Ester 4:3 - O Debleskro Drom 2021 (Sinte)

³ Un an hako them, kai o liil o baro rajestar was, his baro ropen mank i bibolde. Un bud kaman buder tchi te chal, rowan un riwan pen an gone un tchiwan jagakri tchik ap pende.

O Debleskro Lab 2024 (Sinte-Manouche)

³ Oun an hako them, kay o liil o baro rayestar vas, his baro ropen mank i bibolde. Oun boud kaman bouder či te rhal, rovan oun rivan pen an gone oun čivan yagakri čik ap pende.

Ester 4:3 ပူးပေါင်းရင်းမြစ်များ

Ester 1:1

His an ko tsiro, har o Ahasveros o baro rai his pral 127 (jek-sheel-te-biish-te-efta) themma, hoi djan o themestar India bis pash o them Etiopia.

Ester 3:12

Ap o 13. (deesh-te-triinto) diwes an o ersto tchon wan kol mursha kharedo, kai o baro rajeskre lila tchinenn. Un kolla tchinan, hoi o Haman lenge penas, an lila ap i pralstunende ko themestar, ap i themeskre rajende un i pralstunende pral hako them. Hako liil his jaake tchinlo, har an ko them tchinlo was, un an ko rakepen, har kote rakedo was. An o lab o baro rajestar Ahasveros wan kol lila tchinlo. Un leskri gustjah was leskro sikepen tel hako liil tchiddo.

Ester 4:16

“Dja koi un de i tsele bibolden an o foro Susa khetne gole! Chan un pijenn triin diwessa tchi, gar ap o diwes, witar gar an i rati. Krenn kowa mange, te dikell o Dewel latches ap mande! Un me un kol djuwja, kai mange budrenn, mer kamah kowa ninna jaake te krell. Un pal kowa kamau pash o baro rajeste dren te djal, ninna te hi khatar o tchinlo lab. Un te denn le man mulo, palle denn le man mulo.”

Ester 4:2

Un jaake was lo bis glan o baro wudar o baro rajeskro kherestar. Un kote atchas lo. Kek, kai his rido an gone, nai djas dren.

Ester 4:4

Un i djuwja, kai i Esterake budrenn un kol pralstune, kai lake koi hi, wan pash late un penan lake kau koowa. Un kote tapras i rani bari daar. Un joi bitchras ripja pash o Mordekai, te riwell lo len an, un te tchiwell lo o gono pestar tele. Un job kamas gar.

Ester 9:31

Mer, o biboldo Mordekai un i rani Ester, mangah tumendar, te rikrenn kol diwessa Purim ap o tchatcho tsiro jaake dren, har mer kowa glan tchinam. Kal laba hi tumenge un tumare tchawenge, kai pal tumende wenna.” An kau liil penan le lenge ninna, har te rikrenn le ko ropaskro tsiro dren, kai rowenn le un chan tchi.

Hiob 2:8

Un o Hiob las i kotar i paash-dino khorestar, te chandjrell lo pes koleha. Un job his beshdo mashkral i jagakri tchik.

Jesaja 22:12

Un ap ko diwes das o baro Dewel, ko rai pral o bolepen un i phub gole: “Rowenn un denn gole, tchinenn tumenge i balla tele, un riwenn tumen an ripja dran gone, te sikrenn, kai khaitell tumen tumari doosh!”

Jesaja 22:4

Doleske penau tumenge: Ma dikenn ap mande! Mukenn man te rowell. Miro dji hi jaake pharo. Ma rakrenn latches ap mande, kamau gar te bistrap koi bibacht, hoi ap mire menshende was.

Jesaja 58:5

Patsenn tumer, kai mange mishto hi, te rikrell pes i mensho pale o chapastar, un mukell peskro shero tele te perell har i phagedo shilftikro halmo? Te pandell lo i gono trul peste un beshell pes an i jagakri tchik? Patsenn tumer, sawo koowa hi mishto mange? Hi kowa tchatchepah i diwes, ap koleste me, o baro Dewel, latches dikau?

Ezekiel 27:30

Hi i bari gole, hoi le pral tute denn, un o djijestar trul tute rowenn. Ap lengre sherja witsrenn le tchik, un tchiwenn pen an i jagakri tchik.

Daniel 9:3

Un me dikom pre pash o Debleste, miro rajeste, un rodom les un mangom les ropah, chom tchi un riwom man an i gono, un witsrom jagakri tchik pral mande.

Jona 3:6

Har o baro rai o forestar Ninive shunas, hoi o Jona rakras, stas lo pre peskro beshepastar, riwas peskri kutch plaashka win, un tchiwas i gono ap peste, un beshas pes an i jagakri tchik.

Mateo 13:42

Un i bolepangre witsrenn len an i bobeskri jag. Kote rowenn le, un dandrenn i danda i dukatar khetne.

Mateo 22:13

Penas o baro rai ap peskre budepangre: Pandenn les ap i pire un ap i wasta, un witsrenn les win an i kali rat! Un kote rowenn le un dandrenn i danda i dukatar khetne.”

Mateo 25:30

Ko budepaskro, kai tchi moldo hi, witsrenn les an i kali rat win! Kote rowenn le, un dandrenn i danda i dukatar khetne.

Josua 7:6

Har o Josua kowa dikas, dukas leskro dji jaake, te kras lo peskre koola, hoi ap leste his, paash, un mukas pes i mujeha ap i phub te perell, – glan o mochton, kai o baro Debleskre deesh laba dren his, un atchas jaake tchiddo bis ap i rat. Ninna i phureder an Israel kran kowa jaake. Un jon witsran tchik ap pengre shere.

1. Samuel 11:4

Koi wan kol mursha, kai dran Jabesh bitchedo wan an o foro Gibea, kai o Saul djiwas, un penan kol laba i tsele menshenge an o foro. Har kolla kowa shunan, rowan le soreles.