Gosewe laba 6:14 - O Debleskro Drom 2021 (Sinte)

¹⁴ An peskro dji hidjrell lo tchilatchepen, un hako tsiro anell lo tchingepen.

O Debleskro Lab 2024 (Sinte-Manouche)

¹⁴ An peskro dji hidjrell lo čilačepen, oun hako tsiro anell lo čingepen.

Gosewe laba 6:14 ပူးပေါင်းရင်းမြစ်များ

Debleskri gili 140:2

Baro Dewel, le man win dran i wasta kol tchilatchendar! Khate man glan i marepangre!

Debleskri gili 140:3

Kolen hi tchilatchepen an o dji, un krenn tchingepen hako diwes.

Debleskri gili 36:4

Tchi har midjak un chochene laba wenn dran leskro mui win. Latcho koowa haiwell lo buder gar te krell.

Gosewe laba 14:22

Kolen, kai tchilatchepen an o shero hi, kolla djan nashedo. Kolla, kai kamenn o latchepen te krell, kolenge hi i wawar menshe latches un rikrenn ap lende.

Gosewe laba 16:27

I tchilatcho mensho rodell i drom, har nai dukrell lo i wawaren. Hoi lo rakrell, chatchell har jag.

Gosewe laba 17:20

Jek dui djijentsa hatsell kek latchepen. Un jek dui tchipjentsa perell an i bibacht.

Gosewe laba 2:14

Lenge hi shukar, te krenn le tchilatcho koowa, un jon sanenn, te krenn le djungelo koowa.

Gosewe laba 21:8

Kowa, kai doosh ap peste anas, djal bange dromma. Koles, kai i djudjo dji hi, krell o tchatchepen.

Gosewe laba 22:8

Kowa, kai chochepen win witsrell har djob, kowa anell bibacht dren. Palle nai djal lo buder gar i wawarentsa jaake trujel har job kamell.

Gosewe laba 24:8

Kowa, kai peske glan lell te krell lo tchilatcho koowa, koles denn le ‘tchilatcho bedo’ gole.

Gosewe laba 3:29

Ma le tuke glan, te kress tchilatchepen koleske, kai pash tute an o latchepen djiwell!

Gosewe laba 3:32

O baro Dewel dikell chojedes ap kolende, kai bange dromma djan. I maal hi lo kolenge, kai ap o tchatcho drom djan.

Jesaja 32:7

O chocheno djal chochene dromma. Tchilatcho koowa lell lo peske glan, un leskro chochepah anell lo doosh ap i tchorwelende, ninna te hi kolla an o tchatchepen.

Jesaja 57:20

I tchilatche hi har i diwjo baro pani, hoi rikrell pes nai gar pale, un well pale te pale un hadell khandli phub un tchik pre.

Ezekiel 11:2

Un o baro Dewel penas ap mande: Tu, mensho, kalla hi kol mursha, kolen tchilatchepen glan hi. Te putchenn i menshe an o foro lendar: “Hoi hunte kras mer?” Palle penenn le lenge sawo koowa, hoi anell len an i bibacht.

Hosea 8:7

Kowa, hoi le krenn, hi har te tchiwans le i ducho an i phub un kek djob. Un hoi win well, hi i baro phurdepen. Kek djob well baro. Kowa hoi pre djal, anell kek jarro. Un te anals kowa jarro, wans wawar menshe un chans les pre.

Micha 2:1

Hawi bibacht well pral kolende, kai hi tchiddo ap pengro tchiben, un an lengro shero djal tchilatcho koowa trujel, hoi kamenn le te krell. Jaake sik har o kham pre djal, krenn le, hoi le pen glan lan. Len hi i soor, te krenn le, hoi le kamenn.

Remarja 16:17

Mire phrala, me mangau tumen, denn jak, te shunenn tumer gar ap kolende, kai anenn tchingepen mank i patslende un sikrenn o Debleskro drom wawartchandes har kowa, hoi tumende siklo was, un krenn tumaro patsepen paash! Rikrenn tumen lendar pale!