Jeremia 23:17 - O Debleskro Drom 2021 (Sinte)

¹⁷ Kolenge, kai san pral o baro Debleskro lab, penenn le: ‘Tumenge djal mishto an ko tsiro, hoi wella!’ Un kolenge, kai djan pal pengro shero, penenn le: ‘Kek bibacht well pral tumende.’

O Debleskro Lab 2024 (Sinte-Manouche)

¹⁷ Kolenge, kay san pral o baro Debleskro lab, penenn le: T'menge djal mishto an ko tsiro, hoy vella! Oun kolenge, kay djan pal pengro shero, penenn le: Kek bibarht vell pral t'mende.

Jeremia 23:17 ပူးပေါင်းရင်းမြစ်များ

2. Samuel 12:10

An tire jaka his miro lab tchi moldo, har lal tu tuke koi romjat fun o Urija, te well li tiri romni. Kanna well o charo ap tiro kheer gar buder krik lino.’

Jesaja 30:10

Ap i dikepangre penenn le: “Ma dikenn i dikepen.” Un ap o Debleskre rakepangre penenn le: “Ma penenn menge, hoi o Dewel tumende sikras un hoi tchatcho hi! Penenn menge kowa, hoi pes menge shukar an-shunell! Un sikrenn men sau koowa, har mari djia les kamenn.

Jesaja 57:21

Kek latcho koowa hi i tchilatchenge, penell miro Dewel.

Jeremia 13:10

Kalla tchilatche menshe, kai kamenn mire laba gar shunell, djan pal pengro shero, un djan wawar deblenge pal, anenn lenge viechen, un mangenn len an. Jon hunte wenn har ko pereskro pandepen, hoi buder tchi molella.

Jeremia 18:12

Jon penenn: “Na-a, hoske? Mer kamah jaake te djiwell, har mer kamah.” Un hakeno djal pal peskro shero un krell, hoi leskro tchilatcho dji leske penella.

Jeremia 18:18

Koi hi menshe, kai penenn: Awenn, te rakras koi pral, hawo tchilatchepen mer nai krah ap o Jeremia. Men hi doha rashaja, kai nai sikrenn men maro drom, un doha gosewe, kai nai penenn menge, hoi te kras, un doha Debleskre rakepangre, kai nai penenn menge o Debleskre laba. Mer tapras les leskre labentsa, un das tchi ap leskro rakepen!

Jeremia 3:17

An ko tsiro well o foro Jerusalem kharedo: O baro Debleskri beshepaskri. Un i tsele menshe wenn koi khetne. Un jon djan buder gar pal pengro shero un pengro tchilatcho dji.

Jeremia 4:10

Koi penom me: Baro Dewel, miro rai, tu chochral kol menshen an Jerusalem an, har tu penal, kai kek kurepen mashkral lende well. O charo hi koi un kamell len mulo te dell.

Jeremia 5:12

Jon penan chochepen pral o baro Debleste, un penan: ‘Kowa krell job gar! Jaake djungelo djal menge gar! Kurepen un bok well gar pash mende.

Jeremia 6:14

un krenn jaake, har te wans kol duka mire menshendar gar jaake pharo. Jon penenna: ‘Lauter hi mishto’, lauter hi mishto, ninna te hi tchi mishto.

Jeremia 7:24

Jon shunan gar ap mande, un lengre kanda pandan le, un djiwan pal lengro shero, un kran hoi lengro tchilatcho dji penella, un sikran mande pengro dumo, un gar pengro mui.

Jeremia 8:11

un krenn jaake, har te wans kol duka mire menshendar gar jaake pharo. Jon penenna: Lauter hi mishto, lauter hi mishto, ninna te hi tchi mishto.

Jeremia 9:14

Doleske penell o baro Dewel, ko rai pral o bolepen un i phub, kai o Israeleskro Dewel hi: Me dau kal menshen shutlo senlepen chapaske, un pani, kolestar merenn le.

Ropaskre gilja 2:14

Kolla, kai hunte penans tuke o Debleskre laba, penan tuke chocheno koowa glan-wi, hoi tchi moldo hi. Un sikran tuke gar tiri doosh. Kowa te krans le, perals gar jaake har kanna peral. Na-a, jon mukan tut chochene laba te shunell, un anan tut o tchatcho dromestar tele.

Ezekiel 13:10

Jon anenn mire menshen o tchatcho dromestar tele, un penenn: “Lauter hi mishto.” Un tchatchepah, tchi hi mishto. Mire menshe kran pen i massuri dran barra, hoi rikrenn gar. Un i rakepangre wan, un makan lat parnes.

Ezekiel 13:19

Tumaro durkepah anenn tumer ladj ap mande glan mire menshende, te lenn i wast pherdo djob un i kotar maro. Mire menshenge penenn tumer chochene laba. Un jon kamenn te shunell ap chochepen. Tumaro chochepah anenn tumer sawe menshen an o merepen, kai hunte merans gar, un krenn, te atchenn sawe djido, kai hunte merans.

Ezekiel 13:22

Tumare chochene labentsa dukran i djia kolendar, kai an o tchatchepen djiwenn, un kolenge kamom kek daar te krell. Un tumer kran i wasta kolendar sorelo, kai tchilatcho koowa krenn. Jaake kran tumer, te djan le gar tele lengro tchilatcho dromestar, te atchenn le djido.

Amos 9:10

I tsele tchilatche mire menshendar hunte merenn an o kurepen, lauter kolla, kai penenn: Koi bibacht atchell dur mendar un taprell men gar.

Micha 2:11

Te woms me i mursh, kai nashell o ducho palla, un rakroms o chochepen, un me penoms: “Pijenn bud mool un wawar pipen!” Palle penans tumer mandar: “Hawo latcho rakepaskro hi kau mursh!”

Micha 3:11

Tumare tchatchepangre mursha mukenn pen te makell. Tumare rashaja lenn lowe koleske, hoi le i menshenge penenn. Un i lowenge penenn o Debleskre rakepangre, glan-wi, hoi wella. Un tumer penenn: “O baro Dewel hi ap mari rig. Kek bibacht nai well pral mende.”

Micha 3:5

Kawa penell o baro Dewel ap i rakepangre, kai penenn, te well len i lab o baro Deblestar, un kowa hi gar jaake. Jon chochenn i menshen un penenn kolenge, kai denn len chapaske: Halauter well mishto tumentsa! Kolenge, kai denn len tchi te chal, penenn le: I tchilatcho tsiro well pral tumende.

Zefanja 1:12

An ko tsiro wella jaake, kai lau i momeli un rodau an o foro Jerusalem lauter kolen, kai djiwenn i shukar djipen un djinenn kek daar, un kai penenn an pengre djia: O baro Dewel krell menge tchi, kek latchepen, witar kek tchilatchepen.

Zakarie 10:2

Ma putchenn i khereskre deblen! Kowa, hoi jon rakrenn, hi dinelo koowa. Ma djan pash i durkepangre! Kowa, hoi jon glan-wi penenna, hi chochepen. Lengre sunja hi tchi moldo. Lengre latche laba hi gar tchatcho. Doleske nashrenn pen i menshe har bakre, kolen kek bakrengro hi, un kai merenna.

Maleachi 1:6

O baro Dewel, ko rai pral o bolepen un i phub, penell: I tchawo hunte hadell peskro dades, un i budepaskro hunte dikell pre ap peskro rajeste. Me hom tumaro dad – hoske hadenn man gar? Me hom tumaro rai – hoske dikenn gar pre ap mande? Tumer rashaja, tumer dikenn tele ap mande. Un tumer putchenn: Hoi kram, kai peneh ‘tumer dikan tele ap mande?’

4. Mose 11:20

Kowa djal jek tchon, bis te nai sungenn les buder gar, un kowa dran tumaro nak win well. Tumer tchiwan o baro Debles ap i rig, koles, kai mashkral tumende hi. Un tumer rowan glan leste un penan: ‘Hoske djam mer dran o them Egiptia?’ Doleske well kau koowa kanna ap tumende.”

Louka 10:16

Pale penas o Jesus ap peskre malende: “Koon ap tumende shunella, kowa shunella ap mande. Un koon shunell gar ap tumende, kowa shunell witar gar ap mande. Kowa, kai shunell gar ap mande, kowa shunell ninna gar ap koleste, kai bitchras man.”

5. Mose 29:18

Kek te well mank tumende kau diwes, kai shunell har kau praassepen win rakedo well, un penell koi pashel an peskro dji: “Kowa hi gar mange. Mange djal mishto, ninna te djau pal miro shero.” Kowa wals djungeles tumenge halauterenge, i latchenge har i tchilatchenge.

5. Mose 29:19

Ap saweste dikell o baro Dewel gar latches, na-a, pral koleste chatchell leskro dji i choljatar. Un ko tselo praassepen un i tseli bibacht, hoi an kau liil tchinlo hi, well ap leste tchiddo. Un o baro Dewel krell, te well job un leskri familja bistedo ap i tseli phub.

1. Tessalonikarja 4:8

Koon kamell kol laba gar te shunell, kowa tchiwell o Debles ap i rig, un gar i menshes. Un o Dewel hi kowa, kai das peskro Ducho an tumende.

1. Samuel 2:30

Doleske penell o baro Dewel, kai o Israeleskro Dewel hi: Tchatchepah, me penom, te wenn i mursha dran tiro kheer un dran tiro dadeskro kheer hako tsireske rashaja glan mande. Kanna penau, kowa kamau buder gar. Me krau kolen baro, kai man bares krenna. Un kowa, kai ap mande tchi della, ap koleste well witar tchi dino.