Jeremia 14:10 - O Debleskro Drom 2021 (Sinte)

¹⁰ Jaake penas o baro Dewel kal menshendar: Jon nashenn jek rigjatar ap i wawar, jaake har kamenn le. Doleske dikell o baro Dewel gar latches ap lende. Leske well an o shero, hawo tchilatcho koowa jon kran. Un lengri doshake dell job len i phagi.

O Debleskro Lab 2024 (Sinte-Manouche)

¹⁰ Yaake penas o baro Devel kal menshendar: Yon nashenn yek rigyatar ap i vavar, yaake har kamenn le. Doleske dikell o baro Devel gar lačes ap lende. Leske vell an o shero, havo čilačo koova yon kran. Oun lengri doshake dell yob len i phagi.

Jeremia 14:10 ပူးပေါင်းရင်းမြစ်များ

1. Rajengro liil 17:18

Kote penas joi ap o Elija: “Hoske kral tu kowa mantsa, Debleskro mursh? Tu wal pash mande, te was miri doosh an o Debleskro shero. Doleske hunte meras miro tchawo.”

Debleskri gili 119:101

Hako tchilatcho dromestar rikrom mire herja pale, te rikrap tiro lab.

Debleskri gili 95:10

Star-deesh bersha was mange djungeles, te dikom ap kol menshende, un penom: “Kalla hi menshe, kai peran ap pengre sherja un djinenn gar, hoi tchatcho hi. Ap miro drom kamenn le gar te djal.”

2. Mose 32:34

Un kanna dja pale! An kol menshen an ko them, kai me rakrom lestar. Miro bolepaskro djal glan tute. Te well miro tsiro, dau i Israelitarjen pengri phagi.”

Jeremia 2:36

Har sik djal tu kai te koi, te rodess tuke menshen, kai krenn pen tuha khetne? O them Egiptia nai well tut gar feteder ap i rig har o them Assur.

Jeremia 3:13

Tu hunte kress tchi, har te dikess dren, kai anal doosh ap tute, har hadal tut pre pral o baro Debleste, kai tiro Dewel hi. Tu nashal kai te koi trujel, te mangess wawar deblen an tel hake senele ruka, un shunal gar ap mire laba, penell o baro Dewel.

Jeremia 31:34

Kek hunte penell ap o wawareste: Tu prindjress o baro Debles. Halauter djinenn, koon me hom, i tikne un i bare. Kowa penau me, o baro Dewel. Me bistrau koi doosh, hoi le ap pende anan, un lengro tchilatchepen well buder gar an miro shero.

Jeremia 6:20

Me putchau tchi pal o sungepaskro koowa dran o them Saba, un pal ko gudlo sungepaskro djet, hoi well dran i dur them. Kol vieche, hoi tumer mange chatchrenna, kamau me gar. Un ap kol vieche, hoi tumer mange marenna, dikau gar latches.

Jeremia 8:5

Hoske nashrenn pen kal menshe an o foro Jerusalem pale te pale, un rissrenn gar trujel? Jon atchenn pash kol chochene deblende, un kamenn gar palpale pash mande te well.

Ezekiel 29:16

Jon wenn gar buder kolla, pash kolende i Israelitarja nashenn un lendar putchenn, te wenn le lenge ap i rig. Har le kowa kran, anan le bari doosh ap pende. Kowa hunte bistrenn le gar. Palle dikenn un haiwenn le, te hom me o baro Dewel, lengro rai.

Hosea 11:7

Mire menshe atchenna krik mandar, un kamenn gar pash mande te well. Ninna te wenn le pash mande, o pralstuneste, hadenn le man gar.

Hosea 11:9

Me kamau gar jaake te krell, har mange les miri tati choli penella. Un kamau gar te dap o Efrajimes pale pre. Me hom o Dewel, un kek mensho. Me, ko jek tchatcho Dewel, hom mank tumende, un wau gar, te marap tumen.

Hosea 7:13

Bibacht ap lende! Jon djan mandar krik! Merepen pral lende! Jon peran mandar tele! Me kamoms len dran i bibacht te lell, un jon rakrenn chochepen pral mande.

Hosea 7:2

Un kowa djal gar an lengro shero dren, te djinau me lengro tselo tchilatchepen. Lengro tchilatcho koowa hi trul lende trujel, un hi mange tardo glan mire jaka.

Hosea 8:13

Jon anenn mange viechen, un chan pen tchalo ap ko mass. Me, o baro Dewel, dikau gar latches koi pre. Lengri doosh bistrau me gar, un lengro tchilatchepen well pral lende: Jon hunte djan pale an o them Egiptia pale.

Hosea 9:9

Tumaro tchilatcho koowa, hoi krenn, hi jaake djungelo har kowa, hoi was kerdo an o foro Gibea glan i rah tsiro. Doleske bistrell o baro Dewel gar tumari doosh un dell tumen tumari phagi.

Amos 3:2

Mank i tsele natsjone ap kai phub han tumer kokres kolla, kolen mange win rodom, un ap lende jak dom. Doleske hi tumari doosh jaake baro, un me hunte dap tumen i phagi.

Amos 5:22

Ninna te chatchrenn tumer mange viechen un chapen, hom gar bachtelo pral kowa. Kol thulle viechen, hoi mange marenn un glan mande chan, nai dikau buder gar glan i jaka.

Hebrearja 8:12

Un me bistrau lengri doosh, hoi jon ap pende anan. Ko tchilatchepen, hoi jon kran, well buder gar an miro shero.

1. Samuel 15:2

Kowa penell o baro Dewel, ko rai pral o bolepen un i phub: ‘Me bistrom gar, hoi i Amalekarja i Israelenge kran, har jon pen lenge an o drom tchiwan, har o Israel dran o them Egiptia win djas.