Hosea 8:14 - O Debleskro Drom 2021 (Sinte)

¹⁴ I Israelitarja bistran koles, kai kras len. Jon krenn penge bare shukar khera. Un i menshe an o them Juda krenn penge sorele forja. Me, o baro Dewel, witsrau i jag an lengre forja, hoi lengre khera pre chatchrell.

O Debleskro Lab 2024 (Sinte-Manouche)

¹⁴ I Israelitarya bistran koles, kay kras len. Yon krenn penge bare shoukar khera. Oun i menshe an o them Youda krenn penge zorele forya. Me, o baro Devel, vitsrau i yag an lengre forya, hoy lengre khera pre rhačrell.

Hosea 8:14 ပူးပေါင်းရင်းမြစ်များ

1. Rajengro liil 12:31

O Jerobeam kras ninna mulne platse ap o pralstuno them, kai i mule debla an-mangedo wenn, un rodas rashajen win, kai gar Levitarja his.

1. Rajengro liil 16:31

Un har te wals gar doha, kai kras job ko tselo tchilatcho koowa, hoi ninna o Jerobeam kras, koleskro dad o Nebat his, romedineras lo i Isebel, koi tchat o rajestar pral Sidon. Leskro lab his Etbaal. Un o Ahab djas koi un witsras pes glan o chocheno debleste Baal tele, un mangas les an.

2. Rajengro liil 18:13

O Hiskija his an o 14. (deesh-te-starto) bersh baro rai pral o them Juda, koi djas o baro rai pral o them Assur, o Sanherib, an o them Juda un las i tsele sorele forja peske dren. Kote bitchras o Hiskija murshen pash o baro rajeste pral o them Assur. Kowa his an o foro Lakish, un mukas leske te penell: “Me anom doosh pral mande. Dja mandar krik! Hoi tu mandar kameh, ko kamau te plaissrell.” Kote mangas o Sanherib lestar triin-sheel zentnarja rup un trijanda zentnarja sonakai.

2. Familjakro liil 26:10

Job kras ninna turme an o mulo tato them un hadas bud panjenge brunne win; les his bud vieche an o pralstuno them un an o telstuno them, ninna djobengre hache un moljengre hache ap i berge un ap i berga Karmel. Leske his i hachengri budi ap o dji tchiddo.

2. Familjakro liil 27:4

Un job kras kol forja ap i berge Juda sorleder. Un an i wesha kras lo sorele kurepangre khera un turme.

Debleskri gili 106:21

Jon bistran ko Debles, kai lengro djipen dran o merepen win las, un baro koowa an o them Egiptia kras,

Debleskri gili 95:6

Awenn, mangas les an! Te djas ap mare tchanga, un peras tele glan o baro Debleste! Job hi kowa, kai kras men.

Jesaja 17:10

Israel, tu bistral tiro Debles, kowa, kai tut win las dran i tchilatche wasta. Tu bistral koles, kai his tuke har i baro sorelo bar, pal koleste nai khatral tut. Un kral tuke pre-tchidde barra, kai mangeh wawar deblen an. Ninna te tchiwal kote shukar drakengre ruka an i phub,

Jesaja 29:23

Te dikenn leskre tchawe ko koowa, hoi mire wastentsa mashkral lende krau, palle hadenn le miro lab; jon sharenn man, o Jakobeskro Debles, kai hom kokres o tchatcho Dewel. Un jon mangenn man an, o Israeleskro Debles.

Jesaja 42:13

O baro Dewel djal win an o kurepen har i sorelo mursh; un kurell pes har i kurepaskro, koleskro dji pherdo hi, te djal lo an o marepen. Soreles dell lo o kurepaskri gole, un kek darjah djal lo win ap kolende, kai kurenn pen leha.

Jesaja 42:25

Kote mukas lo peskri bari choli pral mende te well, un mukas men an i sorelo kurepen te well. Leskri choli his trul mende trujel har i jag, un mer haiwam kowa gar. Ninna har chatchras men leskri choli, lam kowa gar an mare djia.

Jesaja 43:21

Un mire menshe Israel, kolen mange krom, sharenn man glan i wawarende.

Jesaja 9:10

O baro Dewel kras kolen soreles, kai kamenn i Israelenge tchilatchepen te krell, o Rezin un kol wawaren, te djan le ap lende pre:

Jesaja 9:9

“Kol barra dran chatchedi tchik peran, – kowa krell tchi. Mer tchiwah mare khera sorele barrentsa pale pre. I faigetikre ruka wan tele dino. Kote tchiwah zedertikre ruka an i phub.”

Jeremia 17:27

Te shunenn tumer gar ap mande, un djiwenn ap o Debleskro diwes har ap hako wawar diwes, un hidjrenn tumaro koowa ap o Debleskro diwes dren an kol wudja o forestar Jerusalem, palle tchiwau me jag an kol wudja, te chatchrenn i sorele khera pre an Jerusalem. Un kek nai krell koi jag win.

Jeremia 2:32

Nai bistrell i terni tchai peskro sonakai, i terni djuwel, kai kamell romedinerell, peskro bijabeskro ripen? Na-a! Mire menshe bistrenn man pale te pale.

Jeremia 23:27

Jek penell o wawareske peskri suni. Un koleha krenn le, te bistrenn man mire menshe jaake, har bistran man lengre phure, har mangan le o debles Baal an.

Jeremia 3:21

I gole un i ropen well shunlo ap o pralstuno them: Kolla hi i Israelitarja, kai djiwan i tchilatcho djipen, un bistran lengro baro Debles.

Jeremia 5:17

Jon chan tiro djob un tiro maro, tire tchawen, tire tchen, tire bakren un grumjen, tire drake, tire faigetikre ruka. Tumer patsenn, te djal tumenge tchi an tumare sorele forja. Kolen lenn jon tumendar o chareha krik.

Ezekiel 23:35

Tu bistral man un sikral man o dumo. Doleske hidje kanna tiri doosh, hoi ap tute anal, har wi-ladjedo koowa kral un har i lubni djiwal. Kowa penell o baro Dewel, maro rai.

Hosea 13:6

Un har dom len te chal, un jon tchalo wan un len doha his, phurdan le pen pre, un bistran man.

Hosea 2:13

Me krau, te wenn i Israelitarja buder gar bachteles khetne ap kol bare diwessa. Ap kek Debleskro diwes, ap kek diwes, kai well o newo tchon diklo, un ap kek wawar baro diwes wenn le buder khetne.

Hosea 4:6

Mire menshe prindjrenn o tchatcho drom gar. Doleske djan le tele. Tumer kaman lenge gar miro drom te sikrell. Doleske kamau me tumendar witar tchi te djinell. Tumer han buder gar mire rashaja. Tumer bistran miro drom. Doleske bistrau tumare tchawen.

Amos 1:10

Me bitchrau i jag ap i massurja trul o foro Tirus, hoi chatchrell leskre sorele khera tele.

Amos 1:12

Me bitchrau i jag an o foro Teman, un chatchrau i sorele khera tele an o foro Bozra.

Amos 1:14

Me bitchrau i jag ap i foreskre massurja o forestar Rabba, hoi chatchrell leskre sorele khera tele, ap ko diwes, kai well o kurepaskri gole dino, un o kurepen win phagell har i baro phurdepen.

Amos 1:4

Me bitchrau i jag an i shukar khera, hoi o rai Hasael peske kras. Un chatchrau i sorele khera tele, kai o baro rai Ben-Hadad djiwas.

Amos 2:5

Me bitchrau i jag an o them Juda, un chatchrau kol sorele khera tele an Jerusalem.

Efesarja 2:10

Kowa, hoi mer kanna ham, kras o Dewel dran mende. Har wam patslo ap o Jesus Kristeste, das lo men o newo djipen, te kras mer ko latcho koowa, hoi job menge win rodas un an mare wasta das.

5. Mose 32:18

Ko Dewel, kolestar tumer wan, un kowa, kai rikras tumen, koles tchiwan tumer ap i rig. Ko Dewel, kai kras tumen, koles bistran tumer.