Jeremia 12:6 - O Debleskro Drom 2021 (Sinte)

⁶ Ninna tire phrala un i menshe dran tiro dadeskro kheer mukan tut te perell, un dan tchilatches gole pal tute har kol wawar. Dik tut glan lendar, ninna te rakrenn jon kamlo tuha.

O Debleskro Lab 2024 (Sinte-Manouche)

⁶ Ninna tire phrala oun i menshe dran tiro dadeskro kheer moukan tout te perell, oun dan čilačes gole pal toute har kol vavar. Dik tout glan lendar, ninna te rakrenn yon kamlo touha.

Jeremia 12:6 ပူးပေါင်းရင်းမြစ်များ

Hiob 6:15

Mire mala sikran pen, te hi le chochene. Har panja hi le, kai truk wenn.

Debleskri gili 12:2

Baro Dewel, ab ap miri rig! Tire menshe hi buder gar bud. Awa, kolla, kai patsle hi mank i menshende, hi gar bud.

Debleskri gili 12:3

Hakeno chochell o wawares. Jon rakrenn dui tchipjentsa un dran dui djia.

Debleskri gili 69:8

Dran tute hi i bari ladj ap mande, un miro shero hi lolo i ladjatar.

Gosewe laba 23:8

Kowa, kai tu tele dandral un chal, koles hunte tchadess tu pale win. Un tire latche laba his tchitcheske.

Gosewe laba 26:25

Te rakrell lo ninna jaake kamles, ma pats leske! Les hi efta bengeskro koowa an leskro dji.

Jesaja 31:4

Kawa hi, hoi rakras o baro Dewel ap mande: I lewo – nai well i phuro, nai well i terno – hoi i vieches tapras, mukell pes gar lestar krik te tradell. Job dell gole un darell gar kolendar, kai ap i viechende jak dan, un kanna khetne kharedo wan, un bari gole ap leste denn. Ninna te hi kolla bud, trashell lo lendar gar. Jaake wau me, o baro Dewel, ko rai pral o bolepen un i phub, tele ap i berga Zion, te kurap man mire menshenge.

Jeremia 11:19

Me homs har i terno bakro, kai djinell gar, te well lo kote anlo, kai well lo maredo. Jaake djinom gar, kai rakran le khetne, har te krenn le mange tchilatchepen. Jon penan mandar, har te woms i ruk: Mer dah ko ruk tele, jaake rah har hi lo sasto. Maras les, te well lo bistedo!

Jeremia 11:21

I menshe an Anatot kaman man mulo te dell, un penan mange: Muk tele, te rakress, hoi o baro Dewel tuke penas, te kameh gar, te maras tut mare wastentsa! Doleske penell o baro Dewel, ko rai pral o bolepen un i phub: Me kamau kol menshen an Anatot i phagi te dell: Lengre terne mursha wenn o chareha mulo dino, un lengre tchawe un tcha hunte merenn i bokatar.

Jeremia 20:10

Me shunau, har bud menshe tchorchanes rakrenna: “Job krell menge tchi har traash. Anas doosh ap leste! Sikras les an!” Ninna mire mala lurenn koi pre, te perap. “Dikas, te anas les jaake dur, te penell job tchomone, hoi gar mishto hi. Palle dah les pale, hoi lo mentsa kras!”

Jeremia 9:2

Lengri tchip hi har i tchuri. Lengro chochepah wan le soreles an o them. O tchatchepen rakrenn le gar. Jek tchilatcho koowa pal o wawar krenn le. Man prindjrenn jon gar, penell o baro Dewel.

Jeremia 9:3

Hakeno mu dell pes garda peskro malestar, un ninna peskro phralestar! Jek phraal dell kol wawar phrales pral i kanda. Un i maal rakrell djungeles pral o wawareste.

Jeremia 9:4

Jon lauter chochenn pengre malen. Un kek rakrell laba, hoi tchatcho hi. Jon penan pengre tchipja, te rakrenn le chochepen. Pale te pale krenn le tchilatchepen ap i wawarende,

Jeremia 9:5

Un mukenn gar tele, te rikrenn le i wawaren tele, un te chochenn le len. Man kamenn le gar te prindjrell, penell o baro Dewel.

Mateo 10:21

Ap ko tsiro dell i phraal peskro phrales an lengre wasta, te well lo maredo. Un o dad dell o tchawes an lengre wasta, te well job maredo. Un i tchawe hi midjak ap pengre dadende un pengre dajende, un denn len an i wasta kolendar, kai marenn len.

Markus 12:12

Un jon haiwan, te rakras o Jesus lendar, un kaman les te taprell. Un har trashan le i menshendar, tapran le les gar, un djan krik.

Johanni 7:5

Leskre phrala patsan gar ap leste. Doleske rakran jon jaake.

Bičepangre 16:22

Bud menshe, kai his koi, wan tchilatcho ap o Pauleste un ap o Silaseste. Un kol tchatchepangre mukan lenge i koola tele te tserdell, un penan, te denn le len i kashtentsa.

Bičepangre 18:12

An ko tsiro, har his o Gallio o pralstuno un tchatchepaskro rai pral o them Achaja, tchiwan pen kol bibolde khetne, un anan o Paules glan leste,