Efesarja 1:18 - O Debleskro Drom 2021 (Sinte)

¹⁸ Me mangau lestar, te krell lo tumare djia pre, te dikenn tumare djijeskre jakentsa, har baro un shukar kowa hi, hoi job i patslende della ap ko tsiro, kai wenn le pash leste an o bolepen khetne. Job das tumen gole, te lenn kowa lauter.

O Debleskro Lab 2024 (Sinte-Manouche)

¹⁸ Me mangau lestar, te krell lo t'mare djia pre, te dikenn t'mare djiyeskre yakentsa, har baro oun shoukar kova hi, hoy yob i patslende della ap ko tsiro, kay venn le pash leste an o bolepen khetne. Yob das t'men gole, te lenn kova lauter.

Efesarja 1:18 ပူးပေါင်းရင်းမြစ်များ

Hiob 42:5

Ap ko tsiro djinom tchi tutar, har kowa hoi mange penlo was. Kanna dikom tut mire jakentsa.

Debleskri gili 119:18

Kre mange i jaka pre, te nai dikap har shukar hi te djap tiro drom.

Jesaja 11:2

Un ap koleste well o ducho o baro Deblestar tchiddo, un dell les o goswepen, te haiwell lo bud koowa, un djinell, hoi te krell lo. Ko Debleskro ducho dell les ninna i soor koleske, un sikrell les, har o baro Dewel hi, un har te djiwell lo leha.

Jesaja 29:10

O baro Dewel tchiwas i sopaskro ducho ap tumende. O Debleskre rakepangre hunte wans tumare jaka, – o Dewel kras len korelo, un i dikepangre dikenn buder tchi, har te wals i diklo trul lengre jaka pandlo.

Jesaja 29:18

Ap ko diwes shunenn kolla, kai nai shunenn gar, i laba dran i liil. Un i korele nai dikenn un djiwenn buder gar an o kalepen un an i rat.

Jesaja 32:3

Palle nai dikenn halauter pale mishto. Un kolla, kai nai shunenn, krenn pengre kanda pre.

Jesaja 42:7

Tu kress i korelenge i jaka pre, un less i pandlen win dran o stilepen, kai hi le beshdo an i kali rat.

Jesaja 6:10

Rake lentsa, ninna te pandenn le pengre djia, un krenn pengre kanda kashteno, un pengre jaka pandlo. Te dikans le pengre jakentsa, un shunans pengre kandentsa, un haiwans pengre djijentsa, mukans le pengro tchilatcho drom un wans pash mande, un me kroms len sasto.

Mateo 13:15

O Dewel penas: Kalla menshe kamenn gar te haiwell, hoi shunenn le. Jon kamenn gar te shunenn, hoi me penau. Witar gar kamenn le te dikell, hoi tchatcho hi. Te kamans le kowa te dikell, shunans le. Un te shunans le, haiwans le, un wans pash mande. Un me nai kroms len sasto.

Markus 10:17

Har djas o Jesus dureder ap o drom, nashas jek pash leste, peras glan leste tele ap i phub, un putchas lestar: “Latcho sikepaskro, hoi hunte krap, te dell man o Dewel o djipen, hoi gar pre-herella?”

Louka 24:45

Un palle das lo len goswepen, te haiwenn le o Debleskro lab,

Bičepangre 16:14

Koi his i djuwel, kai mangas kote o Debles an. Joi his i bikepaskretsa un bikras ripja dran lolo than. Koja kharas Lydia. Joi his dran o foro Tiatira. Kolake kras o rai Jesus o dji pre. Un joi shunas, hoi o Paulo penas, un was patslo.

Bičepangre 26:18

Tu kress lenge i jaka pre, te wenn jon dran o tamlepen pash i momeli, te less len dran o bengeskro wast win, un te aness len pash o Debleste. Te patsenn le ap mande, palle lell o Dewel lengri doosh lendar krik. Un jon wenn o Debleskre tchawe, un djiwenn leha an o bolepen khetne lauterentsa, kai Debleskre tchawe hi.

Remarja 11:29

Kowa, hoi job della, lell lo gar pale, un kones job gole della, un win rodella, koles tchiwrell lo gar ap i rig.

Remarja 2:4

Hi tuke o Debleskro baro latchepen tchi moldo? Les hi i baro dji un dell i menshen gar sik pre. Djineh tu gar o Debleskro latchepen, hoi kamell tut ap leskro drom te anell?

2. Korintarja 4:4

Jon patsenn gar ap leste. O beng, kai o rai hi pral kai phub, kras len korelo, te dikenn le gar, hawo latchepen well dran o latcho lab o Jesus Kristestar. Ko lab sikrell men o Jesuseskro railepen. Un job hi jaake har o Dewel.

2. Korintarja 4:6

An o phuro tsiro, kai his halauter kali rat, penas o Dewel, te well diwes. Un koi was diwes. Jaake kras lo ninna mare djia pre, te atchas gar tamlo an mare djia, te haiwas mer o Debleskro railepen. Kowa dikah, te dikah ap o Jesus Kristeste.

Galatarja 5:5

Mentsa hi wawartchandes. Mer patsah, te tchiwell men o Dewel an o tchatchepen, te patsah ap o Jesus Kristeste. Ko patsepen dell men o Debleskro Ducho.

Efesarja 1:11

Job kras, te wam mer o Debleskre tchawe. Un ko bolepaskro brawlepen, hoi leskro hi, well ninna maro. Kowa kamas o Dewel glan i rah tsiro jaake. Un lauter, hoi job kamella, krell lo.

Efesarja 1:7

Har o Jesus Kristo ap o trushel meras, un peskro rat menge ratas, las lo mari doosh un phagi mendar. Jaake baro his leskro latchepen ap mende!

Efesarja 2:12

Ap ko tsiro prindjran tumer o Jesus Kristes gar un hans gar o Debleskre menshendar. Ko latcho koowa, hoi o Dewel peskre menshenge penas, te dell lo len, his gar tumenge. Tumer prindjran o Debles gar, un djiwan har an i kali rat un dikan kek momeli glan tumende.

Efesarja 3:16

Un leskri soor hi bari. Doleske mangau lestar, te krell leskro Ducho tumare djia soreles.

Efesarja 3:8

Ninna te hom me o tikneder kol tsele patslendar, das lo man koi shukar budi, te djap pash kolende, kai hi kek bibolde, te penap lenge, hawo baro brawlepen o Jesus Kristes lenge hi,

Efesarja 4:1

Me hom an o stilepen o Jesuseske, maro rajeske, un mangau tumen o djijestar, te djiwenn tumer tumaro djipen har sawe menshe, kolen o Dewel peske khetne gole das.

Efesarja 4:4

Tumer patsle han jek familja. Tumen hi o emligo Debleskro Ducho an tumende. Un o Dewel das tumen gole, te djiwenn tumer lauter leha khetne.

Efesarja 5:8

Glan ko tsiro, har tumer patslo wan, djan tumer ap o tchilatcho drom. Kowa his har te djans an i rati. Kanna hi kowa wawartchandes. Maro rai Jesus djiwell an tumare djia, un anas tumen ap peskro drom. Job hi i bari momeli tumenge. Djan kanna ap leskro drom, kai hi buder kek tamlepen!

Filiparja 3:14

Me nashau ap o Jesuseskro drom dureder, te lap ko shukar koowa, hoi dell o Dewel kolen, kai gar pre dan. Kowa hi o djipen pash leste an o bolepen. Doleske das lo men gole, te djiwas o Jesus Kristeha khetne.

Kolossarja 1:12

Parkrenn tumen o tselo djijestar pash o Debleste, kai hi tumaro dad an o bolepen! Job kras tumen moldo, te djiwenn tumer khetne i wawar patslentsa pash leste an o bolepen, kai hi kek tamlepen.

Kolossarja 1:23

Jek koowa hunte krenn tumer: Atchenn ap o Jesuseskro drom! Patsenn soreles ap leste! Mukenn gar tele, te dikenn ap kowa, hoi tumen hi pash o Debleste! Rikrenn soreles ap leskro latcho lab, hoi tumenge penlo was! Ko lab was penlo ap i tseli phub. Ninna me, o Paulo, hunte penap ko lab i menshenge. Kowa hi miri budi.

Kolossarja 1:27

Kolen sikras o Dewel, har baro un shukar ko drom hi, hoi anell ninna kol menshen pash leste, kai kek bibolde hi. Un ko drom hi o Jesus Kristo, kai djiwell an tumende. Doleske djinenn nai, te djiwenn tumer leha khetne an o bolepen.

Kolossarja 1:5

Tumaro patsepen un kamlepen well dran kowa, kai dikenn tumer ap ko diwes, kai djiwenn tumer o Debleha khetne an o bolepen. Kowa shunan tumer ap ko tsiro, har tumenge o latcho lab o Jesus Kristestar penlo was. Un ko lab hi tchatcho.

Kolossarja 2:2

Kowa krau, te wenn tumer soreles an tumaro dji, un rikrenn khetne an o kamlepen. Ninna kamau, te haiwenn tumer mishto o Debleskro drom, hoi i menshe i rah tsiro gar djinan. Ko drom hi o Jesus Kristo.

Kolossarja 3:15

O Jesus Kristo das tumen pash peste gole, te djiwenn lauter leha khetne. Djiwenn kanna jaake, te han tumer jek dji un jek djipen! Un parkrenn tumen pash o Debleste!

1. Tessalonikarja 5:8

Mer djiwah ap o diwes. Doleske das jak, har te djiwas! Jaake har i kurepaskro riwell i sasterno gad ap peste, te nai dukrell les kek, jaake riwas mer o patsepen un o kamlepen ap mende har i ripen. I kurepaskro tchiwell ninna i sasterni stadi ap peskro shero, te dukrell les kek ap leskro shero. Jaake nai dukrell men kek, te dikah mer ap o Jesus Kristeste, un djinah soreles, te lell men o Jesus Kristo dran o tchilatchepen un o merepen win.

2. Tessalonikarja 1:11

O Dewel rodas tumen win, te djiwenn pash leste. Doleske mangah lestar hako tsiro, te djiwenn tumer kanna jaake ap kai phub, har job kowa peskre tchawendar kamella. Ninna mangah lestar, te dell lo tumen i soor, te nai krenn o latcho koowa, hoi kamenn te krenn dran tumaro patsepen.

2. Tessalonikarja 2:16

O Dewel hi maro dad un kamell men o djijestar. Job hi menge latcho, un penell menge an o dji, te kras lo lauter menge mishto, un te lell lo men pash peste hako tsireske. Lestar mangah un maro rajestar, o Jesus Kristestar,

1. Timoteo 6:12

Jaake har i kurepaskro kurell pes mishto un dell gar pre, jaake dess tu gar tiro patsepen pre, te tapress ko djipen, hoi gar pre-herella. O Dewel das tut gole, te tapress les. Un tu penal glan bud menshende, kai patseh ap o Jesus Kristeste.

Tito 2:13

Un mer dikah ap ko bachtelo diwes, kai well o Jesus Kristo pale an o shukar railepen. Job hi maro baro Dewel, kai las men dran o tchilatchepen win.

Tito 3:7

Jaake tchiwas men o Jesus Kristo an o tchatchepen dran lauter latchepen, te dell lo men ko djipen, hoi gar pre-herella. Un mer djinah, kai lah ko djipen an ko tsiro, hoi wella.

Hebrearja 10:32

Ma bistrenn ko tsiro, kai o Debleskro kamlepen har i momeli an tumare djia was! Ap ko tsiro kran i menshe tumenge o djipen phares. Un tumer lan bud duka ap tumende, un witsran tumaro patsepen gar ap i rig.

Hebrearja 6:4

Hi menshe koi, kolenge kras o Dewel lengre djia pre, te haiwan le leskro bolepaskro latchepen. Un o Debleskro Ducho budras an lengre djia. Un jon haiwan o Debleskro latcho lab un leskri soor an lengro djipen. Kolla te perenn o Debleskro dromestar tele, nai anell len kek pale ap o Debleskro drom. Kowa, hoi jon krenna hi jaake, har te denn le penge o Jesus Kristes pale ap o trushel. Un kol wawar san pral leste.

1. Petro 1:3

Mer sharah o Debles, ko dades maro rajestar, o Jesus Kristestar. O Dewel kamas men jaake bud, te was job maro dad un das men o newo djipen. Un an mare djia djinah soreles, jaake har job o Jesus Kristes i mulendar djido kras,

1. Petro 3:9

Krenn kekeske tchilatchepen, kai kras ap tumende tchilatchepen! Jek te tchingrell ap tumende, ma tchingrenn pale! Rakrenn latche laba leha! O Dewel das tumen gole, te lenn tumer leskro latchepen.

1. Petro 5:10

I tikno tsiro well pharo koowa ap tumende. An kau tsiro lenn tumer i soor, te atchenn ap o Debleskro drom. O Dewel, kolestar well o tselo latchepen, job das tumen gole, te djiwenn hako tsiro khetne o Jesus Kristeha un lenn leskro railepen. Job dell tumen ninna i soor, te atchenn soreles an o patsepen un an o djipen.