Hosea 9:8 - O Debleskro Drom 2021 (Sinte)

⁸ Miro Dewel bitchras man, leskro rakepaskres, te dap jak ap tumende an o them Efrajim. Un tumer tchiwenn i netsa win ap mire tsele dromma, te taprenn man har i tchirkles. Ninna an o kheer miro Deblestar lenn tumer man palla.

O Debleskro Lab 2024 (Sinte-Manouche)

⁸ Miro Devel bičras man, leskro rakepaskres, te dap yak ap t'mende an o them Efrayim. Oun t'mer čivenn i netsa vin ap mire tsele dromma, te taprenn man har i čirkles. Ninna an o kheer miro Deblestar lenn t'mer man palla.

Hosea 9:8 ပူးပေါင်းရင်းမြစ်များ

1. Rajengro liil 17:1

O Elija dran o gab Tishbe an o them Gilead penas ap o Ahab: “Me penau tuke an o lab o baro Deblestar, kai o Israeleskro djido Dewel hi, glan koleste hom me tardo: An kol bersha, hoi kanna wenna, dell kek brishin, witar gar djal i sapeno ducho pre dran i phub, bis te penau me kowa.”

1. Rajengro liil 18:1

Pal i rah tsiro, an o triinto bersh, kai bokenn le, penas o baro Dewel ap o Elija: “Dja, muk tut te dikell glan o Ahab. Me mukau o brishin te well ap i phub!”

1. Rajengro liil 18:19

Kanna muk i tsele Israelitarjen te penell, te wenn le khetne pash mande ap i berga Karmel, ninna kol 450 (star-sheel-te-paash-sheel) rashaja o deblestar Baal un kol star-sheel rashaja, kai i debletsa Ashera sharenn, kolen i Isebel chapen un pipen dell.”

1. Rajengro liil 22:11

Un o Zedekja, koleskro dad o Kenaan his, kras peske sasterne shinga un penas: “Kawa penell o baro Dewel: I shingentsa har kalla deh tu i Syrarja tele, bis te halauter maredo hi!”

1. Rajengro liil 22:22

Un job penas: ‘Me mukau i chochepaskro ducho te well, hoi rakrell dran i muja leskre tsele dikepangren!’ Koi penas o baro Dewel: ‘Tu hunte kress kowa. Tuke djal kowa mishto. Dja win, un kre les jaake!’”

1. Rajengro liil 22:28

Kote penas o Micha: “Te weh tu sasto pale pale, palle rakras o baro Dewel gar dran miro mui.” Un palle penas lo: “Shunenn kowa, tumer menshe an i tsele themma!”

1. Rajengro liil 22:6

Kote mukas o rai pral o them Israel i dikepangren khetne te well – kolla his jaake star-sheel mursha – un putchas lendar: “Djap me an o kurepen, te kurap man o foreha Ramot an o them Gilead? Kamell o Dewel kowa? Kamell lo kowa gar?” Kote penan jon: “Dja koi, un o Dewel dell o foro an tiro wast.”

2. Rajengro liil 13:21

Un i diwes was, kai paskran i Israelitarja i murshes, kote dikan le kurepangre dran o them Moab. Sik lan le ko murshes un witsran les an o mulengro kheer pash o Elisa, un nashan penge. Un har ko mulo mursh ap i kokale o Elisestar peras, was lo djido un stas pre.

2. Rajengro liil 2:14

un las koi plaashka, das ap o pani un penas: “Kai hi kanna o baro Dewel, ko Dewel, koleske o Elija budras?” Un das ap o pani. Koi djas o pani ap dui rigja, un o Elisa djas ap i wawar rig.

2. Rajengro liil 2:21

Koi djas job win pash ko pani, tchiwas ko loon dren un penas: “Jaake penell o baro Dewel: ‘Me krom ko pani djudjo, un kek merell buder koi pre un kek tchawe wenn buder mules bolde.’”

2. Rajengro liil 4:41

Job penas: “Anenn jarro!” Un job tchiwas jarro an i piri un penas: “Anenn kowa i murshende chapaske!” Koi nai chan jon kowa. Koi his o tselo chapen latcho.

2. Rajengro liil 4:43

Koi penas leskro budepaskro: “Kowa hi gar doha sheel murshenge!” O Elisa penas: “De les lenge, te chan le. O baro Dewel penell: ‘Jon chan, un atchell tchomone pral.’”

2. Rajengro liil 5:14

Koi djas job tele pash o pani Jordan un tchiwas pes tel o pani efta kope jaake har o Debleskro mursh kowa penas. Un leskro mass was pale sasto har ko mass i tikno tchawestar. Un job was sasto ap peskro tselo mass.

2. Rajengro liil 5:27

Ko nasslepen, hoi o Naamanes ap peskro mass his, perell ap tute un tire menshende, kai pal tute wenna.” Koi djas o Gehasi lestar krik, un ko nasslepen his ap leskro mass un dikas win har gib.

2. Rajengro liil 7:19

Un koi pre penas ko pralstuno lurdo ap ko Debleskro mursheste: “Ninna te krals o baro Dewel gomme kau diwes o bolepen pre un dals brishin, har nai djal kowa?” Un o Elisa penas koi pre: “Tire jakentsa dikeh tu kowa, un tchi chah tu kolestar.”

2. Rajengro liil 7:2

Ko pralstuno lurdo, kai tchiwas pes o baro rai ap leskri mussi, penas ap ko Debleskro mursheste: “Ninna te krals o baro Dewel gomme kau diwes o bolepen pre un dals brishin, har nai djal kowa?” O Elisa penas: “Tire jakentsa dikeh tu kowa, un tchi chah tu kolestar.”

Debleskri gili 124:7

Mer nai nasham menge har i tchirklo, dran koi netsa, hoi i tchirklengro pral leste witsras. Koi netsa was paash kerdo, un mer wam win.

Sikepaskro 9:12

Ninna djinell o mensho peskro tsiro gar, un well tapedo an o tchilatcho tsiro, hoi ap jek kopo pral leste perell, jaake har i matche tapedo wenn an i netsa, un i tchirkle an pandle dorja.

Kamlepaskri gili 3:3

I lurde hatsan man, kolla, kai ap o foro garda denna un kote trujel djan: ‘Dikan tumer les, koles miro dji kamell?’

Jesaja 62:6

Jerusalem, me tchiwom murshen ap tire massurja, te denn le jak ap tute. O tselo diwes un i tseli rat denn le bares gole, un mukenn gar tele, te bistrell tut o baro Dewel gar.

Jeremia 11:19

Me homs har i terno bakro, kai djinell gar, te well lo kote anlo, kai well lo maredo. Jaake djinom gar, kai rakran le khetne, har te krenn le mange tchilatchepen. Jon penan mandar, har te woms i ruk: Mer dah ko ruk tele, jaake rah har hi lo sasto. Maras les, te well lo bistedo!

Jeremia 14:13

Koi penom me: Baro Dewel, miro rai, tire rakepangre penan lenge: ‘Kek kurepen un kek bok well pash tumende. O baro Dewel krell, te well kek kurepen pash tumende an kek tsiro.’

Jeremia 23:13

Kowa, hoi dikom pash mire rakepangre an Samaria, hi i djungelo koowa mange. Jon penan laba glan-wi, kolendar penan le, kai wan le o deblestar Baal. Un jaake anan le mire menshen Israel o tchatcho dromestar tele.

Jeremia 31:6

Ko tsiro wella, kai denn le gole ap i berge Efrajim: Awenn, te djas pre an o foro Zion pash maro baro Debleste!

Jeremia 6:14

un krenn jaake, har te wans kol duka mire menshendar gar jaake pharo. Jon penenna: ‘Lauter hi mishto’, lauter hi mishto, ninna te hi tchi mishto.

Jeremia 6:17

Ninna dom tumen menshen, kai denn jak ap tumende. Denn garda koi pre, te phurdenn le i phurdepaskri, hoi sikrella: Bibacht wella … Jon penan: Mer kamah len gar te shunell.

Ropaskre gilja 2:14

Kolla, kai hunte penans tuke o Debleskre laba, penan tuke chocheno koowa glan-wi, hoi tchi moldo hi. Un sikran tuke gar tiri doosh. Kowa te krans le, perals gar jaake har kanna peral. Na-a, jon mukan tut chochene laba te shunell, un anan tut o tchatcho dromestar tele.

Ropaskre gilja 4:13

Kowa was pral o foro koi doshake, hoi o Debleskre rakepangre un i rashaja ap pende anan. Jon mukan kote sawe menshen te marell, kai kek tchilatchepen kran.

Ezekiel 3:17

Tu, mensho, wess kowa, kai dikell i bibacht te well un penell kowa i Israelenge dureder, jaake har jek ap i foro jak dell, un i menshenge penell, te wenn lurde. Te penau me tuke i lab, hunte peness kowa lenge, te djinenn le, hoi kamau ap lende te anell.

Ezekiel 33:7

Tu, mensho, tut rodom win, te dess jak ap o kheer Israel. Te shuneh i lab dran miro mui, hunte peness kowa lenge, te djinenn le, hoi kamau me pral lende te anell.

Hosea 5:1

Tumer rashaja, shunenn kowa! Un denn garda, tumer dran o kheer Israel! Ninna tumer dran o baro rajeskro kheer, shunenn kal laba! Tumer hunte dans jak, te well o tchatchepen kerdo. Un tumer anan i menshen jaake dur, te mangenn le chochene deblen an. Lenge wan tumer har pandle dorja, hoi jek win tchiwas an o foro Mizpa, un har i netsa, koleha jek tchirklen taprell ap i berga Tabor.

Hosea 9:7

O tsiro hi koi, kai me tumenge tumari phagi dau, un tumaro tchilatchepen ap tumare sherja pale anau. Un tumer Israelitarja haiwenn kowa! Tumer penenn: “I narwelo hi ko Debleskro rakepaskro! Ko mursh, koles o Debleskro ducho hi, rakrell dinelo koowa!” Jaake baro hi tumari doosh un tumari choli ap mande!

Hosea 9:9

Tumaro tchilatcho koowa, hoi krenn, hi jaake djungelo har kowa, hoi was kerdo an o foro Gibea glan i rah tsiro. Doleske bistrell o baro Dewel gar tumari doosh un dell tumen tumari phagi.

Micha 7:4

I feteder un latcheder lendar denn tchurje har subjengre burra. O diwes well sik, kai tumari phagi well, ko diwes, koles kolla glan-wi dikan, kai dan tumen trad. An ko tsiro well i daar pral tumende, te djinenn buder gar, hoi te krenn.

Johanni 15:24

Te kroms me gar glan lengre jaka ko baro koowa, hoi nai kek wawar kras, wals len kek doosh. Kanna dikan jon kowa. Un ninna te dikan le les, hi le tchilatcho ap mande un ap miro dadeste.

Remarja 3:7

I menshe nai penans ninna: “Mer te chochah, palle well diklo, har baro o Debleskro tchatchepen hi. Un job well sharedo. Hoske dell lo men i phagi?

Hebrearja 13:17

Shunenn ap kolende, kai sikrenn tumen, har te djan ap o Debleskro drom! Krenn kowa, hoi jon tumenge penenna! Lengri budi hi, te denn le jak ap tumende. Un jon hunte penenn o Debleske, har jon kran pengri budi. Djiwenn jaake, te krenn le pengri budi i bachtelo djijeha! Te rowenn jon pral tumende, palle wals kowa tumenge gar mishto.