Hosea 9:4 - O Debleskro Drom 2021 (Sinte)

⁴ Kote nai anenn le kek mool o baro Debleske. Un ap kol vieche, hoi le leske marenn, dikell lo gar latches. O chapen, hoi le kote chan, hi pale-tchiddo, un krell hakenes pale-tchiddo, hoi kowa chal – jaake har ko maro, hoi an i kheer hi, kai jek meras. Lengro maro nai chan le pash pende kokres, un nai anenn tchi an o baro Debleskro kheer.

O Debleskro Lab 2024 (Sinte-Manouche)

⁴ Kote nay anenn le kek mool o baro Debleske. Oun ap kol firhe, hoy le leske marenn, dikell lo gar lačes. O rhapen, hoy le kote rhan, hi pale-čiddo, oun krell hakenes pale-čiddo, hoy kova rhal – yaake har ko maro, hoy an i kheer hi, kay yek meras. Lengro maro nay rhan le pash pende kokres, oun nay anenn či an o baro Debleskro kheer.

Hosea 9:4 ပူးပေါင်းရင်းမြစ်များ

2. Mose 29:40

Le ninna i khoro latcho jarro un jek litari olivtikro djet, un tchore o djet an o jarro, un kre les khetne, un tchip kowa pash ko bakro pashel! Un le jek litari mool un tchore les win glan o Debleste!

2. Mose 40:23

un tchiwas o Debleskre mare pre glan o baro Debleste. Job kras kowa jaake har o baro Dewel leske penas.

Jesaja 57:6

Un ap kol latche platse an i tala tchorenn tumer lenge chapen un pipen win. Doleske well ko diwes, kai wenn kote maredo tchiddo! Patsenn tchatchepah, te dau jekes, kai sawo koowa krell, kowa gar pale?

Jesaja 66:3

Kowa, kai mange i gurum marell, marell ninna i menshes i chocheno debleske. Kowa, kai mange i terno bakro temerl dell, marell ninna i djukles i chocheno debleske. Kowa, kai mange chapen glan anell, anell ninna balengro rat i chocheno debleske. Kowa, kai mange sungepaskro koowa chatchrell, parkrell pes ninna pash i chocheno debleste. Jon djan pengre dromma jaake har jon les kamenna. Un shukar hi an lengre jaka, hoi an mire jaka djungeles hi.

Jeremia 16:7

Koi hi kek buder, kai dell chapen kolen, kai pral atchan un rowenn. Ninna te meras lengro dad un lengri dai, hi kek koi, kai dell len tchomone te pijell, te wenn le pale soreles.

Jeremia 6:20

Me putchau tchi pal o sungepaskro koowa dran o them Saba, un pal ko gudlo sungepaskro djet, hoi well dran i dur them. Kol vieche, hoi tumer mange chatchrenna, kamau me gar. Un ap kol vieche, hoi tumer mange marenna, dikau gar latches.

Ezekiel 24:17

Tchorchanes nai leh phares ducho. Ma rob i bari goljah har jek pral jekeste rowell, kai meras! Rike tiro diklo trul tiro shero, un ma rib tire kircha win! Ma tchake tiri tchor tele! Un ma cha ko maro, hoi kolenge anlo well, kai rowenn pral i mensheste, kai meras.

Ezekiel 24:22

Palle krenn tumer har me, o Hesekijel, krom: Tumare tchora tchakrenn gar tele, un tumer chan kek maro, har kolla chan, kai pral i muleste rowenn.

Daniel 1:8

O Daniel las peske an peskro dji glan, te chal lo gar o baro rajeskro chapen un pijell gar leskri moljatar, te krell lo pes gar pale-tchiddo. Un job mangas o pralstunestar pral o rajeskro kheer, te hunte krell lo pes gar pale-tchiddo.

Hosea 3:4

Jaake djal i Israelenge: I rah tsiro hi len kek rai un kek pralstune pral pende, un jon anenn kek viechen o Debleske an leskro kheer. Len hi buder kek pre-tchidde barra, kek rashajeskri damdira un kek khereskre debla, te putchenn le lendar, hoi te krenn.

Hosea 7:16

Jon rissrenn pash i debleste, koles kek soor hi. Jon hi har i bango bogo, koleha kek failo kote djal, kai te djal lo. Lengre pralstune hi bare mujengre. Doleske wenn le maredo o chareha. Palle san i Egiptarja pral lende.

Hosea 8:13

Jon anenn mange viechen, un chan pen tchalo ap ko mass. Me, o baro Dewel, dikau gar latches koi pre. Lengri doosh bistrau me gar, un lengro tchilatchepen well pral lende: Jon hunte djan pale an o them Egiptia pale.

Joel 1:13

Tumer rashaja, kai han tardo pash o Debleskri chatchepaskri, riwenn tumen an gone, un denn gole i bibachtjatar! Ninna ratsjake riwenn ko gono gar win, tumer, kai budrenn miro Debleske! Hi kek djob koi un kek mool, hoi nai anans tumaro Debleske an leskro kheer.

Joel 1:9

Djob un mool hi buder gar koi, hoi nai wals dino o baro Debleste an leskro kheer. I rashajenge hi ropaske. Len hi buder tchi, te anenn le o baro Debleske.

Joel 2:14

Koon djinell, te rikrell lo ninna kau kopo i phagi pale, un mukell djob un drake bares te well, te nai anenn tumer jarro un mool o baro Debleske, kai hi tumaro Dewel.

3. Mose 17:11

An o rat hi o djipen. Un me kamau, te well lo ap i chatchepaskri anlo, te well i doosh un o pale-tchiddo koowa tumendar krik lino. An o rat hi o djipen. Doleske lau leha i doosh un o pale-tchiddo krik.

3. Mose 21:17

Pen ap o Aron: Kek tire tchawendar, kai pal tute wenna, well glan o Debleskri chatchepaskri, te anell lo chapen glan peskro Debleste,

3. Mose 21:21

Kek mursh, kai well o rashajestar o Aronestar, un kai sawo koowa ap peste hi, nai well glan o Debleskri chatchepaskri, te chatchrell lo chapen o baro Debleske.

3. Mose 21:6

Tumer rashaja hunte djiwenn jaake, te han kokres tumaro Debleske, un hunte krenn tchi, hoi anell ladj ap leskro lab. Tumer han kolla, kai anenn leske chapen, hoi well leske chatchedo. Doleske hunte krenn tchi, hoi krell tumen pale-tchiddo.

3. Mose 21:8

Tumer Israelitarja, i rashai hi tumenge i Debleskro mursh! Job chatchrell glan mande o chapen, hoi mange anlo well. Doleske well lo tumenge i mursh, koles wi-rodom, te budrell lo mange. Me hom o baro Dewel. Kek wawar hi har me. Un tumen rodom mange win, te wenn mire menshe.

Amos 5:22

Ninna te chatchrenn tumer mange viechen un chapen, hom gar bachtelo pral kowa. Kol thulle viechen, hoi mange marenn un glan mande chan, nai dikau buder gar glan i jaka.

Maleachi 2:13

Koi hi gomme i wawar koowa, hoi tumer kran: Te wenn tumer glan o baro Debleste, un o baro Dewel dikell gar latches ap kowa, hoi leske anenna, un kamell tchi dran tumare wasta te lell, palle rowenn tumer un denn gole, un tumare swa tchakrenn leskri chatchepaskri.

4. Mose 19:11

Koon i mulo menshes an-tapella, kowa hi efta diwessa pale-tchiddo.

4. Mose 28:2

Pen ap i Israelitarja: Tumer hunte denn jak, te anenn an o tchatcho tsiro ko koowa, hoi denn o Debleste, – ko chapen, hoi well leske chatchedo un koleskro sungepen leske shukar sungella.

4. Mose 4:7

Un pral i chapaskri, kai o Debleskro maro pre tchiddo well, hunte tchiwenn le ninna i blaueti plachta. Un koi pre tchiwenn le kol pirja un roja, kol tchare un khore, kai i mool o Debleske dren wella. Ninna o Debleskro maro hunte well koi pre tchiddo.

Johanni 6:51

Me hom ko maro, hoi dell o djipen, un hoi was dran o bolepen. Hakeno, koon chala kau maro, lell o djipen, hoi gar pre-herella. Un ko maro hi miro mass. Me dau les i menshenge, te lenn le ko djipen.”

5. Mose 26:14

Me shunom ap tute, miro baro Debleste un krom lauter jaake, har tu mange penal: An ko tsiro, kai rowom i muleske, chom kek chapen, hoi tut dino his. Un taprom tchi kolestar, har pale-tchiddo homs. Un dom tchi kolestar i mulenge.