Ester 8:14 - O Debleskro Drom 2021 (Sinte)

¹⁴ Un kol bitchepangre i lilentsa klissan sik win ap o rajeskre graja, jaake har o baro rai penas. Un ko tchinlo lab was ninna an o baro rajeskro kheer an o foro Susa ap i kasht dino, te well lo prindjedo.

O Debleskro Lab 2024 (Sinte-Manouche)

¹⁴ Oun kol bičepangre i lilentsa klissan sik vin ap o rayeskre graya, yaake har o baro ray penas. Oun ko činlo lab vas ninna an o baro rayeskro kheer an o foro Susa ap i kasht dino, te vell lo prindjedo.

Ester 8:14 ပူးပေါင်းရင်းမြစ်များ

2. Familjakro liil 30:6

Un o baro rai un i pralstune dan i bitchepangren i lila an o wast. Un kolla nashan an o tselo them Israel un Juda, un dan win gole jaake har o baro rai lenge penas: “Tumer Israelitarja, kai pral atchan un win lino wan dran i wasta kol bare rajendar pral o them Assur, awenn pale pash o baro Debleste, ko Dewel tumare phurendar, o Abraham, o Isaak un o Israel! Palle well job pale pash tumende.

Nehemia 1:1

Kawa hi, hoi pral o Nehemia tchinlo hi, koleskro dad o Hachalja hi. Har his o Artaxerxes an o biishto bersh o baro rai, homs an o tchon Kislew an baro rajeskro kheer an o foro Susa.

Ester 1:2

Leskri rajeskri beshepaskri his tardo an peskro sorelo kheer an o foro Susa.

Ester 2:3

Un bitche murshen an i tsele themma, kai baro rai hal, te anenn le i tsele shukar terne tchen kate an tiro sorelo kheer an o foro Susa, un kote an o djuwjengro kheer. Un de len an o wast ko pralstunestar, o Hegai, kai dell jak ap i djuwjende. Un job mukell lauter ap lende te krell, hoi i djuwjat shukar krell.

Ester 3:13

Koi dren his tchinlo: I tsele bibolde hunte wenn maredo, terne un phure, ninna i tchawe un djuwja, te atchell kek lendar buder djido. Un kowa te well ap jek diwes, ap o deesh-te-triinto diwes an o deesh-te-duito tchon. Kowa hi o tchon Adar. Un i biboldengro koowa nai lell hakeno peske. Un naashepangre wan kharedo, un lenge was penlo, te anenn le kol lila an i tsele themma, kai o Ahasveros baro rai hi.

Ester 3:14

Un o baro rai penas ninna, te hunte wenn kal tchinle laba prindjedo kerdo an hako them, jaake te rikrenn pen i menshe kote ap lende, un djinenn, hoi te krenn le, te well ko diwes.

Ester 3:15

Un kol naashepangre djan sik win, jaake har o baro rai penas. Un an o sorelo kheer an o foro Susa was ko liil kote ap i kasht dino, kai nai dikell les hakeno. Un o baro rai un o Haman beshan pen tele, te chan un pijenn le. O tselo fores Susa tapras i daar.

Ester 8:13

Un an kol tsele themma hunte wan kal tchinle laba prindjedo kerdo, jaake te djinan i menshe kote, te krenn pen i bibolde soreles ko diweske, te djan le ap kolende, kai kamenn len te marell.

Ester 8:15

Un o Mordekai djas win o baro rajestar, rido an rajeskre koola. Kolla his blaueto un parno. Un ap leskro shero his shereskro sonakai. Leskri baja his dran laintikro than un lolo bakrengro bal. Un i menshe an o foro Susa stan un dan gole i bachtjatar.

Sikepaskro 9:10

Halauter, hoi tuke glan o wast well, te kress, kowa kre o tselo djijestar! Pash i mulende, kai tu ninna hunte djas, kote well buder tchi kerdo. Un kek krell peske kote i shero, hoi nai krell lo, har nai djinell lo tchomone, un har nai well lo gosewo.

Daniel 8:2

An miri suni homs an o sorelo kheer an o foro Susa an o them Elam, pash o lengsto pani Ulai.

1. Samuel 21:8

Ap ko diwes his ninna i pralstuno budepaskro o Saulestar an o baro Debleskro kheer. Kowa his i Edomari, un leskro lab his Doeg. Job his o pralstuno pral kolende, kai jak dan ap o Sauleskre bakre.