Jeremia 22:13 - O Debleskro Drom 2021 (Sinte)

¹³ Bibacht ap koleste, kai krell peskro kheer chochepah, un djal gar pal o tchatchepen, te krell lo peskro kheer bareder un shukeder! Un mukell peskre budepangre tchitcheske te budrell, un dell len kek lowe.

O Debleskro Lab 2024 (Sinte-Manouche)

¹³ Bibarht ap koleste, kay krell peskro kheer rhorhepah, oun djal gar pal o čačepen, te krell lo peskro kheer bareder oun shoukeder! Oun moukell peskre boudepangre čičeske te boudrell, oun dell len kek love.

Jeremia 22:13 ပူးပေါင်းရင်းမြစ်များ

2. Familjakro liil 36:4

Un o baro rai pral o them Egiptia kras, te well o Josijeskro tchawo, o Eljakim, baro rai pral Juda un Jerusalem. Un das les i wawar lab un kharas les Jojakim. Leskro phrales, o Joahas, las o Necho peha, un anas les an o them Egiptia.

2. Familjakro liil 36:5

Har was o Jojakim baro rai, his lo 25 (biish-te-pantch) bersh phuro. Un job his 11 (deesh-te-jek) bersh baro rai an o foro Jerusalem. Un job kras, hoi tchilatcho his glan i jaka o baro Deblestar, kai leskro Dewel his.

Hiob 31:39

te chom ko djob, un plaissrom koleske tchi, un mukom i hachen i bokatar te merell,

Jesaja 5:8

Djungelo djal kolenge, kai krenn pen jek kheer pal o wawar, un ginenn penge jek kotar phub pal o wawar, bis te buder kek kotja phub pral atchenn, un lenge kokres o tselo them hi.

Jeremia 17:11

Har i diwji kachni, kai beshell pes ap i jare, kai gar lakre hi, jaake djal koleske, kai lell peske brawlepen khetne chochepah. An o feteder tsiro nashrell lo peskro brawlepen, un hi koi tardo har i narwelo.

Jeremia 22:18

Doleske penell o baro Dewel pral o Jojakim, ko baro rajeste pral o them Juda, koleskro dad o Josia his: Te merell job, rowenn le gar pral leste. Kek penell: Mo phraal, mo pheen, hoske hunte meras lo? Witar gar penenn le: Maro rai, i pralstuno, hunte meras!

3. Mose 19:13

Tu rikress gar o wawares tele un randess les gar win. Tu dess i budepaskres, kai budrell tuke jek diwes peskre lowe ap i rat, un rikress kol lowe gar pral i rat pash tute.

Micha 3:10

Tumer krenn o Debleskro foro Jerusalem shukar un baro kol lowentsa, hoi anan khetne marepah un chochepah.

Habakuk 2:12

Djungeles djal tuke, kai kral i foro o rateha, un tchiwal les pre o marepah!

Maleachi 3:5

Un me kamau pash tumende te well, te wap tumaro tchatchepaskro rai. Un mange nai patsenna, me rakrau o tchatchepen win pral i menshende, kai hadenn man gar: kolla, kai durkrenna, kol mursha, kai chochran pengri romjat, un kol djuwja, kai chochran pengri romes, kolla, kai phagenn pengri sowel, un kolla, kai djan djungeles kolentsa trujel, kai budrenn lenge, un kolla, kai chochenn kol djuwjen, kolengro rom meras, un kolla, kai chochenn kol tchawen, kolen buder kek dad hi, un kolla, kai rikrenn kol wi-themarjen tele, kai djiwenn mashkral tumende. Ko penell o baro Dewel, ko rai pral o bolepen un i phub.

5. Mose 15:13

Un te mukeh les te djal, palle hunte djal lo gar wastentsa, kai tchi dren hi.

Jakobo 5:4

Shunenn! Tumer chochran tumare budepangren, kai budran ap tumaro them, un dan len kek lowe. Kolla denn gole ap o bolepen. Lengri gole shunell o Dewel, ko rai pral o bolepen un i phub.