Jeremia 16:13 - O Debleskro Drom 2021 (Sinte)

¹³ Doleske tradau me tumen dran kau them win an i them, kai prindjrenn tumer gar un kai prindjran tumare phure witar gar. Kote hunte wenn wawar deblenge koi ap o diwes un ap i rati; me krau miro dji tumenge pandlo.

O Debleskro Lab 2024 (Sinte-Manouche)

¹³ Doleske tradau me t'men dran kava them vin an i them, kay prindjrenn t'mer gar oun kay prindjran t'mare phoure vitar gar. Kote hounte venn vavar deblenge koy ap o dives oun ap i rati; me krau miro dji t'menge pandlo.

Jeremia 16:13 ပူးပေါင်းရင်းမြစ်များ

2. Rajengro liil 25:21

Un o baro rai pral o them Babilonia mukas len temerl te dell an o foro Ribla an ko kotar them, hoi kharell Hamat. Jaake wan i menshe dran o them Juda krik anlo dran pengro them.

2. Familjakro liil 7:20

palle tradau me i Israelitarjen win dran lengro them, hoi me len dom. Un kau kheer, hoi mange win rodom, te wap kote an-mangedo, kolestar kamau tchi buder te djinell. Un i menshe an i tsele wawar themma rakrenn un sanenn pral leste.

Debleskri gili 81:12

Mire menshe shunan gar ap mande. O Israel kamas man gar.

Jeremia 10:18

O baro Dewel penell: Kau kopo kamau me kal menshen krik tradell dran lengro them, te wenn jon an i traash, un lenn bare duka.

Jeremia 14:8

Ap tute dikenn i Israelitarja, te wess ap lengri rig, un leh len win dran kai bibacht. Hoske kreh tu, har te wals i wi-themari an maro them, un har jek, kai atchell jek rati un djal palle dureder?

Jeremia 15:1

Un o baro Dewel penas ap mande: Ninna te wals o Mose un o Samuel glan mande tardo, kroms me kal menshenge miro dji gar pre. Trade len krik mandar, un muk len te djal!

Jeremia 15:14

Un me kamau, te wess tu i budepaskro kolenge, kai rikrenn tut tele an lengro them – i them, hoi tu gar prindjreh. Miri choli chatchell har i jag, un well pral tute.

Jeremia 15:4

I tsele menshe ap i phub denn i wasta pral o shero khetne, te dikenn jon kowa. Koja hi koi phagi koleske, hoi ko baro rai Manasse an Jerusalem kras. Leskro dad hi o Hiskija, ko baro rai pral Juda.

Jeremia 16:5

O baro Dewel penas ap mande: Tu djas an kek kheer, kai rowenn le pral jekeste, kai meras. Tu rowess gar lentsa, witar gar peness lenge latche laba; me hom buder gar i maal kal menshendar, hom lenge buder gar latcho, un krau miro dji lenge pandlo. Kowa penell o baro Dewel.

Jeremia 17:4

Un tumer hunte djan dran kau them, hoi dom tumen hako tsireske. Un me krau, te wenn tumer budepangre kolenge, kai rikrenn tumen tele an i them, kai prindjrenn gar. Miri choli hi har i jag, hoi gar buder win djala.

Jeremia 22:26

Un me tradau tut un tiri dat an i wawar them, kai gar khere han. Kote merenna tumer dui.

Jeremia 22:28

Jek nai penals: Hoske kreh tu ko mursheha Konja jaake har i khoreha, hoi an kotja dino was, un hoi kek kamell? Hoske well job un leskre tchawe krik tradedo, un sorjah an i wawar them anlo, hoi prindjrenn le gar?

Jeremia 5:19

Un te putchenn jon: Hoske krell maro baro Dewel kowa menge lauter?, hunte peness tu lenge: Jaake har tumer mandar krik djan, un wan wawar deblenge koi an tumaro them, jaake hunte budrenn tumer wawar menshenge an i them, kai gar tumaro hi.

Jeremia 6:15

Jon hunte ladjans pen ko djungelo koweha, hoi jon kran. Kowa krenn le gar. Jon ladjenn gar. Jon djinenn gar, hoi ladj hi. Doleske wenn jon maredo khetne kol wawarentsa. Te wau me, un dau len i phagi, atchell kek lendar djido, penell o baro Dewel.

5. Mose 28:36

O baro Dewel tradell tumen un ko rajes, koles tumer pral tumende tchiwan, pash i menshende an i wawar them, kai tumer an kek tsiro djiwan, witar gar tumare phure. Un kote mangenn tumer un barrengre deblen an.

5. Mose 29:28

Kowa hoi khatedo hi, djinell kokres maro baro Dewel. Mende sikras lo, hoi lo mendar kamell, te djiwas mer pal kal tsele laba, hoi an kau tchatchepaskro liil tchinlo hi. Kowa hi menge un mare tchawenge hako tsireske.