Debleskro tsiro 4:7 - O Debleskro Drom 2021 (Sinte)

⁷ Un ko glanstuno sorelo bolepaskro his har i bari margodja. Un ko duito sorelo bolepaskro his har i terni murshkani grumni. Un ko triinto sorelo bolepaskres his i mui har i menshes hi. Un ko starto sorelo bolepaskro his har i baro tchirklo an o bolepen.

O Debleskro Lab 2024 (Sinte-Manouche)

⁷ Oun ko glanstouno zorelo bolepaskro his har i bari margodja. Oun ko douyto zorelo bolepaskro his har i terni morshkani groumni. Oun ko triinto zorelo bolepaskres his i mouy har i menshes hi. Oun ko starto zorelo bolepaskro his har i baro čirklo an o bolepen.

Debleskro tsiro 4:7 ပူးပေါင်းရင်းမြစ်များ

1. Mose 49:9

Miro tchawo, tu hal sorelo har i terno lewo, kai hi tchalo o viechestar, hoi maras lo, un djal pale, kai lo khere hi, beshell pes un tchiwell pes tele. Un hakenes hi daar, te taprell lo les an.

2. Samuel 1:23

O Saul un o Jonatan, an lengro djipen kamam len un lengro baro dji. An lengro merepen hi le khetne. Jon his sikeder har i tchirklo un sorleder har i lewo.

Gosewe laba 28:2

Te hi bud tchilatchepen an o them, wenn ninna bud raja pre. Te well sawo mursh o rai, kai djinell bud un haiwell lauter mishto, palle hi o tchatchepen i rah tsiro an o them.

Jesaja 40:31

Kolla, kai ap o baro Debleste dikenn, lenn newi soor. Jon hadenn pen har bare tchirkle hadenn pen pengre mussjentsa. Jon nashenn un lengri soor djal gar krik. Jon djan trujel un wenn gar khino.

Ezekiel 1:10

Pash hakeneste kol starendar dikas o shero ap i glanstuni rig win har i mensheskro shero, ap i tchatchi rig har i leweskro shero, ap i serwi rig har i gurumeskro shero, un ap i palstuni rig har o shero fun i adlari.

Ezekiel 1:8

Ap lengre star rigja his len menshengre wasta tel lengre tchirklengre mussja, tel haki tchirklengri mussi jek wast. Hakenes kol starendar his jaka un i mui ap hake star rigja leskro sherestar. Un hakenes his star tchirklengre mussja.

Ezekiel 10:14

Un hakenes kol bolepangrendar his i shero, kai his ap hake star rigja jaka un i mui. Ap i glanstuni rig dikas lo win har i bolepaskro, ap i duiti rig har i mensho, ap i triinti rig har i lewo, ap i starti rig har i adlari.

Ezekiel 10:21

Hakenes lendar his jaka un i mui ap hake star rigja leskro sherestar. Un hakenes his star tchirklengre mussja, un tel kol tchirklengre mussja har wals len menshengre wasta.

Daniel 7:4

O ersto his har i lewo, un les his tchirklengre mussja har i adlari. Un me dikom, har i bare tchirklengre mussja lestar krik lino wan. Un ko viecho was pre hadedo i phubjatar, un pre-tchiddo ap peskre pire har i mensho. Un les was o dji i menshestar dino.

Obadja 1:4

Te krals tu ninna tiro kheer dur pral ap i berga har i adlari, jaake te dikell kowa win, har te wals tiro kheer mashkral i bolepangre momlia, djiness, me witsrau tut tele, penell o baro Dewel.

4. Mose 23:24

Kai natsjona hi har i terni bari margodja, un well sorelo har i bari margodja, hoi tchiwell pes gar tele, bis te chas li pre, hoi joi maras, un pijas ko rat kolendar, hoi joi mulo das.

4. Mose 24:9

O Israel tchiwas pes tele har i bari margodja, awa, har i terni bari margodja. Kek kamell lat pre djangrell. Bacht un soor well koles, kai rakrell i bacht pral tute win, Israel! Un bibacht well ap koleste, kai rakrell i bibacht win pral tute.

1. Korintarja 14:20

Mire phrala, ma awenn har tikne tchawe, kai gomme gar bud djinenna. Awenn gosewo har i phure! Pash tchilatcho koowa, awenn har tikne tchawe, hoi o tchilatchepen gar haiwenna!

5. Mose 28:49

Menshen dran i dur them, fun i wawar rig i phubjatar, anell lo pral tumende. Sik har i baro tchirklo wenn le pral tumende. Lengro rakepen haiwenn tumer gar.

Debleskro tsiro 4:6

Glan o rajeskro beshepaskro his tchomone har i baro pani dran wali. Kowa his jaake djudjo, te dikenn le nai dren, har dikenn le an i wali. Trul o rajeskro beshepaskro his star sorele bolepangre, jek ap haki rig. Kolla his pherde jaka glan un palla.

Debleskro tsiro 6:3

Un o bakro pandas o duiti dori pre, hoi ko liil khetne rikras. Un me shunom, har ko duito sorelo bolepaskro penas: “Ab!”

Debleskro tsiro 6:5

Un o terno bakro pandas i triinti dori pre, hoi ko liil khetne rikras. Un me shunom, har o triinto sorelo bolepaskro penas: “Ab!” Un me dikom i kalo grajes. Un kowa, kai pre beshdo his, koles his jek koowa an peskro wast, hoi sikrella, har pharo tchomone hi.

Debleskro tsiro 6:7

Un o terno bakro pandas i starti dori pre, hoi ko liil khetne rikras. Un me shunom, har o starto sorelo bolepaskro penas: “Ab!”