Debleskro tsiro 6:12 - O Debleskro Drom 2021 (Sinte)

¹² Un me dikom, har o terno bakro i shobti dori pre pandas, hoi ko liil khetne rikras. Koi trissas i phub soreles. Un o kham was kalo har i kalo gono. Un o tselo tchon was lolo har o rat.

O Debleskro Lab 2024 (Sinte-Manouche)

¹² Oun me dikom, har o terno bakro i shobti dori pre pandas, hoy ko liil khetne rikras. Koy trissas i phoub zoreles. Oun o kham vas kalo har i kalo gono. Oun o tselo čon vas lolo har o rat.

Debleskro tsiro 6:12 ပူးပေါင်းရင်းမြစ်များ

Jesaja 24:23

Un o tchon well lolo i ladjatar, un o kham ladjell pes un khatrell pes. O baro Dewel, ko rai pral o bolepen un i phub, well o baro rai ap i berga Zion an o foro Jerusalem. Un i phureder dikenn leskro railepen.

Jesaja 29:6

well o baro Dewel, o rai pral o bolepen un i phub, un lell tumen win dran lengre wasta. Job wella bari goljah un mukell i phub trissell. Un o bolepen dell gole, un i sorelo ducho phurdell pral i phub, un bari jag chal trul peste.

Jesaja 34:4

Un i tsele bolepangre momlia perenn khetne. Un o bolepen tserdell pes khetne har i liil, hoi well khetne lino. Un kol bolepangre momlia perenn tele har mule patria ap o drakengro ruk un har faige, hoi gar bares wan ap i faigetikro ruk.

Jesaja 50:3

Me riwau o bolepen an kalepen, jaake te hi lo, har hidjrals lo kales jekeske, kai meras.

Joel 2:10

I phub un o bolepen trissenna glan lende, o kham un o tchon wenn kalo, un i bolepangre momlia chatchenn buder gar.

Amos 1:1

Kawa hi, hoi sikras o Dewel o Amoseske pral o kheer Israel an ko tsiro, kai o Usija o baro rai his pral o them Juda. Un o Jerobeam, koleskro dad o Joash hi, his o baro rai pral Israel. His dui bersha glan ko tsiro, kai i phub soreles trissas un pre phagas. O Amos was dran o foro Tekoa un his jek kolendar, kai dan jak ap i bakrende.

Amos 8:9

O baro Dewel, maro rai, penell: An ko diwes djal o kham tele mashkral o diwes. Un mashkral o diwes well i rati pral o them.

Zakarie 14:5

Koi tala djal jaake dur har Azel. An koi tala mank o baro Debleskre berge nashenn tumer tumenge jaake, har tumare phure nashan penge, har i berge trissan an ko tsiro, kai o Usija o baro rai pral o them Juda his. Un palle well miro baro Dewel. Un leskre tsele bolepangre wenn khetne leha.

Mateo 11:21

Un job penas: Bibachtelo wenna tumer menshe an o foro Korazin! Bibachtelo wenna tumer menshe an o foro Betsaida! Te krals jek an i forja Tirus un Sidon sawo baro koowa an o Debleskri soor, har me pash tumende krom, riwans i menshe kote i gono trul pende, un tchiwans jagakri tchik ap pengre shere, te sikrenn le, kai lengro tchilatchepen khaitell len. Un jon mukans pengro tchilatcho drom, un djans ap o Debleskro drom.

Mateo 24:29

Un sik pal kol tchilatche diwessa, well o kham kalo har i rat, un o moonto dikell kek buder. Un i bare momlia ap o bolepen perenn tele. Un i bolepaskri soor perell khetne.

Mateo 24:7

I pralstune pral bare themma kurenn pen i wawar pralstunentsa. Un i menshe dran jek them marenn kolen an i wawar them. An bud themma hi i menshen gar doha te chal. Un kate un kote well i phub trisslemen.

Mateo 27:45

His deesh-te-dujenge, koi was o diwes kalo har i rat an o tselo them. Un kowa atchas jaake bis trinenge.

Mateo 27:54

Ko pralstuno lurdo un kol wawar, kai khetne leha ap o Jesuseste jak dan, kolla dikan, te was i phub trisslemen, un hoi lauter koi djas. Koi tapras len i bari daar. Un jon penan: “Kau mursh his tchatchepah o Debleskro tchawo.”

Mateo 28:2

Ap jek kopo was i phub soreles trisslemen. Un o Debleskro bolepaskro was dran o bolepen, tchiwas ko baro bar glan o mulengro kheer ap i rig, un beshas pes koi pre.

Markus 15:33

His deesh-te-dujenge, koi was o diwes kalo har i rati an o tselo them. Un kowa atchas jaake bis pash trinenge.

Debleskro tsiro 11:13

Un ap jek kopo trissas i phub soreles. Un o deshto kotar ko forestar peras khetne. Un efta serja (7.000) menshe wan maredo. Un kol wawaren tapras i bari daar, un jon sharan o Debles, kai an o bolepen hi.

Debleskro tsiro 16:18

Koi das i jag dran o bolepen karje pre te tele, un was i bari gole win, har koi gole, hoi o bolepen krella, te dell baro brishin un te djal jag tele ap i phub. Un i phub trissas jaake soreles, har dikan le kowa gar jaake rah, har menshe ap i phub hi.

Debleskro tsiro 16:8

Un o starto bolepaskro tchoras peskro tcharo win pral o kham. Un o kham las i soor, te nai chatchrell lo i menshen.

Debleskro tsiro 8:12

Un o starto bolepaskro phurdas an peskri phurdepaskri. Un o kham las i dap, un o triinto kotar lestar was kalo. Ninna o tchon un i wawar bolepangre momlia lan i dap. Un o triinto kotar lendar was kalo. Jaake chatchas o kham gar ap o triinto kotar ap o diwes, witar gar chatchan o tchon un i bolepangre momlia ap o triinto kotar an i rat.

Debleskro tsiro 8:5

Un ko bolepaskro las ko tcharo, an koleste ko gudlo kasht chatchedo wella, un kras les pherdi jag, hoi job dran o Debleskri chatchepaskri las, un tchoras o tcharo win ap i phub. Koi das jag karje pral un tele, un das bari soreli gole, har koi gole, hoi o bolepen krella, te dell baro brishin, un te djal jag tele ap i phub. Un i phub trissas soreles.