Hiob 31:7 - O Debleskro Drom 2021 (Sinte)

⁷ Te djan mire herja tele leskro dromestar, un te nashas miro dji mire jakenge palla, un te kran mire wasta tchomone, hoi gar mishto hi,

O Debleskro Lab 2024 (Sinte-Manouche)

⁷ Te djan mire herya tele leskro dromestar, oun te nashas miro dji mire yakenge palla, oun te kran mire vasta čomone, hoy gar mishto hi,

Hiob 31:7 ပူးပေါင်းရင်းမြစ်များ

Hiob 16:17

Jaake hi kowa, ninna te krom kek tchilatchepen, un mangom miro Debles i djudjo djijeha an.

Hiob 17:9

Jek, kai an o tchatchepen tardo hi, mukell gar tele peskro dromestar. Un koon i djudjo djipen djiwell, well sorleder un sorleder.”

Hiob 23:11

Me rikrom mire pire ap leskro drom, un atchom ap leste, un djom gar tele lestar.

Hiob 27:5

An kek tsiro kamau, te dap tumen tchatches. Bis te merau, penau me: ‘Kek doosh anom ap mande.’

Hiob 27:6

Me hom an o tchatchepen. Ap kowa rikrau man soreles, un atchau koi pashel. Kek diwes penell miro dji mange: ‘Kowa hoi kral, his gar mishto.’

Hiob 9:30

Ninna te thowoms man gibeha tele, un mire wasta sapuneha,

Debleskri gili 101:3

Rikrau man pale te krap chocheno koowa, un kamau gar khetne te well kolentsa, kai bango koowa krenn. Sawo koowa kamau gar glan i jaka te dikell.

Debleskri gili 7:4

Baro Dewel, tu hal miro Dewel, me te krom sawo koowa, hoi penan le, un te hi doosh ap mande,

Sikepaskro 11:9

Terno mursh, muk tiro dji te giwell an tire terne bersha! Ab bachtelo jaake rah, har terno hal. Kre, hoi tiro dji tuke penella un tire jakentsa mishto hi; un biste gar, te well i diwes, kai rakrell o Dewel o tchatchepen win pral tute un halauter, hoi kral.

Jesaja 33:15

Kolla, kai an o tchatchepen tardo hi, un rakrenn, hoi tchatcho hi; kolla, kai kekeske chochepah lowe tele lenn, te wenn le brawelo, un tserdenn pengre wasta pale, te kamell jek len lowe te dell, te anenn le chochepen pre; kolla, kai shunenn gar ap kolende, kai kamenn jekes te marell, un kolla, kai djan gar kolentsa, kai o tchilatchepen krenn,

Ezekiel 14:3

Tu, mensho, kal mursha rikran ap pengre chochene deblen, un tchiwan len pre glan pende, kolen, kai anenn len ap o tchilatcho drom. Hoske mukap man sawendar te putchell?

Ezekiel 14:7

Hako Israelitari, un hako wi-themari pash tumende, kai mange o dumo sikrell, un peskro dji i chochene deblenge pre krell, un len glan peste tchiwell, kolen, kai anenn les ap o tchilatcho drom, un well palle pash miro rakepaskro, te putchell lo mandar tchomone, koleha rakrau me, o baro Dewel, kokres.

Ezekiel 6:9

Kote, kai le pandle hi, wau me lenge an o shero. Un jon dikenn dren, te dom len i phagi koleske, hoi jon kran: Jon phagan mantsa un nashan chochene deblen palla. Palle rissrell lenge halauter an pende pral ko tselo djungelo koowa, hoi jon kran.

4. Mose 15:39

Un kol dorja hi koleske koi: Jaake bud kope har tumer kolla an-dikenn, well tumenge an o shero halauter, hoi o baro Dewel penas, – kol tsele laba, hoi hunte krenn. Jaake mukenn tumen gar o Debleskro dromestar tele te anell tumare jakendar, witar gar shunenn tumer ap kowa, hoi an tumaro shero trujel djal.

Mateo 5:29

Te kamell tiro jak tchomone te dikell, hoi anell tut ap i tchilatcho drom, palle tchin les win, un witse les tutar! Hi tuke feteder, te nashress jek jak, har te wess an o bengeskri jag witsedo.