Hosea 5:1 - O Debleskro Drom 2021 (Sinte)

¹ Tumer rashaja, shunenn kowa! Un denn garda, tumer dran o kheer Israel! Ninna tumer dran o baro rajeskro kheer, shunenn kal laba! Tumer hunte dans jak, te well o tchatchepen kerdo. Un tumer anan i menshen jaake dur, te mangenn le chochene deblen an. Lenge wan tumer har pandle dorja, hoi jek win tchiwas an o foro Mizpa, un har i netsa, koleha jek tchirklen taprell ap i berga Tabor.

O Debleskro Lab 2024 (Sinte-Manouche)

¹ T'mer rashaya, shounenn kova! Oun denn garda, t'mer dran o kheer Israel! Ninna t'mer dran o baro rayeskro kheer, shounenn kal laba! T'mer hounte dans yak, te vell o čačepen kerdo. Oun t'mer anan i menshen yaake dour, te mangenn le rhorhene deblen an. Lenge van t'mer har pandle dorya, hoy yek vin čivas an o foro Mispa, oun har i netsa, koleha yek čirklen taprell ap i berga Tabor.

Hosea 5:1 ပူးပေါင်းရင်းမြစ်များ

Jeremia 11:7

Me dom tumare phuren trad ap ko diwes, har anom len dran Egiptia win, bis ap kau diwes, un penom lenge pale te pale: Shunenn ap miro rakepen!

Jeremia 13:18

Pen o baro rajeske un leskri dake: Awenn tele tumari beshepaskri! I raili rajeskri stadi peras tumaro sherestar tele.

Jeremia 46:18

Me dau man sowel pash miro djipen, penell o baro rai, koleskro lab hi ‘o baro Dewel, o rai pral o bolepen un i phub’: I baro rai wella, kai hi bareder har i tsele wawar, jaake har i berga Tabor bareder hi har i berga trul late, un har i berga Karmel hadell pes pash o baro pani.

Hosea 10:15

Jaake djal tumenge an o foro Betel ninna. Kowa well dran tumaro baro tchilatchepen! Te djal o kham pre ap ko diwes, hi trujel o baro rajeske dran Israel.

Hosea 13:8

Me perau pral lende har i baro diwjo viecho, koleske i tchawe krik line wan. Me dandrau len an kotja un chau len pre har i lewo, awa, har i diwjo viecho dandrau len khetne.

Hosea 4:1

Tumer Israelitarja, shunenn, hoi o baro Dewel tumenge penell! O baro Dewel hunte tchingrell tumentsa, kai djiwenn an o them Israel. Tumer rikrenn gar khetne, han gar kamles jek o wawareha un prindjrenn o Debles gar.

Hosea 6:9

Un i rashaja krenn pen khetne har tchorepangre, kai lurenn an o khatepen, te well jek, koles nai le win randenn. Ap o drom an o foro Sichem marenn le. Sawo tchilatcho koowa krenn le!

Hosea 9:8

Miro Dewel bitchras man, leskro rakepaskres, te dap jak ap tumende an o them Efrajim. Un tumer tchiwenn i netsa win ap mire tsele dromma, te taprenn man har i tchirkles. Ninna an o kheer miro Deblestar lenn tumer man palla.

Joel 1:2

Shunenn, tumer phure, un denn jak tumer halauter, kai djiwenn an kau them! Penenn mange, das sawo koowa jaake rah har tumer djiwenn? Das sawo koowa an tumare phurengro tsiro?

Amos 3:1

Shunenn, tumer Israelitarja, hoi o baro Dewel pral tumende rakras, pral o tselo kheer Israel peskre tsele familjentsa, kolen job win anas dran o them Egiptia:

Amos 7:9

I mulne platse, kai mangan o Isaakeskre menshe chochene deblen an, kal platse wenna paash dino. Un kol khera, kai sharan i Israelitarja o Debles, wenn dino an kotja. Un me wau miro chareha pral o kheer Jerobeam.”

Micha 3:1

Un o Micha penas: Tumer pralstune an o kheer Jakob, tumer raja an o kheer Israel! Shunenn, hoi tumenge penau! Tumer hunte wans kolla, kai djinenn, hoi o tchatchepen hi.

Micha 3:9

Jaake shunenn kowa, tumer pralstune an o kheer Jakob, un tumer raja an o kheer Israel! Tumer, kai stakrenn tumare pirentsa ap o tchatchepen trujel, un penenn fun kowa, hoi tchatcho hi: Kowa hi chochepen.

Micha 7:2

Kek, kai o Debleskro drom djal, hi buder an kau them. Kek dell mank i menshende, kai an o tchatchepen tardo hi. Jek rodell, har te marell lo o wawares. Un hakeno lell o wawares palla, te taprell lo les.

Maleachi 1:6

O baro Dewel, ko rai pral o bolepen un i phub, penell: I tchawo hunte hadell peskro dades, un i budepaskro hunte dikell pre ap peskro rajeste. Me hom tumaro dad – hoske hadenn man gar? Me hom tumaro rai – hoske dikenn gar pre ap mande? Tumer rashaja, tumer dikenn tele ap mande. Un tumer putchenn: Hoi kram, kai peneh ‘tumer dikan tele ap mande?’

Maleachi 2:1

O baro Dewel, ko rai pral o bolepen un i phub, penell ap i rashajende: Un kanna, tumer rashaja, kau lab hi tumenge: Hadenn man un krenn, hoi tumendar kamau. Te kamenn gar te shunell, hoi tumenge penau, palle tchiwau i praassepen ap tumende un bitchrau tumenge bibacht. Un koi bacht, hoi ap tumende tchiddo hi, well i bibacht. Tchatchepah, o praassepen hi ap tumende tchiddo doleske, kai lan gar ap tumare djia, hoi tumenge penom.

Čačepangre 4:12

Koi was ap o Sisera penlo, te djas o Barak, koleskro dad o Abinoam hi, ap i berga Tabor pre.

Čačepangre 4:6

Was i diwes, kai mukas li i murshes dran o kheer Naftali pash peste te kharell. Leskro lab his Barak. Koleskro dad his o Abinoam dran o foro Kedesh. Un joi penas ap leste: “O baro Dewel, kai o Dewel pral o Israel hi, job penell tuke: ‘Le tuke deesh-serja mursha dran i khera Naftali un Sebulon un dja lentsa ap i berga Tabor!

1. Samuel 7:16

Un hako bersh djas lo an Betel un Gilgal un Mizpa un rakras kote o tchatchepen win pral i menshende.

1. Samuel 7:5

Un o Samuel das i tsele murshen an Israel khetne gole an Mizpa, te mangas lo lenge o baro Deblestar.

1. Samuel 7:6

Un jon wan khetne an Mizpa. Kote lan le pani, un tchoran les glan o baro Debleste win. Un ap ko diwes chan le tchi, te dikell o baro Dewel ap lende. Un jon penan: “Mer anam doosh ap mende glan o baro Debleste.” Un kote an Mizpa was o Samuel lengro tchatchepaskro rai.