Esra 4:20 - O Debleskro Drom 2021 (Sinte)

²⁰ Ninna his sorele bare raja an o foro Jerusalem, kai his i raja pral halauter, hoi ap i wawar rig o panjestar Eufrat djiwella, jaake kai was lenge hunte themeskre lowe dino, ninna foreskre lowe un wawar koowa.

O Debleskro Lab 2024 (Sinte-Manouche)

²⁰ Ninna his zorele bare raya an o foro Yerusalem, kay his i raya pral halauter, hoy ap i vavar rig o panyestar Eufrat djivella, yaake kay vas lenge hounte themeskre love dino, ninna foreskre love oun vavar koova.

Esra 4:20 ပူးပေါင်းရင်းမြစ်များ

1. Mose 15:18

Jaake das o baro Dewel o Abrameste ap ko diwes peskro lab, un penas: “Tire tchawen, kai tutar wenna, dau me kau them mank o lengsto pani o themestar Egiptia un o baro lengsto pani Eufrat.

1. Rajengro liil 5:1

Un jaake his o Salomo o baro rai pral i tsele themma, hoi hi tchiddo mank o pani Eufrat un ko them, kai i Filistarja djiwan, un tele bis pash o them Egiptia. Pral kolende his les penepaske, un jon plaissran leske rup un sonakai, jaake rah har job djiwas.

1. Rajengro liil 5:4

Un les his penepaske pral i tsele themma, kai hi ap koi rig o panjestar Eufrat, kai o kham tele djal, o forestar Tifsach bis pash o foro Gaza. Job his o baro rai pral i tsele raja kal themendar. Un les his kek kurepen kol tsele thementsa, kai trul leste his.

1. Familjakro liil 18:13

Un o David tchiwas moskre dren an hako foro an o them Edom. Un o Davides his penepaske pral o tselo them Edom. O baro Dewel his ap o Davideskri rig, kai job ninna djas.

1. Familjakro liil 18:3

O David kuras pes ninna o baro rajeha pral o them Zoba. Leskro lab his Hadad-Eser. Har o Hadad-Eser koi djas, te lell lo o them pash ko pani Eufrat dren, was o David peskre lurdentsa, un das les un leskre lurden pash o foro Hamat.

1. Familjakro liil 18:6

Un job tchiwas moskre dren an lengro them. Un o Davides was penepaske pral i Syrarja, un jon hunte plaissran ap leste, hoi lo lendar kamas. Jaake his o baro Dewel o Davideske ap i rig, kai lo ninna djas.

1. Familjakro liil 19:19

Un kol tsele raja, kolengro pralstuno o Hadad-Eser hi, dikan, kai i Israelitarja i sorleder hi pral lende. Koi mukan le tele, te kurenn le pen o Davideha. Un les was penepaske pral lende. Un kol Syrarja kaman buder gar i lurdenge dran Ammon ap i rig te well.

2. Familjakro liil 17:11

Ninna mank i Filistarja his sawe, kai anan leske kutch koowa, un ko rup, hoi job lendar mangas. Un ninna i Arabarja anan leske 7.700 (efta-serja-efta-sheel) mursh bakre un 7.700 mursh busja.

2. Familjakro liil 9:14

Koi pashel was kol lowe, hoi anan i bikepangre un i parepangre, kai djan dren un win an o them. Ninna anan i tsele bare raja dran o them Arabia un i themeskre raja sonakai un rup o Salomeske.

Esra 4:13

Mer halauter hunte penas o baro rajeske: Kau foro te well newes kerdo, un i massurja hi pale tardo, denn i menshe buder kek themeskre lowe, witar kek foreskre lowe, un wawar koowa witar gar. Kek lowe wenn kolendar pash maro rajeste.

Esra 4:16

Un kanna penah mer o baro rajeske, kai job buder tchi an peskro wast nai rikrella, hoi ap i wawar rig o panjestar Eufrat tchiddo hi, te well kau foro pale newes kerdo, un i massurja pale pre-tchiddo wenn.

Esra 4:19

Un har me les penom, was pal diklo, un halauter hi tchatchepen, hoi tumer mange tchinan, kai hadas pes ko foro pale te pale an o phuro tsiro un anas tchingepen i tsele rajenge, un peras tele lengre rajentsa.

Esra 4:21

Doleske kamau, te penenn tumer kol menshenge soreles, te nai budrenn le gar dureder, te nai well ko foro gar pale pre-tchiddo, jaake rah bis te me penau i wawar lab!

Esra 7:24

Ninna penau tumenge: Kekeste tumendar dau me o tchatchepen, te nai mangell lo themeskre lowe, foreskre lowe un wawar koowa kol rashajendar un kol wawarendar, kai budrenn an o kheer kau Deblestar, har Levitarja, gipangre, mursha, kai jak denn ap i wudja un budepangre.

Debleskri gili 72:8

Un job well o baro rai pral i tsele themma, fun jek baro pani bis pash o wawar baro pani.

Ropaskre gilja 1:1

Jerusalem, har muklo hal koi tchiddo, tu, kai hals pherde menshe! An-diklo hals pash i tsele themma. Kanna hal kokres har i romni, kolakro rom meras. I rajetsa hals pral wawar themma. Kanna hunte budress i wawarenge.

Ezekiel 19:11

Un kolla wan jaake sorelo, te nai krans le rajengre kashta dran lende. Ko bur was baro, bareder har kol wawar ruka trul leste. Hakeno nai dikas, har sorelo job his, un har bud senele kashta les his.

Mateo 9:9

Pal kowa djas o Jesus dureder. Un job dikas i murshes pash i kheer beshdo. Kowa his i biboldo, kai las i biboldendar lowe i Remarjenge dren. Leskro lab hi Mateo. Un o Jesus penas ap leste: “Am, dja mantsa!” Un job stas pre un djas leha.