Jeremia 27:6 - O Debleskro Drom 2021 (Sinte)

⁶ Me dom kal tsele themma an i wasta o baro rajestar, o Nebukadnezar dran o them Babilonia. Job krell, hoi kamau, te krell lo. Ninna i diwje viechen dom les, te well lo rai pral lende.

O Debleskro Lab 2024 (Sinte-Manouche)

⁶ Me dom kal tsele themma an i vasta o baro rayestar, o Neboukadnezar dran o them Babilonia. Yob krell, hoy kamau, te krell lo. Ninna i divye firhen dom les, te vell lo ray pral lende.

Jeremia 27:6 ပူးပေါင်းရင်းမြစ်များ

2. Rajengro liil 25:28

Un o Ewil-Merodach rakras kamles leha, un hadas les pral kol wawar raja, kai pash leste his an o them Babilonia.

2. Familjakro liil 36:23

“Kawa penell o Kirus, ko rai pral o them Persia: O baro Dewel an o bolepen das man i tsele themma ap kai phub. Un job penas mange, te krap leske i kheer an o foro Jerusalem an o them Juda. Koon kanna mank tumende leskre menshendar hi, koleha te well peskro Dewel! Un job nai djal pral an o foro Jerusalem.”

Jesaja 44:28

Me hom kowa, hoi ap o Kirus penell: “Tu dess garda ap mire menshende har i bakrengro ap peskre bakre.” Un job krell lauter, hoi kamau, te krell lo. Pral o foro Jerusalem penell lo: “Tchiwenn les pale pre!” Un pral o Debleskro baro kheer penell lo: “Tchiwenn leskre barra pale pre!”

Jeremia 21:7

Un koi pal dau me o Zedekja, ko baro rajes pral Juda, an kol wasta o baro rajestar pral Babilonia, o Nebukadnezar, ninna leskre pralstunen un kol menshen kate an kau foro, kolla, kai gar meran ap o nasslepen, an o kurepen un i bokatar. Kowa penau me, o baro Dewel. Me dau tumen an i wasta kolendar, kai kamenn tumen te marell. O Nebukadnezar mukell tumen lauteren o chareha mulo te dell, un les khaitell kowa gar, un job krell peskro dji tumenge pandlo.

Jeremia 22:25

Me dau tut an i wasta kolendar, kai kamenn tut te marell, un kolendar tut traash hi, an i wasta o baro rajestar dran Babilonia, o Nebukadnezar, un leskre lurdendar, kol Kaldearja.

Jeremia 24:1

His an ko tsiro, kai anas o Nebukadnezar, ko baro rai dran o them Babilonia, o baro rajes pral Juda, o Jekonja, koleskro dad o Jojakim his, pandles dran Jerusalem an o them Babilonia. Khetne leha anas lo i pralstunen pral Juda krik, ninna kolen, kai haiwan o kashteha un o sasteha te budrell. An ko tsiro sikras man o Dewel dui korbe, kai faige dren his, tardo glan o baro Debleskro kheer.

Jeremia 25:9

Doleske mukau kol lurden te well dran i themma, kai kote tchiddo hi, kai norden hi. Lengro pralstuno hi o baro rai, o Nebukadnezar, dran o them Babilonia. Koles rodom win, te krell job, hoi kamau. Kolla perenn pral tumende un tumaro them, ninna pral kol tsele themma kai trujel. Kal themma mukau jaake paash te dell, te atchell tchi har barra pral hako tsireske. Un i wawar menshenge, kai kowa dikenn, atchell o rakepen krik i trashatar, un jon denn i wasta pral o shero khetne.

Jeremia 28:14

O baro Dewel, ko rai pral o bolepen un i phub, kai o Israeleskro Dewel hi, kowa penell: Me krau, te hunte budrenn i menshe an kal tsele themma o baro rajeske dran Babilonia, o Nebukadnezar. Leskro wast hi phares ap lende tchiddo har i saster, hoi o hacho trul o gurumeskri meen tchiwell. Ninna i viechen tchiwom an leskro wast.”

Jeremia 43:10

Un pen ap lende: Kawa penell o baro Dewel, ko rai pral o bolepen un i phub, kai o Israeleskro Dewel hi: Shunenn, me dau o Nebukadnezares kate gole. Job, ko baro rai dran o them Babilonia, krell miri budi. Pral ap kal barra, hoi mukom an i phub te tchiwell, mukau leskro shukar plachteno kheer pre te tchiwell, kai lo beshdo hi un sikrell, kai job o baro rai hi.

Jeremia 49:30

Me, o baro Dewel, penau i menshenge an o them Hazor: Nashenn tumenge, hadenn tumen sik krik kau themestar, khatrenn tumen dur an i phub dren! O Nebukadnezar, ko rai dran o them Babilonia, koles hi an o shero, te krell lo tumenge tchilatchepen, un mukell pes kolestar gar tele te anell.

Ezekiel 29:12

Me krau ko them Egiptia, te well lo i mulo them, jaake har i wawar themma trul leste mule themma hi. Star-deesh bersha atchell leskre forjendar tchi har barra pral, jaake har pash kol wawar forja ninna hi, hoi an i themma koi trujel tchiddo hi. Un i Egiptarjen tradau an wawar themma, te djiwenn le mank wawar menshende.

Ezekiel 30:24

Un me krau i mussja o baro rajestar pral o them Babilonia soreles. Un dau les miro charo an o wast. Un o Farao peskre phagede mussjentsa dell gole i dukatar glan leste har i mursh, kai was phares dukedo un hunte merell.

Daniel 4:12

Leskro telstuno kotar i drabentsa hunte atchell an i phub mashkral o senlepen, hoi trul leste bares wella. Un sasterne shelle wenn trul leste pandlo. Un o brishin perell ap leste tele un krell les sapenes. Un har i vieche chal lo o senlepen ap i phub.

Daniel 4:22

Tu weh pale-tchiddo un hunte djiwess pash i viechende un buder gar mank i menshende. Jon denn tut khass te chal har i grumjen. Un tu tchiweh tut win tele. Un o brishin perell ap tute tele un krell tut sapenes. Un efta bersha djan jaake trujel, bis te tu haiweh, te hi o pralstuno Debles i tsele rajengre themma an peskro wast, un job dell kol themma koleste job kamell.