Jeremia 17:27 - O Debleskro Drom 2021 (Sinte)

²⁷ Te shunenn tumer gar ap mande, un djiwenn ap o Debleskro diwes har ap hako wawar diwes, un hidjrenn tumaro koowa ap o Debleskro diwes dren an kol wudja o forestar Jerusalem, palle tchiwau me jag an kol wudja, te chatchrenn i sorele khera pre an Jerusalem. Un kek nai krell koi jag win.

O Debleskro Lab 2024 (Sinte-Manouche)

²⁷ Te shounenn t'mer gar ap mande, oun djivenn ap o Debleskro dives har ap hako vavar dives, oun hidjrenn t'maro koova ap o Debleskro dives dren an kol voudya o forestar Yerusalem, palle čivau me yag an kol voudya, te rhačrenn i zorele khera pre an Yerusalem. Oun kek nay krell koy yag vin.

Jeremia 17:27 ပူးပေါင်းရင်းမြစ်များ

2. Rajengro liil 22:17

I menshe an Jerusalem mukan man un anan wawar deblenge viechen, te choirenn le man halautereha, hoi le pengre wastentsa kran; doleske well miri choli har i jag ap kau foro, un kek nai krell les win.”

2. Rajengro liil 25:9

Un job chatchras o baro Debleskro kheer tele, ninna ko kheer o baro rajestar un kol wawar khera an o foro Jerusalem; awa, hako baro kheer chatchras lo tele.

2. Familjakro liil 36:19

Kol lurde dran o them Babilonia chatchran o baro Debleskro kheer un phagan o foreskre massurja tele. Un i tsele turme chatchran le i jagatar win. Un jaake was lengro tselo kutch koowa chatchedo an i jag un buder tchi moldo.

Debleskri gili 122:7

Kek kurepen te well an tute! An tire shukar khera te well brawlepen!”

Jesaja 1:20

Kamenn tumer gar te shunell, un pandenn tumare djia glan mande, palle wenn o chareha mulo dino. Kowa penau me, o baro Dewel!”

Jesaja 1:31

Un ko mursh, hoi sorelo his har i ruk, well har mulo kasht. Un ko sorelo koowa, hoi lo kras, well har i jag, hoi ko mulo kasht pre chatchell. Jaake djal lauter an i jag pre, un kek nai krell koi jag win.

Jeremia 17:24

Te shunenn tumer kanna ap mande, penell o baro Dewel, un hidjrenn ap o Debleskro diwes tchi dren an wudja kau forestar, un rikrenn ko diwes dren un budrenn gar ap ko diwes,

Jeremia 17:4

Un tumer hunte djan dran kau them, hoi dom tumen hako tsireske. Un me krau, te wenn tumer budepangre kolenge, kai rikrenn tumen tele an i them, kai prindjrenn gar. Miri choli hi har i jag, hoi gar buder win djala.

Jeremia 18:1

O baro Dewel rakras ap o Jeremia un penas:

Jeremia 21:12

Tumer dran o Davideskri familja! Kowa penell o baro Dewel: Hako diwes, te rakrenn o tchatchepen win, denn jak, te lell hakeno peskro tchatchepen! Un lenn kolen, kai wan tele rikedo, dran kol tchilatchengre wasta win! Te krenn kowa gar, well miri choli pral tumende, har i jag, kai nai krell kek win. Tumer kran jaake bud tchilatchepen!

Jeremia 21:14

Me hom kowa, kai wau pash tumende, un dau tumen i tchatchi phagi koleske, hoi kran, penell o baro Dewel. Me tchiwau i jag an tumaro weesh, te chatchrell lauter tele.

Jeremia 22:5

Te shunenn tumer gar ap kal laba, well kau kheer paash dino. Kowa dom man sowel pash mande kokres, penell o baro Dewel.

Jeremia 32:29

Un kol lurde dran o them Babilonia, kai trul kau foro tardo hi, wenna dren, un chatchrenn kau foro tele kol tsele kherentsa, kai was ap i dache sungepaskro koowa chatchedo o chocheno debleske Baal, un mool win tchoredo kol wawar chochene deblenge. Doleske was i choli an mande.

Jeremia 39:8

Kol lurde dran Babilonia chatchran o baro rajeskro kheer un kol tsele menshengre khera an o foro Jerusalem, un dan o foreskre massurja tele.

Jeremia 44:16

Kol laba hoi tu menge an o baro Debleskro lab peneh, ap kolende kamah mer gar te shunell.

Jeremia 49:27

Me tchiwau jag ap i massurja o forestar Damaskus, te wenn i brawele khera, kai o Ben-Hadad djiwas, pre chatchedo.

Jeremia 52:13

Un job chatchras o baro Debleskro kheer tele, ninna ko kheer o baro rajestar un kol wawar khera an o foro Jerusalem; awa, hako baro kheer chatchras lo tele.

Jeremia 6:17

Ninna dom tumen menshen, kai denn jak ap tumende. Denn garda koi pre, te phurdenn le i phurdepaskri, hoi sikrella: Bibacht wella … Jon penan: Mer kamah len gar te shunell.

Jeremia 7:20

Doleske penell o baro Dewel, maro rai: Miri bari choli well pral kau foro, pral i menshende un pral i viechende, pral kol ruka an o weesh un pral ko djob an kau them. Miri choli hi har i jag, hoi kek nai krell win.

Ropaskre gilja 2:6

Job phagas peskro kheer tele, har te wals lo i kashteno kheer an i baar, un kras koi platsa paash, kai wam khetne glan leste. Job kras, te well buder kek an o foro Zion ap i bare diwessa un ap o Debleskro diwes. An peskri soreli choli tchiwas lo o baro rajes un i rashajen pale.

Ropaskre gilja 4:11

O baro Dewel mukas peskri tseli choli win te well. Leskri tseli choli was pral lende. Un an o foro Zion mukas lo i bari jag te well, te chatchras o foro tele bis ap i telstune barra.

Ezekiel 16:41

Un tire khera chatchrenn le an i jag pre, un denn tut tiri phagi glan i jaka bud djuwjendar. Jaake krau, te nai lubreh buder gar trujel, un nai gineh tuke buder kek pirnes.

Ezekiel 21:15

Mishto tchinell lo. te marell lo bud menshen. Un djudjo kerdo hi lo, jaake djudjo har i blendari. Ma penenn: “Mer nai wah bachteles. Maro rai sal pral i tsele wawar rajende.”

Ezekiel 21:3

Pen leske: Kawa penell o baro Dewel, maro rai: Shun, hoi tuke penau! Me krau i jag an tute, koja chatchrell hako ruk, hoi senelo hi un koles, hoi truk hi. Kek nai krell koi jag win. Koja djal dureder an o tselo them, jek rigjatar ap i wawar. Un o tatepen chatchrell hakeneske peskro mui.

Ezekiel 22:8

Kowa, hoi mange kutch hi, hi tumenge tchi moldo. Un an kol diwessa, hoi mange hi, budrenn tumer.

Ezekiel 23:38

Un kawa hi gar lauter, hoi le kran: Ap ko emligo diwes, har maran le pengre tchawen o chochene deblenge, wan le an miro kheer, un jaake kran le miro kheer pale-tchiddo. Un kol diwessa, kai mange hi, rikran le buder gar dren. Awa, sawo koowa hi, hoi kran le an miro kheer!

Hosea 8:14

I Israelitarja bistran koles, kai kras len. Jon krenn penge bare shukar khera. Un i menshe an o them Juda krenn penge sorele forja. Me, o baro Dewel, witsrau i jag an lengre forja, hoi lengre khera pre chatchrell.

Amos 1:10

Me bitchrau i jag ap i massurja trul o foro Tirus, hoi chatchrell leskre sorele khera tele.

Amos 1:12

Me bitchrau i jag an o foro Teman, un chatchrau i sorele khera tele an o foro Bozra.

Amos 1:14

Me bitchrau i jag ap i foreskre massurja o forestar Rabba, hoi chatchrell leskre sorele khera tele, ap ko diwes, kai well o kurepaskri gole dino, un o kurepen win phagell har i baro phurdepen.

Amos 1:4

Me bitchrau i jag an i shukar khera, hoi o rai Hasael peske kras. Un chatchrau i sorele khera tele, kai o baro rai Ben-Hadad djiwas.

Amos 1:7

Me bitchrau i jag ap i massurja trul o foro Gaza, hoi chatchrell leskre sorele khera tele.

Amos 2:2

Me bitchrau i jag an o them Moab, un chatchrau kol sorele khera tele an o foro Kerjot. I menshe an o them Moab merenna an o diwjo kurepen pash i gole, hoi i lurde un i phurdepangre denna.

5. Mose 32:22

Miri choli chatchell pre har i jag, un chatchrell i tseli phub, un halauter, hoi ap late bares was, un chatchell tele bis an o telstunepen, un well bis tele pash i berge.

Hebrearja 12:25

Denn jak, te shunenn ap o Debleste, kai ap tumende rakrella! Har job ap i phub ap i phure Israelitarja rakras, kaman le gar ap leste te shunell, un leskri choli was pral lende. Kitse budeder well o Debleskri choli pral mende, te shunah gar ap leste, kai dran o bolepen rakrella.