Jeremia 17:8 - O Debleskro Drom 2021 (Sinte)

⁸ Kowa hi har i ruk, kai pash o pani tardo hi, un tchiwell peskre draba an o pani. Ninna te well o baro tatepen, hi les kek traash. Leskre patria atchenn senelo. Te well i bersh, kai dell kek brishin, hunte well les kek daar. Job mukell gar tele, te hidjrell lo rukengre.

O Debleskro Lab 2024 (Sinte-Manouche)

⁸ Kova hi har i rouk, kay pash o pani tardo hi, oun čivell peskre draba an o pani. Ninna te vell o baro tatepen, hi les kek traash. Leskre patria ačenn zenelo. Te vell i bersh, kay dell kek brishin, hounte vell les kek daar. Yob moukell gar tele, te hidjrell lo roukengre.

Jeremia 17:8 ပူးပေါင်းရင်းမြစ်များ

Hiob 29:19

Me homs har i ruk, koleskre draba djan bis pash o pani, un koleskre kashta wenn sapeno haki rat.

Hiob 8:16

I mensho kek Debleha hi har senlepen, koles doha pani hi, glan te djal o kham pre, un hoi buchles well, un djal pral i tseli baar.

Debleskri gili 1:3

Kowa hi har i ruk, hoi tardo hi pash o pani. Ap o tchatcho tsiro wenn leskre rukengre baro. Un leskre patria atchenn senelo. Lauter, hoi job krella, djala mishto.

Gosewe laba 11:28

Kowa, kai tchiwell peskro dji ap peskro brawlepen, merell tele har patria. Kolenge, kai krenn o tchatchepen, djal mishto har i senelo ruk.

Jesaja 58:11

Un hako tsireske sikrell tut o baro Dewel tiro drom. Ninna te djiweh an o mulo tato them, dell lo tut doha djipaske, un dell tut newi soor. Palle hal tu har i baar, kolat hako tsiro doha pani hi, awa, har i pani, hoi dran i phub pre djal, un koleskro pani hako tsiro nashell.

Jesaja 61:3

Un kolla an o foro Zion, kolengre djia rowenn, hunte wenn buder gar beshdo an i jagakri tchik un rido an gone. Na-a, me dau len werklia, te krenn le pen shukar, un sungepaskro djet. Lengre djia te giwenn un atchenn buder gar phagedo. Un jon wenn kharedo: ‘Bare ruka, hoi anenn sharepen o Debleske’, un ‘Ruka, hoi o baro Dewel peske an i phub tchiwas’, te well leskro railepen diklo.

Jeremia 39:18

Me kamau te djiwess, un te wess gar o chareha maredo. Tu patsal mange. Doleske krau, te nai nasheh tuke. Tiro djipen atchell tuke. Kowa penell o baro Dewel.

Ezekiel 31:3

Tu hal har o them Assur his – har i baro zedertikro ruk ap i berga Libanon shukar buchle senele kashtentsa, kai nai khatrenn le pen tel lende glan o kham. Un job his jaake baro, te djas lo dureder pral har i wawar ruka an o weesh.

Ezekiel 47:12

Ap kol dui rigja o lengsto panjestar hi ruka tardo. Kolla hi o tselo bersh senelo, un hidjrenn hako tsiro rukengre. Hako tchon wenn newe rukengre bares. Ko lengsto pani, kolestar jon pani lenn, well win dran o Debleskro kheer. Lengre rukengre hi o chapaske. Un lengre patria krenn i nasselen sasto.