Debleskro tsiro 14:10 - O Debleskro Drom 2021 (Sinte)

¹⁰ Jon hunte pijenn o Debleskri mool. Kai mool hi o Debleskri choli. Kaja hi jaake soreli har i mool, kai kek pani dren hi. Kolla, kai mangenn o vieches an, hunte djan an i bari jag. Un koi jag un i jagakri khand krenn lenge bare duka. Un jon dikenn o Debleskre bolepangren un o terno bakres.

O Debleskro Lab 2024 (Sinte-Manouche)

¹⁰ Yon hounte piyenn o Debleskri mool. Kay mool hi o Debleskri rholi. Kaya hi yaake zoreli har i mool, kay kek pani dren hi. Kolla, kay mangenn o firhes an, hounte djan an i bari yag. Oun koy yag oun i yagakri khand krenn lenge bare douka. Oun yon dikenn o Debleskre bolepangren oun o terno bakres.

Debleskro tsiro 14:10 ပူးပေါင်းရင်းမြစ်များ

1. Mose 19:24

Koi mukas o baro Dewel jag un jagakri khand pral i forja Sodom un Gomorra te perell dran o bolepen.

Hiob 18:15

An leskro kheer djiwenn palle kolla, kai gar lestar wenn. Un ap leskro kheer wenn jagakre barra witsedo.

Hiob 21:20

un dikell peskre jakentsa peskri bibacht, un haiwell kokres, har kowa hi, te well o sorelo Debleskri choli ap leste.

Debleskri gili 11:6

Mu dell lo i tchilatchen i phagi: Jag un jagakri khand mukell lo pral lende te perell, un i tato ducho phurdell ap lende.

Debleskri gili 37:34

Dik ap o baro Debleste, te well lo ap tiri rig! Un atch ap leskro drom! Palle hadell lo tut un dell tut ko them. Un tu dikeh, har wenn i tchilatche maredo.

Debleskri gili 52:6

Tu kameh laba, hoi phagenn, un rakreh dui tchipjentsa.

Debleskri gili 60:3

Miro Dewel, tu tchiwal men pale, un tradal men kate te kote. Bari choli hi tut ap mende. Rake mentsa pale latches!

Debleskri gili 73:10

Doleske nashenn lenge leskre menshe palla, un pijenn lengre laba har pani.

Debleskri gili 75:8

Na-a, o Dewel hi o tchatchepaskro rai, kai ko jekeske i soor krik lell, un o wawares bares krell.

Debleskri gili 91:8

Awa, tire jakentsa dikeh tu les. Tu dikeh har i tchilatche lenn pal kowa, hoi jon kran.

Jesaja 29:9

Krenn dureder, har te wans dinelo an o shero! Krenn dureder, har te wans korelo ap i dui jaka! Tumer han mato – un pijan kek mool. Tumer perenn jek rigjatar ap i wawar – un pijan kek sorelo pipen.

Jesaja 30:33

I rah tsiro hi i chatchepaskri platsa kerdo, dur tele djal li un buchles hi li. Ninna o baro rajeske hi li kerdo. Jag hi koi un bud kashta chatchepaske. Un o ducho o baro Deblestar phurdell soreles koi pre, un krell i jag, hoi lauter pre chatchrella.

Jesaja 34:9

Un kol panja, hoi nashenn an o them Edom, wenn har pesso kalo djet, un leskri phub chatchrell un well djelti jagakri tchik. Ko tselo them well pesso kalo djet,

Jesaja 51:17

Ste pre! Ste pre! Hade tut, Jerusalem! Tu pijal dran o baro Debleskro khoro, hoi his pherdi leskri choli. Tu hunte pijal ko khoro win, bis te tchi buder an leste his. Kolestar wal har jek, kai hi mato, un nai well buder gar tardo ap peskre herja.

Jeremia 25:27

Un o baro Dewel penas mange: Pen lenge: Kowa hi, hoi penell o baro Dewel, ko rai pral o bolepen un i phub, kones i Israelitarja an-mangenn: Pijenn, te wenn mato un hunte tchadenn, bis te perenn tele un nai stenn gar buder pre! Perenn an o charo, hoi bitchrau mank tumende!

Jeremia 49:12

Shunenn mishto, tumer Edomarja, penell o baro Dewel. Dran ko khoro, kai hi pherdo miri choli, hunte pijan ninna kolla, kai kek tchilatchepen kran. Un tumer kamenn, te well kek phagi ap tumende? Na-a, tumer lenn tumari phagi. Tumer hunte pijenn ko khoro ninna!

Jeremia 51:57

O baro Dewel penell: Me krau len mato, kol pralstunen an Babilon, kol gosewe murshen, themeskre rajen, pralstune lurden, un kol wawar lurden an Babilon, te perenn le an i sopen, kolestar jon buder gar pre stenn. Kowa penell o baro rai, koleskro lab hi: baro Dewel, ko rai pral o bolepen un i phub.

Ropaskre gilja 4:21

Awa, san tumenge un khelenn, tumer Edomarja an o them Uz! Pash tumende well ninna ko khoro pherdo o Debleskri choli, hoi hunte pijenn, bis te wenn mato un riwenn tumen win.

Ezekiel 38:22

Un me dau les peskri phagi: I pharo nasslepen un marepen well ap leste. Un sorelo brishin, brishineskre barra, un jag un shwefla mukau ap lende tele te well, ap leste un ap leskre lurdende, un ap kol bud lurdende dran wawar themma, kai leha djan.

Habakuk 2:16

Tu anal ladj ap tute un kek sharepen. O baro Dewel dell tut dran leskro khoro pherdi peskri choli te pijell. Kanna pi, bis te nai rikreh tut buder gar ap tire pire! Palle well i ladj pral tute, un tiro railepen hi gar buder.

Mateo 20:22

Penas o Jesus: “Tumer djinenn gar, hoi mangenna mandar. Nai lenn tumer kol duka ap tumende, hoi me hunte lap ap mande?” Penan le: “Awa, ko nai krah mer.”

Mateo 25:41

Un palle penell job kolenge, kai ap leskri serwi rig tardo hi: Tumer han tel o Debleskro praassepen tardo! Djan tumenge! Djan an koi jag, hoi chatchella hako tsiro, un hoi hi o bengeske un leskre kurepangre kerdo!

Mateo 26:39

Un job djas i kotar drom dureder, witsras pes ap i phub, un mangas o Debles: “Mo dad, te kameh tu, muk kek duka un merepen ap mande te well! Mangau tut: Ma kre, har me kamau! Kre jaake, har tu kameh!”

Markus 8:38

I menshe an kau tsiro hi tchilatcho un mukan o Debles. Kowa, kai ladjell pes mange un mire labenge glan kolende, koleske ladjau me ninna, te wau me, o Mensheskro Tchawo, pale ap i phub. Ap ko diwes hi man o railepen, hoi das man miro dad an o bolepen. Un mantsa wenna o Debleskre bolepangre.

Bičepangre 10:22

Penan le: “O Kornelio, ko pralstuno i lurdendar, bitchras men. Kowa hi i latcho mursh, un patsell ap o Debleste. I tsele bibolde rakrenn latches pral leste. I Debleskro bolepaskro penas ap leste, te lell job tut an peskro kheer, un te shunell job, hoi tu leske kameh te penell.”

5. Mose 29:23

Palle penenn i menshe dran i tsele wawar themma: “Hoske kras o baro Dewel kawa kau themeha? Hoske was lo jaake chojedo?”

2. Tessalonikarja 1:7

Tumer, kai wenn kanna palla lino, tumen dell lo i bari bacht. Kowa dell lo tumen mentsa khetne ap ko diwes, kai well maro rai Jesus pale dran o bolepen, un lauter dikenn les. Leskre sorele bolepangre wenn leha,

Judas 1:7

Jaake lan ninna kol menshe i phagi, kai djiwan an i forja Sodom un Gomorra un an kol forja trul lende. Jon kran wi-ladjedo koowa har kol bolepangre un djan wawar mass palla. I phagi, hoi pral kol menshende was, sikrell mende, hoi kolenge djal, kai sawo koowa krenna. Jon djan an i jag, hoi hako tsiro chatchella.

Debleskro tsiro 15:7

Kote his ninna kol star sorele bolepangre tardo. Un jek lendar das kol efta bolepangren efta sonakangre tchare an lengre wasta. An kol tchare his i choli o Deblestar, kai djiwell kanna un hako tsireske.

Debleskro tsiro 16:19

Un o baro foro phagas an triin kotja. Un i forja an i wawar themma peran khetne. O Dewel bistras ko baro foro Babilon gar, un mukas i menshen kote peskri choli te pijell har mool.

Debleskro tsiro 18:3

I Babilon tserdas i menshen an hake themma an bipandlo un wi-ladjedo koowa. Kowa his har mool, hoi i menshe pijan. Un i bare raja ap kai phub tchiwan pen lah khetne. Un i bikepangre un i parepangre wan brawelo dran lakro brawlepen.”

Debleskro tsiro 18:6

Krenn ap late jaake, har joi ap tumende kras! Denn lat dui kope jaake bud tchilatchepen pale, har joi ap tumende kras! Denn lat i pipen te pijell, hoi hi dui kope sorleder har kowa, hoi joi das tumende te pijell!

Debleskro tsiro 19:15

Un dran leskro mui well i charo win, hoi latches tchinella. Koleha kurell lo pes i menshentsa an i tsele themma, un well sorleder har jon. Job anell len i sasterno wasteha. Jaake har jek i drake paash stakrella, te well i mool win, jaake stakrell lo kolen paash, kai gar ap leste shunenna, un anell i choli o sorelo Deblestar ap lende.

Debleskro tsiro 19:20

Un ko viecho was tapedo, ninna leskro chocheno rakepaskro. Ko rakepaskro kras bud baro koowa, un anas kolen ap o bengeskro drom, kai o viecheskro lab ap pende lan, un ko vieches an-mangan, hoi i menshendar kerdo was. Un djides wan kol dui an i bari jag witsedo, hoi soreles chatchella un khandella.

Debleskro tsiro 20:10

Un o beng, kai anas len ap peskro drom, well an i bari jag witsedo, hoi soreles chatchella un khandella. Kote hi ninna o viecho, un ko chocheno rakepaskro. Kote well len hako tsiro bare duka.

Debleskro tsiro 20:14

Un o merepen un o mulengro them wan an i bari jag witsedo, ninna hakenes, koneskro lab gar an o djipaskro liil dren tchinlo hi. Koon an i bari jag witsedo wella, merell o duito kopo.

Debleskro tsiro 21:8

Kol wawar djan an i bari jag, hoi soreles chatchella un khandella. Kote merenn le o duito kopo. Jon hi kolla, kai i darjatar gar mantsa djan, kolla, kai phukran ap pengro patsepen, kolla, kai djungelo koowa kran, kolla, kai maran wawaren, kolla, kai lubran pen trujel, kolla, kai bengeskro koowa kran, kolla, kai mangan wawar koowa an har o Debles, un i tsele chochene.