Esra 3:2 - O Debleskro Drom 2021 (Sinte)

² Un o Jeshua, koleskro dad o Jozadak his, kras pes ap i budi khetne peskre phralentsa, kol rashajentsa, un o mursheha Serubbabel, koleskro dad o Shealtijel his, un leskre phralentsa. Un jon kran i newi sasterni chatchepaskri, te nai chatchrenn le viechen koi pre o Israeleskro Debleske, jaake har tchinlo hi an o liil o Debleskro murshestar, o Mosestar.

O Debleskro Lab 2024 (Sinte-Manouche)

² Oun o Yeshoua, koleskro dad o Yozadak his, kras pes ap i boudi khetne peskre phralentsa, kol rashayentsa, oun o morsheha Zorobabel, koleskro dad o Shealtiel his, oun leskre phralentsa. Oun yon kran i nevi sasterni rhačepaskri, te nay rhačrenn le firhen koy pre o Israeleskro Debleske, yaake har činlo hi an o liil o Debleskro morshestar, o Mosestar.

Esra 3:2 ပူးပေါင်းရင်းမြစ်များ

1. Mose 12:7

Un o baro Dewel mukas pes o Abramestar te dikell, un penas ap leste: “Tire tchawen un kolengre tchawen un lauteren, kai pal tute wenna, kolen kamau kau them te dell.” Koi kras o Abram i chatchepaskri o baro Debleske, kai wenn vieche leske chatchedo – kote, kai o Dewel mukas pes lestar te dikell.

1. Familjakro liil 23:14

I tchawe o Mosestar, ko Debleskro murshestar, wan pash o kheer Levi kharedo.

1. Familjakro liil 3:17

O Jekonja was pandles anlo an o them Babilonia. Leskre tchawe his: o Shealtijel,

1. Familjakro liil 3:19

O Pedaja his o dad dui tchawendar: o Serubbabel un o Shimi. O Serubbabel his o dad kol dui mursh tchawendar, o Meshullam un o Hananja. Un i Shelomit his lengri pheen.

2. Familjakro liil 6:6

Kanna rodom mange Jerusalem win, te wap kote an-mangedo. Un me rodom mange o Davides win, te well job o rai pral mire menshende Israel.’

Esra 10:18

Kalla hi i mursha, kai lan penge romjen kol menshendar, kai kek Israelitarja his: an i familja o murshestar Jeshua, koleskro dad o Jozadak his, un pash leske phralende: o Maaseja, o Elijeser, o Jarib un o Gedalja.

Esra 10:20

Un an i familja Immer: o Hanani un o Sebadja;

Esra 10:21

Un an i familja Harim: o Maaseja, o Elija, o Shemaja, o Jehijel un o Usija;

Esra 10:22

Un an i familja Pashur: o Eljoenai, o Maaseja, o Jishmael, o Netanel, o Josabad un o Elasa;

Esra 2:2

Jon wan khetne kol murshentsa: O Serubbabel, o Jeshua, o Nehemja, o Seraja, o Reelaja, o Mordokai, o Bilshan, o Misperet, o Bigwai, o Rehum un o Baana. Kolla hi i laba kol familjendar, kai wan pale an Israel un kitse mursha an lende his:

Esra 3:8

An o duito bersh har jon pale wan an o foro Jerusalem, un an o duito tchon, kran pen i Israelitarja ap i budi, te tchiwenn le o Debleskro kheer pale pre. O Serubbabel, koleskro dad o Shealtijel his, un o Jeshua, koleskro dad o Jozadak his, un lengre wawar phrala, kolla his i rashaja un i Levitarja, un halauter, kai wan dran pengro pandepen pale an o foro Jerusalem budran khetne ap o Debleskro kheer. Un jon rodan i Levitarjen win, kai biish bersh un phureder his, te denn le jak ap koi tseli budi an o baro Debleskro kheer.

Esra 5:2

Kote kran pen ap i budi o Serubbabel, koleskro dad o Shealtijel his, un o Jeshua, koleskro dad o Jozadak his. Un jon budran dureder ap o Debleskro kheer an Jerusalem. Un lentsa khetne budran o Debleskre rakepangre un dan len soor.

Nehemia 12:1

Un kalla hi i rashaja un i Levitarja, kai wan pale dran o pandepen khetne kol dui murshentsa, o Serubbabel, koleskro dad o Shealtijel his, un o Jeshua: o Seraja, o Jirmeja, o Esra,

Nehemia 12:8

I Levitarja: o Jeshua, o Binnui, o Kadmijel, o Sherebja, o Juda, o Mattanja; jon his i gipangre, kai giwan i sharepaskre gilja.

Debleskri gili 78:68

Na-a, i menshen dran o kheer Juda rodas lo peske win, un koi berga Zion, hoi job o djijestar kamella.

2. Mose 27:1

O Debleskri chatchepaskri kress tu dran o kasht ko rukestar, hoi kharella Akatsia. Pral i tseli chatchepaskri well lolo saster. I chatchepaskri well 2,50 (dui-te-paash) metari lengsto un ninna jaake buchlo, un well 1,50 (jek-te-paash) metari pral. Ap haki pralstuni ekka well i shing win. Kol shinga wenn kerdo dran jek kotar kasht har i chatchepaskri.

Haggai 1:1

An o duito bersh, har o Darius o baro rai his, ap o ersto diwes an o shobto tchon, penas o baro Dewel laba ap peskro rakepaskro, o Haggai, te penell job kal laba dureder ap o Serubbabel, koleskro dad o Shealtijel his, un ap o Jeshua, koleskro dad o Jozadak his. O Serubbabel his o pralstuno pral o them Juda, un o Jeshua his o baro rashai.

Haggai 1:12

Un o pralstuno, o Serubbabel, koleskro dad o Shealtijel his, un o baro rashai, o Jeshua, koleskro dad o Jozadak his, kolla shunan kol laba. Ninna shunan len kol tsele menshe, kai his gar pandles krik anlo. Kol laba penas lenge o Debleskro rakepaskro, o Haggai, koles lengro baro Dewel pash lende bitchras. Un i menshe lan kol laba an o dji, un trashan o baro Deblestar.

Haggai 1:14

Un o baro Dewel tchiwas lenge an o dji, te budrenn le ap o baro Debleskro kheer. Un jaake was o Serubbabel, ko pralstuno pral o them Juda, koleskro dad o Shealtijel his, un o Jeshua, ko rashai, koleskro dad o Jozadak his, un kol tsele menshe, kai gar pandles krik anlo wan, te budrenn le ap o kheer o baro Deblestar, ko rajestar pral o bolepen un i phub.

Haggai 2:21

Pen ap o Serubbabel, ko pralstuneste pral o them Juda: Me krau, te trissell o bolepen un i phub.

Haggai 2:23

O baro Dewel, ko rai pral o bolepen un i phub penell: Ap ko diwes dau me tut, Serubbabel, miro tchatcho wast. Tu hal miro bitchepaskro. Tu hal mange jaake kutch har i gustri, koleha miro lab ap i liil tchiwau. Tut rodom win, te budress mange. Kowa penell o baro Dewel, ko rai pral o bolepen un i phub.

Zakarie 3:1

Un o baro Dewel mukas man te dikell o baro rashajes Jeshua. Kowa his tardo glan o bolepaskro o baro Deblestar. Un ap leskri tchatchi rig his o beng tardo, te tchiwell lo i doosh ap o Jeshua.

Zakarie 3:8

Shun kanna, Jeshua, tu baro rashai: Tu un tire phrala, kai glan tute beshdo hi, tumer han i sikepen, hoi o baro Dewel kamell te krell an o tsiro, hoi wella: Me bitchrau miro budepaskres, kai kharell ‘newo ruk’.

4. Mose 28:2

Pen ap i Israelitarja: Tumer hunte denn jak, te anenn an o tchatcho tsiro ko koowa, hoi denn o Debleste, – ko chapen, hoi well leske chatchedo un koleskro sungepen leske shukar sungella.

Louka 3:27

o Johanan, o Resa, o Serubbabel, o Shealtijel, o Neri,

Čačepangre 6:24

Un o Gideon tchiwas kote barra pre, te krell lo i chatchepaskri, kai wenn vieche chatchedo o baro Debleske, un das lat o lab Jahwe-Shalom. Gomme kau diwes hi koi chatchepaskri kote tardo an o foro Ofra, kai kol menshe djiwenn, kai kharenna Abijesarja.