6:26

Tumer, mire menshe, tumenge penau: Riwenn gone ap tumende! Tchiwenn tumen an i jagakri tchik! Rowenn har te merals tumaro tchawo, un tumen kek wawar hi! Giwenn i ropaskri gili! Kol marepangre perenn ap jek kopo pral mende.

Jeremia 7:19

Mange krenn jon koweha kek duka, penell o baro Dewel. Ap pende kokres anenn le ladj.

Jeremia 8:14

Hoske ham mer kai trujel beshdo? [putchenn i menshe dran Juda.] Mer was khetne, te djas mer an kol sorele forja, te was koi maredo! Mer mukam o baro Debles, maro rajes. Doleske kamell lo maro merepen, un dell men sawo pani te pijell, hoi marell men.

Jeremia 9:18

Shunenn, o ropen well shunlo an o foro Zion: Ach, har djan jon sorjah ap mende! I ladj was ap mende! Mer hunte djas dran kau them. Mare khera chatchran jon tele.

Ropaskre gilja 5:16

Mer nashram maro railepen. Mari doosh, hoi anam ap mende, anas men an i bibacht!

Ropaskre gilja 5:7

Mare phure anan doosh ap pende, un djiwenn buder gar. Mer kitse kai ham, hunte hidjras lengri tseli doosh.

Ezekiel 2:3

Tu, mensho, me bitchrau tut pash i Israelitarja. Kolla hadan pen un peran mandar tele. Ninna lengre phure hadan pen pale te pale pral mande. Un kolla, kai kau diwes djiwenn, hi gar wawartchandes.

Ezekiel 36:32

Me o baro Dewel, tumaro rai penau tumenge: Hi gar tumenge, kai me krau kau latcho koowa. Ma bistrenn kowa! Tumer dran o kheer Israel, ladjenn tumen un awenn lolo i ladjatar pral kowa, hoi kran!

Ezekiel 44:13

Jon nai atchenn buder gar mire rashaja un wenn buder gar pash kol tsele koola, hoi mange hi, un hunte rikrenn pen pale fun ko chapen, hoi mange dino was, un kokres i rashaja nai chan. Jon hunte ladjenn pen pral ko djungelo koowa, hoi le kran.

Ezekiel 7:18

Gone tchiwenn le trul pende har ripja, un tchinenn pengre balla ap lengro shero tele, te sikrenn le har bud khaitell len lengri doosh. Jon trissenn i darjatar. Un lengre sherja hi lolo i ladjatar.

Daniel 12:2

Un bud kolendar, kai tel i phub tchiddo his un sowan, kolla stenn pre, ko jek o djipaske, hoi gar pre herella, un ko wawar i bari ladjake un o praassepaske, hoi buder gar pre herella.

Hosea 9:10

O baro Dewel penell: I Israelitarja his mange har drake an o mulo them, har hatsom len kote. Un tumare phure his mange har newe faige ap i faigetikro ruk. I tsiro koi pre, har wan le pash i berga Peor, dan le pen o wi-ladjedo debleske Baal koi, un wan jaake pale-tchiddo har ko dewel, kones jon kaman.

Zefanja 1:17

I menshe kran tchilatchepen ap mande. Doleske krau len darenes, te nashenn le trujel har korele menshe. Lengro rat te nashell ap i phub har tchik, hoi krik witsedo well. Un lengre buke wenn krik witsedo har te wans le ful.

Remarja 6:21

Kowa, hoi kran, his tchi moldo. Tumer kran sawo koowa, koleske kai diwes ladjenn tumen. Sawo koowa anell an o merepen dren.

Čačepangre 2:2

Un tumendar kamom, te wenn kek mala kol menshenge, kai an kau them djiwenn, un te phagenn tumer lengre pre-tchidde barra tele, kai chatchrenn le viechen lengro debleste. Un hoi kran tumer? Tumer shunan gar ap kowa, hoi penom!