Esra 9:8 - O Debleskro Drom 2021 (Sinte)

⁸ Kanna was men i tikno tsiro baro kamlepen dino tutar, maro baro Deblestar. Tu mukal menshen mendar djides un anal men pale kote, kai tu khere hal, te djiwas mer kote kek trashah. Doleske sanenn mare jaka, un newo djipen hi an mende, ninna te ham gomme budepangre.

O Debleskro Lab 2024 (Sinte-Manouche)

⁸ Kanna vas men i tikno tsiro baro kamlepen dino toutar, maro baro Deblestar. Tou moukal menshen mendar djides oun anal men pale kote, kay tou khere hal, te djivas mer kote kek trashah. Doleske sanenn mare yaka, oun nevo djipen hi an mende, ninna te ham gomme boudepangre.

Esra 9:8 ပူးပေါင်းရင်းမြစ်များ

2. Rajengro liil 19:4

O baro rai pral o them Assur bitchras peskro pralstunes, te praassell lo o djido Debles. Har kamoms, te shunell o baro Dewel, tiro Dewel, kol tsele laba, hoi ko mursh penas, un dell les i phagi! Mange o Deblestar kol menshenge, kai pral atchan leskre menshendar, te rikrell lo peskro wast pral lende!’”

Esra 9:9

Mer hams pandle budepangre, un tu, maro Dewel, mukal men gar kokres an maro pandepen. Tu kral, te dikan i raja pral o them Persia latches ap mende, un dal men newi soor, te nai tchiwas mer tiro kheer pale pre, jaake te was dran kol paash dine un chatchede barra i newo kheer tuke. Kowa kral tu, te djiwas mer pale an o them Juda un an o foro Jerusalem kek trashah.

Nehemia 1:11

Ach rai, shun ap miro mangepen un ap o mangepen kolendar, kai ninna tire budepangre hi, kai mangenn tut o djijestar an. Jaake muk kowa mishto te djal, hoi man glan hi, un kre, te dikell o baro rai, o Artaxerxes, latches ap mande.” An ko tsiro homs ko mursh, dran koleskro wast o pipen o baro rajeske was.

Nehemia 9:31

An tiro baro latchepen dal len gar mulo, un mukal len gar. I latcho Dewel hal, un tut hi i baro dji.

Hiob 33:30

te anell lo leskro djipen tele ko dromestar, hoi anell an o mulengro them, un te well lo pale bachtelo pral peskro djipen.

Debleskri gili 13:3

Har rah darap an miro dji? Har rah putchap man darenes hako diwes: Har rah hadell pes kowa pral mande, kai kamell mange tchilatchepen te krell?

Debleskri gili 13:4

Tu, mo Dewel, dik ap mande un shun miro mangepen! Muk man i momeli te dikell, te merap gar!

Debleskri gili 138:7

Ninna te hom an i daar, deh tu man newi soor, un tchiweh tut kolenge an o drom, kai kamenn mange tchilatchepen te krell. Tiri sorjah weh tu ap miri rig.

Debleskri gili 34:5

Me rodom o baro Debles, un job shunas man. Job las man win dran miri tseli daar.

Debleskri gili 85:6

Kameh i tsele tsirja ap mende chojedo te atchell? Mukeh tu buder gar tiri choljatar tele?

Gosewe laba 29:13

O tchorwelo un kowa, kai les tele rikrell, kol dujen hi jek koowa khetne: Kol dujende das o baro Dewel jaka.

Sikepaskro 12:11

I laba, hoi i gosewe rakrenna, hi har subja. Un kowa, hoi le penenn, djal dur an o mensheskro dji. Kowa, kai rakras len, hi har i bakrengro, kai dell garda ap peskre bakre.

Jesaja 1:9

Te mukals o baro Dewel, ko rai pral o bolepen un i phub, gar mendar pral, djals menge har i forjenge Sodom un Gomorra.

Jesaja 14:3

Un an ko tsiro lell o baro Dewel i Israelitarjen win dran lengre duka un lengro ropen un lengri phari budi, hoi jon hunte kran.

Jesaja 56:5

palle dau tut i bar an miro kheer, kai tiro lab dren tchinlo hi. Kowa hi feteder har tchawe un tcha. Kau lab, hoi tut dau, well an kek tsiro bistedo.

Jesaja 57:15

Me, o pralstuno, kai hadedo hom, un hako tsiro djiwau, un kokres o tchatcho Dewel hom, penau: Me djiwau an o pralstunepen an miro bolepaskro kheer, un ninna pash o mensheste, kai i phagedo un tele-rikedo dji an leste hi, te dap pale soor koleste, kai tele rikedo hi, un mukap koles pre te djiwell, koleskro dji phagedo hi.

Jesaja 6:13

Ninna te atchell o deshto kotar gomme koi, djal lenge har i tikne kashta, kai wenn dran i tele-dino ruk. I jag chatchrell len pre. Ko telstuno kotar o rukestar atchell. Un dran leste well newo djipen, hoi hi o Debleske koi.

Jeremia 42:2

un penan ap o Debleskro rakepaskro, o Jeremia: Muk maro mangepen glan tute te well, un mange tiro baro Deblestar kal tsele menshenge, kai pral atchan! Glan i tsiro hams bud, kanna atchan gar bud pral mendar, har tu nai tire jakentsa dikeh.

Jeremia 44:14

Kek kolendar, kai pral atchan an o them Juda, un kate an o them Egiptia wan, te djiwenn le kate, nai nashell krik un atchell djido. Jon wenn buder gar pale an o them Juda, ninna te kamans le pale pale te djal, un kote te djiwell. Kokres i wast pherdo lendar nai nashell peske un nai well kote pale.

Ezekiel 14:22

palle hi sawe koi, kai atchenn djido lendar. Kolla wenn khetne pengre tchawentsa un tchentsa win anlo pash tumende an o them Babilonia. Te dikenn tumer palle, har jon djiwenn, un hoi le krenn, well tumari duk pral koi bari bibacht tikneder, hoi anom pral o foro Jerusalem.

Hosea 6:2

Pal dui diwessa dell lo men newo djipen, un ap o triinto diwes mukell lo men pale ap i pire tardo te well, te nai djiwas glan leste.

Habakuk 3:2

Baro Dewel, me shunom, hoi tu lauter kral, Har baro hal tu, baro Dewel! Kre sawo koowa pale an maro tsiro, sawo baro koowa, muk les men ninna te dikell an maro tsiro! An tiri choli biste gar tiro kamlepen!

Zefanja 3:12

Kokres tchorwele menshen, un sawen, kai rikrenn gar bud pendar, mukau djido an tiro them. Kolla patsenn pengro tselo djijeha ap o baro Debleste.

Zakarie 10:4

Dran lende kokres wenna kolla, kai pral lende penepaske hi, lengre raja un pralstune. Jon hi har kol barra, kai rikrenn o kheer, un har i saster, hoi rikrell i plachteno kheer un har boge o kurepaske.

Zakarie 8:12

Na-a, kanna nai witsrenn le djob an i phub kek darjah. I drakengre ruka hidjrenn drake, i phub anell senlepen win, un o bolepen dell brishin. Un kolenge, kai pral atchan kal menshendar, dau kowa lauter, te atchell kowa lenge.

Zakarie 8:6

O baro Dewel, ko rai pral o bolepen un i phub, penell: “Ninna te patsenn kolla i Israelendar, kai palle pral atchan: ‘Kowa nai well gar’, krau me, te well kowa jaake. Kowa penell o baro Dewel, ko rai pral o bolepen un i phub.”

Remarja 9:27

Pral i Israelitarja rakras o Debleskro rakepaskro, o Jesaja, kol laba: Ninna te wans i Israelitarja jaake bud har i tikne barra pash o baro pani, kol budendar atchella jek wast pherdo pral, un well dran o Debleskri choli win.

Debleskro tsiro 3:12

Kowa, kai soreles an o patsepen atchas, un gar pre das, dran koleste krau me jekes, kai hi har i baro bar, hoi rikrell miro Debleskro kheer. Un kowa atchell koi tardo hako tsireske. Un me tchinau o lab miro Deblestar ap leste, un o lab o Debleskro forestar. Kowa hi o newo Jerusalem, hoi dran o bolepen tele wella. Un miro newo lab tchinau ninna ap leste.

1. Samuel 14:27

O Jonatan shunas gar koi sowel, hoi peskro dad ap i tsele lurdende tchiwas. Un job las peskro kasht un las leha gwin, un chas les. Un sik djas leske feteder.

1. Samuel 14:29

Kote penas o Jonatan: “Miro dad anell bibacht ap maro them. Dikenn, har wom me pale soreles, har chom i mui pherdo gwin.