Hosea 2:4 - O Debleskro Drom 2021 (Sinte)

⁴ O baro Dewel penell: Penenn, hawi doosh o them Israel ap peste anas! O them Israel, tumari dai, hi buder gar miri romni, un me hom buder gar lakro rom. Mangenn latar, te lell li kowa krik, hoi sikrell, te hi li i lubni, – ko koowa an lakro mui un kowa, hoi hidjrell li ap peskri betch.

O Debleskro Lab 2024 (Sinte-Manouche)

⁴ O baro Devel penell: Penenn, havi doosh o them Israel ap peste anas! O them Israel, t'mari day, hi bouder gar miri romni, oun me hom bouder gar lakro rom. Mangenn latar, te lell li kova krik, hoy sikrell, te hi li i loubni, – ko koova an lakro mouy oun kova, hoy hidjrell li ap peskri beč.

Hosea 2:4 ပူးပေါင်းရင်းမြစ်များ

2. Rajengro liil 9:22

Har o Joram o Jehu dikas, putchas job: “Awenn tumer an o latchepen?” Koi penas lo: “Hoi – an o latchepen? Har nai wah an o latchepen jaake rah har tiri dai, i Isebel, sharell mule deblen un krell bengeskro koowa?”

Jesaja 27:11

Un lengre kashta wenn truk un phagenn tele. Un djuwja wenn un lenn len, te krenn le i jag. Kal menshe haiwan tchi. Doleske well koles, kai len kras, kek dji lenge, un hi lenge gar latcho.

Jesaja 50:1

Kawa penell o baro Dewel: Kai hi ko liil, hoi me hunte tchinoms, kai dren tardo hi, te mukom me tumari dat? Koon hi kowa, pash koleste man sijaan wals un tumen leske bikroms. Dran tumari doosh han bikedo. Tumer peran miro dromestar tele. Doleske hi tumari dai muklo.

Jesaja 57:3

Tumer, kai mangenn chochene deblen an, han har drawepangre, har mursha, kai pash wawar djuwjende djan, un har djuwja, kai lubja hi.

Jeremia 13:14

Jaake har kol khore phagenn, te wenn le khetne dino, jaake krau, te phagell jek ap o wawareste, ninna i dada ap lengre tchawende. Jon khaitenn man gar, un i dji hi man witar gar lenge, un rikrau man gar pale, te marap len lauter. Kowa penell o baro Dewel.

Jeremia 16:5

O baro Dewel penas ap mande: Tu djas an kek kheer, kai rowenn le pral jekeste, kai meras. Tu rowess gar lentsa, witar gar peness lenge latche laba; me hom buder gar i maal kal menshendar, hom lenge buder gar latcho, un krau miro dji lenge pandlo. Kowa penell o baro Dewel.

Ezekiel 23:25

Me hom jaake chojedo ap tumende, te mukap len tuha choljah trujel te djal. Tiro nak un tire kanda tchinenn le tuke tele. Un kolla, kai tutar djido atchenn, wenn o chareha mulo dino. Tire mursh tchawen un tire tchen lenn le tutar. Un kowa, hoi tutar pral atchell, well an i jag chatchedo.

Ezekiel 8:18

Doleske djau lentsa i choljah trujel. Jon khaitenn man buder gar. Un man well kek latchepen lenge. Ninna te denn le palle glan mire kanda pre gole, shunau me gar ap lende.

Ezekiel 9:10

Doleske dikau me kek kamlepah ap lende, un jon khaitenn man gar. Lengro tchilatchepen anau ap lengre sherja pale.

Hosea 1:2

Har rakras o baro Dewel o ersto kopo ap o Hosea, te penell job leskre laba i menshenge, penas lo ap leste: Rode tuke i lubni un romedine lat! Tut hunte well tchawe, kai i lubjatar ap i phub anlo wenn. Jaake sikreh: I menshe an kau them hi har i lubni: Jon mukan man un nashenn wawar deblenge palla.

Hosea 1:6

Un i Gomer was o duito kopo wawartchandes, un anas i tchai ap i phub. Kote penas o Dewel ap leste: De lat ko lab Lo-Ruhama! Man hi buder kek dji i menshenge dran o kheer Israel, un bistrau lengri doosh buder gar.

Hosea 5:7

Jon phagan mantsa, o baro Debleha, un anan tchawe ap i phub, kai man gar prindjrenn. Doleske wenn le halauter krik lino an kol diwessa, kai well o newo tchon diklo, – jon khetne pengro themeha.

Zakarie 1:12

Koi penas o bolepaskro: “Baro Dewel, tu rai pral o bolepen un i phub, har rah kameh tu gar tiro dji pre te krell i menshenge an Jerusalem un an i wawar forja an o them Juda? 70 (efta-deesh) bersha hal chojedo pral lende.”

Johanni 8:41

Tumer krenn kowa, hoi tumaro dad ninna kras.” Penan jon ap leste: “Mari dai hi kek lubni. Men hi jek dad. Kowa hi o Dewel.”

Remarja 11:22

Jaake dikah, o Dewel nai well latcho, un job nai dell i phagi. Kolla, kai peran leskro dromestar tele, kolen dell lo i phagi. Latcho hi lo ap tumende, kai djiwenn dran leskro latchepen. Te djiwenn tumer buder gar dran leskro latchepen, tchinell lo tumen ninna tele.

Remarja 9:18

Lauter krell lo jaake, har job kamella. Ap koneste job latches kamell te well, ap koleste hi lo latcho. Koneske job i dji dran bar kamell te dell, koleske dell lo i dji dran bar.

Jakobo 2:13

Ma bistrenn! Well jek diwes, kai rakrell o Dewel o tchatchepen win pral tumende. Te hi jekes kek dji i wawareske, koleske hi o Debles witar kek dji. Kones hi i dji i wawarenge, koles hunte well kek daar ap ko diwes, kai rakrell o Dewel o tchatchepen pral i menshende win.