Jeremia 18:18 - O Debleskro Drom 2021 (Sinte)

¹⁸ Koi hi menshe, kai penenn: Awenn, te rakras koi pral, hawo tchilatchepen mer nai krah ap o Jeremia. Men hi doha rashaja, kai nai sikrenn men maro drom, un doha gosewe, kai nai penenn menge, hoi te kras, un doha Debleskre rakepangre, kai nai penenn menge o Debleskre laba. Mer tapras les leskre labentsa, un das tchi ap leskro rakepen!

O Debleskro Lab 2024 (Sinte-Manouche)

¹⁸ Koy hi menshe, kay penenn: Avenn, te rakras koy pral, havo čilačepen mer nay krah ap o Yeremia. Men hi doha rashaya, kay nay sikrenn men maro drom, oun doha goseve, kay nay penenn menge, hoy te kras, oun doha Debleskre rakepangre, kay nay penenn menge o Debleskre laba. Mer tapras les leskre labentsa, oun das či ap leskro rakepen!

Jeremia 18:18 ပူးပေါင်းရင်းမြစ်များ

2. Samuel 15:31

Un har o Davideske penlo was, kai o Ahitofel ap o Absalomeste rikrell, penas job: “Baro Dewel, kre te patsell hakeno, kai kowa, hoi o Ahitofel penell, dinlepen hi!”

2. Samuel 17:14

Koi penas o Absalom un hakeno an Israel: “Kowa hoi o Hushai penas, hi feteder har kowa, hoi o Ahitofel penas.” Jaake kras o baro Dewel, kai kek kowa kras, hoi o Ahitofel an leskro goswepen penas. O baro Dewel kamas i bibacht pral o Absalom te anell.

1. Rajengro liil 22:24

Kote was o Zedekja pashel, koleskro dad o Kenaan his, un das o Micha i tchamedini, un penas: “Hoi rakreh? Patseh, o ducho o baro Deblestar djas peske mandar, un rakrell kanna kokres tuha?”

2. Familjakro liil 24:21

Koi rakran le pen mank pende tele, te marenn le les, un witsran les i barrentsa mulo ap i glanstuni platsa glan o baro Debleskro kheer. Jaake penas les lenge o baro rai, o Joash.

Hiob 5:13

Job taprell i gosewen an pengro goswepen. Un kowa, hoi kolla dui tchipjentsa mank pende win kran, kowa mukell lo gar te djal.

Debleskri gili 21:11

Kek lengre tchawendar atchenn djido, gar jek lendar atchell ap kai phub.

Debleskri gili 52:2

har o Doeg, ko mursh dran o them Edom, pash o Saul was, un leske penas: “O David hi pash o Ahimelech.”

Debleskri gili 57:4

Dran o bolepen mu well lo mange ap i rig, un lell man win dran o praassepen kolestar, kai man palla lell. O Dewel mu sikrell man, te hi lo mange latcho, un te rikrell lo pash mande.

Debleskri gili 64:3

Kol tchilatche wenn khetne un rakrenn, har jon nai krenn mange tchilatchepen. Khate man, miro Dewel, glan lengri choli!

Gosewe laba 18:21

Kol laba, hoi jek rakrell, nai anenn leske o merepen un ninna o djipen. Un kowa, kai bud rakrell, dikella, hoi leskre laba leske dren anenn.

Jesaja 32:7

O chocheno djal chochene dromma. Tchilatcho koowa lell lo peske glan, un leskro chochepah anell lo doosh ap i tchorwelende, ninna te hi kolla an o tchatchepen.

Jeremia 1:19

Ninna te tchingrenn le tuha, nai krenn le tuke tchi. Me hom pash tute, te lap tut dran lengre wasta win. Kowa penau me, o baro Dewel.

Jeremia 11:19

Me homs har i terno bakro, kai djinell gar, te well lo kote anlo, kai well lo maredo. Jaake djinom gar, kai rakran le khetne, har te krenn le mange tchilatchepen. Jon penan mandar, har te woms i ruk: Mer dah ko ruk tele, jaake rah har hi lo sasto. Maras les, te well lo bistedo!

Jeremia 18:11

Un kanna Jeremia, pen kol menshenge an Juda un kolenge, kai djiwenn an Jerusalem: Kowa penell o baro Dewel: Djinenn, man hi an o dji, te dap tumen i phagi, un kamau bibacht pral tumende te anell. Doleske djan tele hakeno peskro tchilatcho dromestar! Un djiwenn i wawar djipen!

Jeremia 18:19

Baro Dewel, de garda ap mande, un shun, hoi kolla rakrenna, kai ap mande tchingrenna!

Jeremia 2:8

Tumare rashaja putchan gar: ‘Kai hi o baro Dewel?’ Har penan le i menshenge, hoi te krenn le, rikran le pen gar ap mire laba. Un kol pralstune pral mire menshende hadan pen pral mande, un shunan buder gar ap mande. Un mire rakepangre, kai hunte penans mire laba dureder, rakran an o lab ko chocheno deblestar Baal, un mangan figuren an, kai kek dewel hi.

Jeremia 20:10

Me shunau, har bud menshe tchorchanes rakrenna: “Job krell menge tchi har traash. Anas doosh ap leste! Sikras les an!” Ninna mire mala lurenn koi pre, te perap. “Dikas, te anas les jaake dur, te penell job tchomone, hoi gar mishto hi. Palle dah les pale, hoi lo mentsa kras!”

Jeremia 26:11

Un i rashaja un i chochene rakepangre penan ap i pralstunende un i wawar menshende, kai hi koi: “Kau mursh hunte merell; job rakras djungeles pral kau foro, har shunan tumer tumare kandentsa.”

Jeremia 37:13

Har job pash o Benjamineskro Wudar was, his kote i lurdo, kai das garda, koon dren te win nashella. Kowa kharas Jirija, leskro dad his o Shelemja, koleskro dad his o Hananja; o Jirija das garda ap ko wudar, un rikras o Jeremijes peske wastentsa pre, un penas: Tu kameh pash i Babilonarja wergel te nashell.

Jeremia 43:2

rakran pre-phurde mursha leha – mank lende his o Asarja, koleskro dad o Hoshaja his, un o Johanan, koleskro dad o Kareach his – un penan ap leste: Tu chocheh! Maro baro Dewel bitchras tut gar pash mende, te peness menge: “Ma djan an o them Egiptia, un ma djiwenn kote!”

Jeremia 44:16

Kol laba hoi tu menge an o baro Debleskro lab peneh, ap kolende kamah mer gar te shunell.

Jeremia 44:17

Mer kamah kowa te rikrell, hoi mer penam, un koi bolepaskri rajetsake sungepaskro koowa te chatchrell, un lake mool win tchorell. Kowa kram mer, un kran mare phure, mare bare raja un pralstune an i forja o themestar Juda un an i dromma o forestar Jerusalem. Har kowa kram, his men ninna doha maro, un menge djas mishto, un mer dikam kek bibacht.

Jeremia 8:8

Har nai penenn tumer: ‘Mer ham gosewo. Men hi o baro Debleskro lab pash mende.’ Chochepen hi kowa lauter, hoi kol sikepangre dran kowa krenna.

Ropaskre gilja 3:62

Tu shunal o rakepen kolendar, kai hadenn pen ap mande, un hoi le pal o wast pral mande rakrenna o tselo diwes.

Ezekiel 7:26

Bibacht pal bibacht well. Pale te pale shunenn le, hawo djungelo koowa was. Tchitcheske djan le pash o Debleskre rakepangre, un putchenn lendar, hoi o baro Dewel sikras len. Witar gar i rashaja nai penenn lenge, hoi te krenn le. Un i phureder djinenn kek drom win dran o merepen.

3. Mose 10:11

Un hunte sikrenn i Israelende ko tselo koowa, hoi me, o baro Dewel, lendar kamau, halauter hoi me o Moseske penom, un job lenge dureder penas.”

Micha 3:6

Doleske well pral tumende kali rati. Tumer dikenn buder kek dikepen. Kek lab o Deblestar well tumen. O kham djal tele tumenge, un o diwes hi tumenge har i rati.

Micha 3:7

Un i dikepangre hunte ladjenn pen, un i durkepangre wenn sapaske. Kek lab o Deblestar hi pash lende. I ladjatar hunte rikrenn le halauter i diklo glan pengro mui.

Maleachi 2:7

Kowa hi i rashajengri budi: Jon hunte penenn o Debleskro lab an o tchatchepen, te nai djan i menshe pash lende, te kamenn le te djinell, hoi o baro Dewel lendar kamella. I rashaja hi i bitchepangre o baro Deblestar, ko rajestar pral o bolepen un i phub.

Louka 11:45

Koi penas i biboldengro tchatchepaskro: “Sikepaskro, te peneh tu kal laba, praasseh tu men ninna.”

Johanni 9:40

Kowa shunan i Farisarja, kai his kote pashel tardo. Kolla putchan lestar: “Ham mer ninna korelo?”