Jeremia 25:29 - O Debleskro Drom 2021 (Sinte)

²⁹ Shunenn, ko foro, hoi pal mande kharedo hi, hi kowa, kai anau i bibacht glanstunes ap leste. Patsenn tumer, kai lenn gar tumari phagi? Na-a! Tumer ninna lenn tumari phagi. Me bitchrau o kurepen pral halauterende, kai djiwenn ap kai phub. Kowa penell o baro Dewel, ko rai pral o bolepen un i phub.

O Debleskro Lab 2024 (Sinte-Manouche)

²⁹ Shounenn, ko foro, hoy pal mande kharedo hi, hi kova, kay anau i bibarht glanstounes ap leste. Patsenn t'mer, kay lenn gar t'mari phagi? Na-a! T'mer ninna lenn t'mari phagi. Me bičrau o kourepen pral halauterende, kay djivenn ap kay phoub. Kova penell o baro Devel, ko ray pral o bolepen oun i phoub.

Jeremia 25:29 ပူးပေါင်းရင်းမြစ်များ

1. Rajengro liil 8:43

palle shun tu, kai djiweh an bolepen, un kre halauter, hoi ko wi-themari tutar mangell, te nai haiwenn i menshe an i tsele themma ap kai phub, koon tu hal, un mangenn tut an, jaake har tire menshe Israel. Palle djinenn le, kai tu djiweh an kau kheer, hoi tuke krom.

Gosewe laba 11:21

Tu nai deh tiro wast koi pre: O tchilatcho lell peskri phagi. Kolla, kai an o tchatchepen tardo hi, wenn win lino dran o merepen.

Gosewe laba 11:31

Djiness, i latcho mensheske ap kai phub well o latchepen pale dino, hoi lo kras. Har bud budeder well palle o tchilatchepen pale dino kolenge, kai o tchilatchepen kran un o Debleskro drom mukan.

Gosewe laba 17:5

Kowa kai pral i tchorweleste sal, kowa praassell koles, kai les kras. Kowa, kai bachtelo hi pral o wawareskri bibacht, sawo lell peskri phagi.

Jesaja 10:12

An ko tsiro, kai kras o baro Dewel, maro rai, lauter, hoi job peske glan las, te krell lo ap i berga Zion un an Jerusalem, lell lo peske o baro rajes o themestar Assur glan, koleskro dji jaake pre-phurdo hi, un koleskre jaka tele dikenn ap i wawarende.

Jeremia 13:13

Palle pen lenge: Kowa penell o baro Dewel: Me kamau lauteren mato te krell, kai djiwenn an kau them: kol bare rajen, kai ap o Davideskri beshepaskri beshdo hi, i rashajen un o Debleskre rakepangren un i tsele menshen, kai djiwenn an o foro Jerusalem.

Jeremia 19:3

Un pen: Shunenn o baro Debleskro lab, tumer bare raja pral o them Juda un menshe an Jerusalem. Jaake penell o baro Dewel, ko rai pral o bolepen un i phub, kai o Israeleskro Dewel hi: Shunenn, me kamau bari bibacht pral kau foro te anell, kai hakeno, kai shunell kowa, leskre kanda dukenna.

Jeremia 30:11

Me, o baro Dewel, hom pash tumende, te wap ap tumari rig. Kol natsjone, mank kolende tradom tumen, kolla hunte djan tele. Tumer djan gar tele. Tumende dau i phagi har tumenge mishto hi. Kek dawentsa nai mukau tumen gar. Wals gar mishto, te dap tumen kek phagi.

Jeremia 46:28

Doleske, ma traash, Jakob, miro budepaskro, penell o baro Dewel. Me hom pash tute. Kol tsele natsjone, kai me tut tradom, mukau gar te djiwell. Tut mukau te djiwell. Dawa hunte dap tut, har tuke mishto hi. Kek dawentsa nai mukau tut gar.

Jeremia 49:12

Shunenn mishto, tumer Edomarja, penell o baro Dewel. Dran ko khoro, kai hi pherdo miri choli, hunte pijan ninna kolla, kai kek tchilatchepen kran. Un tumer kamenn, te well kek phagi ap tumende? Na-a, tumer lenn tumari phagi. Tumer hunte pijenn ko khoro ninna!

Ezekiel 14:17

Te mukoms me i kurepen win te phagell an ko them, un mukoms menshen un viechen kote mulo te dell,

Ezekiel 14:21

Un kanna penell o baro Dewel, maro rai: Ap ko tsiro, kai bitchrau star phare dawa pral ko foro Jerusalem – kurepen, bok, diwje vieche un pharo nasslepen, – te merenn i menshe un vieche koi dren,

Ezekiel 38:21

Un me dau o charo gole, te well lo pral o Gog ap mire tsele berge, penell o baro Dewel, maro rai. Leskre lurde djan pengre charentsa jek ap o wawareste pre.

Ezekiel 9:6

Denn i phuren mulo, un i terne murshen un i terne tchen, ninna i tchawen un i djuwjen! Ma taprenn jekeske an, koles ko sikepen glan ap peskro shero hi! Djan glanstunes pash miro kheer, un fun kotar dureder. Jaake kran le, un maran glanstunes kol pralstunen, kai glan o baro Debleskro kheer tardo his.

Obadja 1:16

Tumer menshe dran Juda, kai djiwenn ap miri berga, tumenge penau: Jaake har pijan tumer dran o khoro miri choljatar, jaake hunte pijenn palle i tsele wawar menshe ap i phub koi dran hako diwes. Jon hunte tchorenn o pipen an pende dren, bis te tchi buder dren hi, un kek lendar buder koi hi. Palle well, har te dans jon gar.

Zakarie 13:7

O baro Dewel, ko rai pral o bolepen un i phub, penell: “Miro charo, hade tut! Dja ap o bakrengro pre, kai mange budrella, ap koleste, kai pash mande tardo hi! De o bakrengres! Palle nashenn i bakre krik, hakeno ap peskri rig! Ninna ap i tiknende hadau miro wast.”

Louka 23:31

Te krenn jon kawa i senelo kashteha, hoi krenn jon palle i phuro kashteha?”

1. Petro 4:17

Kanna was ko tsiro, kai wenna i tchilatche diwessa pral o Debleskre tchawende. Pal kowa wella bari bibacht pral kolende, kai patsan gar ap o Debleskro latcho lab!