Gosewe laba 11:4 - O Debleskro Drom 2021 (Sinte)

⁴ O brawlepen hi i brawelenge tchi moldo ap ko diwes, kai o Debleskri choli pral i menshende well. Kol menshe, kai an o tchatchepen tardo hi, wenn win lino dran o merepen.

O Debleskro Lab 2024 (Sinte-Manouche)

⁴ O bravlepen hi i bravelenge či moldo ap ko dives, kay o Debleskri rholi pral i menshende vell. Kol menshe, kay an o čačepen tardo hi, venn vin lino dran o merepen.

Gosewe laba 11:4 ပူးပေါင်းရင်းမြစ်များ

1. Mose 7:1

Un o baro Dewel penas ap o Noah: “Dja an ko panjeskro kheer: tu un tiri tseli familja. I tsele menshendar ap i phub hal tu kokres latcho un tchatcho glan mande.

Hiob 20:28

Leskro tselo brawlepen an leskro kheer well krik lino – ap ko diwes, kai well o Debleskri choli pral i tchilatchende har diwje panja.

Gosewe laba 10:2

Tchoredo brawlepen hi tchitcheske. O tchatchepen lell tut dran o merepen win.

Gosewe laba 12:28

O djipen hi kote, kai djan le ap o tchatcho drom. Kau drom hi mishto kerdo un anell gar an o merepen.

Gosewe laba 6:34

I rom, kai silwerell, leskri choli well baro. Un te well ko diwes, kai nai dell lo leske pale, hoi job leske kras, palle krell lo kowa un rikrell pes gar pale.

Jesaja 10:3

Hoi kamenn tumer te krell ap ko diwes, kai well tumari phagi pral tumende? Ap ko diwes, kai well i bibacht fun dural pral tumende? Pash koneste kamenn tumer palle te nashell? Un kai mukenn tumer palle tumaro brawlepen?

Ezekiel 14:14

Ninna te wans kal triin mursha an ko them, o Noah, o Daniel un o Hiob, palle lans jon kokres pengro djipen dran o merepen win, kek wawar lentsa. Jon djiwan an o tchatchepen. Doleske loms len kokres dran o merepen win. Kawa penau me o baro Dewel, tumaro rai.

Ezekiel 7:19

Lengro rup witsrenn le ap o drom, un lengro sonakai hi lenge har tchik. Lengro rup un lengro sonakai nai lell len gar dran o merepen win, ap ko diwes, kai i choli o baro Deblestar pral lende well. Lengro rup un sonakai was tchi-moldo. Jon nai chan les gar, un nai krenn gar pengro per lestar pherdo. Lengro brawlepen his kowa, hoi anas len jaake dur, te peran le o baro Debleskro dromestar tele.

Zefanja 1:18

Lengro rup un sonakai nai lell len gar win dran koi bibacht ap ko diwes, kai o baro Debleskri choli pral lende wella. Leskri bari choli well har i jag pral o tselo them un krell halauter paash. Sik well o merepen pral halauter, kai kote djiwenn.

Mateo 16:26

I mensheske wals kowa gar mishto, te lals lo o tselo brawlepen ap kai phub, un nashrals o djipen. I mensho nai dell tchi o Debleste, te lell lo ko djipen pale.

Louka 12:20

O Dewel penell ap leste: Tu dinelo! Kai rat hunte meress tu. Koon lell tiro tselo brawlepen, hoi tu tuke khetne anal?”

Remarja 5:17

Jaake har ko jek mursh, o Adam, i tchilatcho koowa kras, un o merepen anas ap i tsele menshende, jaake anas ninna jek mensho, o Jesus Kristo, o Debleskro djipen. Ko djipen len kolla, kolen o Dewel dran peskro baro latchepen tchatcho kras glan leste.

1. Timoteo 4:8

Te dikeh ap kowa, te wenn tire mussja un herja soreles, hi kowa gar bud moldo. Te dikeh ap kowa, te well tiro patsepen soreles, hi kowa bud moldo, un tu leh o tchatcho djipen. Ko djipen dell tut o Dewel kanna ap kai phub un an ko tsiro, hoi wella.