Jeremia 25:30 - O Debleskro Drom 2021 (Sinte)

³⁰ Tu Jeremia, hunte peness lenge kal tsele laba, hoi penom. Pen lenge ninna: O baro Dewel dell gole dran o bolepen, un mukell peskri soreli gole te shunell dran peskro bolepaskro kheer. Job dell bares gole har i lewo, un well shunlo an peskro tselo them; Job dell gole har ko mursh, kai stakrell ap peskre drake, te well i mool win. Leskri gole well shunlo ap i tseli phub.

O Debleskro Lab 2024 (Sinte-Manouche)

³⁰ Tou Yeremia, hounte peness lenge kal tsele laba, hoy penom. Pen lenge ninna: O baro Devel dell gole dran o bolepen, oun moukell peskri zoreli gole te shounell dran peskro bolepaskro kheer. Yob dell bares gole har i levo, oun vell shounlo an peskro tselo them; Yob dell gole har ko morsh, kay stakrell ap peskre drake, te vell i mool vin. Leskri gole vell shounlo ap i tseli phoub.

Jeremia 25:30 ပူးပေါင်းရင်းမြစ်များ

2. Samuel 15:25

Palle penas o baro rai ap o Zadok: “An ko mochton an o foro pale pale. Te kamell o baro Dewel mange latches te well, anell job man pale pale, te dikap ko mochton pale un o kheer, kai lo tardo hi.

1. Rajengro liil 9:3

Un o baro Dewel penas leske: Me shunom, har man an-mangal, un har mandar mangal, te dikap latches ap tute. Jaake rodom kau kheer mange win, hoi tu kral, te djiwap kote hako tsiro. Me dau garda koi pre. Kote krau miro dji tumenge pre.

2. Familjakro liil 30:27

Un i rashaja un i Levitarja stan pre un rakran o Debleskri bacht pral i tsele menshende win. Un o baro Dewel shunas lengro rakepen, un hoi le lestar mangan, was pash leste an o bolepen shunlo.

Debleskri gili 11:4

O baro Dewel hi an peskro railo baro kheer. Leskro rajeskri beshepaskri hi an o bolepen. Leskre jaka dikenna tele ap i menshende, un job lell len an o jak.

Debleskri gili 132:14

“Kaja hi i platsa, kai khere hom hako tsiro” penell lo. “Kate kamau te djiwell.”

Debleskri gili 46:6

O Dewel hi mashkral leste, doleske perell o foro gar khetne. O Dewel well ap leskri rig sik taissarlakro.

Debleskri gili 58:5

Lengro rakepen marell har i tchip i tchilatcho sapestar. Jon hi har i sap, hoi nashte shunell gar.

Debleskri gili 78:65

Koi stas o baro Dewel pre, har jek, kai sowas un pre djangras. Sorelo his lo har jek, kai pash i pipen bachtelo was.

Jesaja 16:9

Doleske rowau me khetne kolentsa, kai an o foro Jaser djiwenn, rowau pral i drakengre ruka pash o foro Sibma. Bud hi mire swa, hoi rowau pral tute, Heshbon, un pral tute, Elale. Pral tumare rukengre un pral tumari djob denn kolla gole i bachtjatar, kai kuran pen tumentsa.

Jesaja 33:3

I menshe dran wawar themma nashenn penge, te shunenn le tiri gole. Te steh tu pre an tiri soor, wenn le krik tradedo ap hake rigja.

Jesaja 42:13

O baro Dewel djal win an o kurepen har i sorelo mursh; un kurell pes har i kurepaskro, koleskro dji pherdo hi, te djal lo an o marepen. Soreles dell lo o kurepaskri gole, un kek darjah djal lo win ap kolende, kai kurenn pen leha.

Jeremia 17:12

Maro Debleskro kheer hi har i rajeskri beshepaskri, pherdo o Debleskro railepen, un tardo ap i bari berga, jaake rah har lo koi hi.

Jeremia 25:38

Job djas win, har i terno lewo win well dran peskro khatepen, te marell lo. Un lengro them atchas khetne stakedo tchiddo. Jaake baro his o kurepen, un o baro Debleskri choli pral lende.

Jeremia 48:33

Kote, kai i ruka un burra tardo hi an o them Moab, giwenn un khelenn le buder gar pral ko latcho koowa, hoi kote bares was. Kek mool well kerdo. Kek drake wenn buder khetne stakedo, te nashell i mool win. O moljengro rai giwell buder gar peskri gili.

Hosea 11:10

Palle djan le o baro Debleske palla, un job dell gole har i lewo, awa, job dell gole har i lewo, un leskre tchawe wenn trisslepah pash leste fun kotar, kai o kham tele djal.

Hosea 5:14

Me hom o themeske Efrajim har i lewo, un o khereske Juda har i terno lewo. Me dandrau len an kotja, un djau mange. Me hidjrau len krik, un kek nai lell len dran miro wast win.

Amos 1:2

O Amos penas: O baro Dewel dell bari gole i berga Zion pral tele. Leskri gole hi har i gole, hoi i lewo della, un well shunlo dran Jerusalem. O bakrengro them well truk, un o khass ap i berga Karmel well djelto.

Amos 3:8

O lewo dell gole – kones hi kek daar? O baro Dewel, maro rai, rakrell, koon nai rikrell man pale, te penap leskre laba dureder?

Zakarie 2:13

Denn garda! Me dau len trad miro wasteha, te wenn le tchoredo kolendar, kai hunte budran lenge.” Palle dikenn tumer, kai o baro Dewel, ko rai pral o bolepen un i phub, kowa hi, kai bitchras man.

5. Mose 26:15

Dik tele ap mende dran tiro bolepaskro kheer! Un tchip tiri bacht ap mende, tire menshende Israel, un ap ko them, hoi tu men dal, jaake har tu tut glan mare phurende sowel dal, te deh men i them, hoi jaake latcho hi, te nashell thud un gwin koi dren.”

Debleskro tsiro 19:15

Un dran leskro mui well i charo win, hoi latches tchinella. Koleha kurell lo pes i menshentsa an i tsele themma, un well sorleder har jon. Job anell len i sasterno wasteha. Jaake har jek i drake paash stakrella, te well i mool win, jaake stakrell lo kolen paash, kai gar ap leste shunenna, un anell i choli o sorelo Deblestar ap lende.