Debleskro tsiro 9:21 - O Debleskro Drom 2021 (Sinte)

²¹ Un jon mukan gar pengro bengeskro koowa un pengro wi-ladjedo koowa, un mukan gar tele te marell un te tchorell.

O Debleskro Lab 2024 (Sinte-Manouche)

²¹ Oun yon moukan gar pengro bengeskro koova oun pengro vi-ladjedo koova, oun moukan gar tele te marell oun te čorell.

Debleskro tsiro 9:21 ပူးပေါင်းရင်းမြစ်များ

Jesaja 47:12

Stake glan, pen kol tsele laba pre, hoi te rikrenn i bibacht dur tutar! Kre tiro bengeskro koowa, hoi kral fun tiknes pre! Dik, har tu tut koi nai win leh!

Jesaja 47:9

Well i diwes, kai well kowa lauter pral tute: Tu nashreh tiro romes, un tire tchawe hi mulo. Kowa well sik un soreles ap jek diwes pral tute, ninna te djineh bud drawepangre laba pre te penell, hoi te rikrenn i bibacht dur tutar, un kral bud bengeskro koowa.

Jesaja 57:3

Tumer, kai mangenn chochene deblen an, han har drawepangre, har mursha, kai pash wawar djuwjende djan, un har djuwja, kai lubja hi.

Daniel 11:33

Un kolla, kai gosewo hi mank lende, sikrenn budende o tchatcho drom. Doleske wenn le i tikno tsiro palla lino, un o chareha maredo un jagah chatchedo, un an o stilepen witsedo. Un kowa hoi lengro his, well lenge krik lino.

Maleachi 3:5

Un me kamau pash tumende te well, te wap tumaro tchatchepaskro rai. Un mange nai patsenna, me rakrau o tchatchepen win pral i menshende, kai hadenn man gar: kolla, kai durkrenna, kol mursha, kai chochran pengri romjat, un kol djuwja, kai chochran pengri romes, kolla, kai phagenn pengri sowel, un kolla, kai djan djungeles kolentsa trujel, kai budrenn lenge, un kolla, kai chochenn kol djuwjen, kolengro rom meras, un kolla, kai chochenn kol tchawen, kolen buder kek dad hi, un kolla, kai rikrenn kol wi-themarjen tele, kai djiwenn mashkral tumende. Ko penell o baro Dewel, ko rai pral o bolepen un i phub.

Mateo 15:19

Dran o mensheskro dji well o tchilatcho koowa, hoi an leskro shero trujel djal. Dran leskro dji well, te dell lo i wawares mulo. Te chochell i mursh peskri romjat, well kowa dran leskro dji. Te chochell i djuwel peskro romes, well kowa dran lakro dji. Dran o dji wella o wi-ladjedo koowa, o tchorepen, o chochepen, un o praassepen.

2. Korintarja 12:21

Me trashau te ladjap man tumenge glan o Debleste ap ko diwes, kai wau pale pash tumende, un te well mange ropaske pral budende, kai kamenn pengro phuro djipen gar pre te dell, un djiwenn an djungelo un wi-ladjedo koowa un lubrenn pen trujel jaake har kran le an ko tsiro, har jon gomme gar patslo his.

Galatarja 5:20

Jon mangenn wawar koowa an har o Debles. Jon durkrenna. Jon kurenn pen un tchingrenn pen. Jon silwerenna, un len hi choli ap i wawarende. Jon dikenn ap pende kokres, te djal lenge mishto, un dikenn gar ap i wawarende, te djal lenge ninna mishto. Jon mukenn pengre phralen un djan wawarentsa khetne.

Debleskro tsiro 13:13

un das koles i soor, te krell job baro koowa, jaake baro, te mukas lo ninna i jag dran o bolepen glan i menshende tele te perell. Un kowa kras lo, te anell lo i menshen ap i phub ap o bengeskro drom. Job penas lenge, te krenn le penge i vieches, hoi wi-dikella har ko viecho, kai les his o tchinepen o charestar, un dran kowa meras, un pale djido was.

Debleskro tsiro 13:15

Un ko duito viecho las i soor, te krell lo ko vieches djido, hoi i menshe penge kran, jaake te nai rakrell kowa ninna, un te nai krell job, te wenn lauter maredo, kai les gar an-mangenna.

Debleskro tsiro 13:7

Un o Dewel mukas o vieches te kurell lo pes o Debleskre menshentsa, un mukas, te well lo sorleder har jon. Un kol vieches was i soor pral i menshende dran hake themma, haki natsjona, haki harmenatsjona un hako rakepen.

Debleskro tsiro 14:8

Un i duito wawar bolepaskro was pal leste, un penas: “O baro foro peras khetne. O baro foro Babilon peras khetne, ko foro, hoi anas i menshen an i tsele themma ap peskro drom, te kran le wi-ladjedo koowa. Kowa his jaake har te das lo len mool te pijell. Doleske was o Debleskri choli pral o foro.”

Debleskro tsiro 16:6

Jon maran tire menshen, ninna tire rakepangren, un mukan lengro rat te nashell. Un kanna hunte pijenn le o rat. Kowa hi lengri phagi.”

Debleskro tsiro 17:2

I bare raja ap kai phub tchiwan pen lah khetne. Ko wi-ladjedo koowa, hoi koi djuwel kras, hi har i mool, hoi pijan kolla, kai ap i phub djiwenna, un latar mato wan.”

Debleskro tsiro 17:4

Un koi djuwel his rido an i kutch lolo ripen. Un ap late hi sonakai un kutch barra un mirklia. Un lat his i sonakaskro khoro an lakro wast, pherdo djungelo koowa un sawo koowa, hoi hi pale-tchiddo glan o Debleste. Kau koowa was dran lakro wi-ladjedo djipen.

Debleskro tsiro 17:5

Un ap lakro shero his i lab tchinlo, hoi i menshe gar haiwan: “Koi bari Babilon, kolatar wella hako djunglepen un wi-ladjedo koowa ap i phub.”

Debleskro tsiro 18:3

I Babilon tserdas i menshen an hake themma an bipandlo un wi-ladjedo koowa. Kowa his har mool, hoi i menshe pijan. Un i bare raja ap kai phub tchiwan pen lah khetne. Un i bikepangre un i parepangre wan brawelo dran lakro brawlepen.”

Debleskro tsiro 19:2

Latcho un tchatcho hi lo. I phagi, hoi job i menshen das, hi mishto un tchatcho. Job das i bari lubjat lakri phagi. Joi tserdas i menshen ap i tseli phub an wi-ladjedo koowa un maras o Debleskre budepangren. O Dewel das lat ko tchilatchepen pale, hoi joi ap lende kras.”

Debleskro tsiro 21:8

Kol wawar djan an i bari jag, hoi soreles chatchella un khandella. Kote merenn le o duito kopo. Jon hi kolla, kai i darjatar gar mantsa djan, kolla, kai phukran ap pengro patsepen, kolla, kai djungelo koowa kran, kolla, kai maran wawaren, kolla, kai lubran pen trujel, kolla, kai bengeskro koowa kran, kolla, kai mangan wawar koowa an har o Debles, un i tsele chochene.

Debleskro tsiro 22:15

Win hi kolla, kai mukan o Debleskro drom, kolla, kai kran bengeskro koowa, kolla, kai lubran trujel, kolla, kai maran wawaren, kolla, kai mangan wawar koowa an har o Debles, un hakeno, kai kamell un krell o chochepen.

Debleskro tsiro 9:20

Un kol wawar menshe, kai gar maredo wan, kolla mukan gar pengro tchilatcho drom, un mukan gar tele, te mangenn le kowa an, hoi jon pen pengre wastentsa kran. Jon mukan gar tele, te mangenn le i bengen an, witar gar kol figuren dran sonakai, rup, saster, barra un kasht, hoi gar nai dikenna, un gar nai shunenna, un gar nai nashenna.