Debleskri gili 1:3 - O Debleskro Drom 2021 (Sinte)

³ Kowa hi har i ruk, hoi tardo hi pash o pani. Ap o tchatcho tsiro wenn leskre rukengre baro. Un leskre patria atchenn senelo. Lauter, hoi job krella, djala mishto.

O Debleskro Lab 2024 (Sinte-Manouche)

³ Kova hi har i rouk, hoy tardo hi pash o pani. Ap o čačo tsiro venn leskre roukengre baro. Oun leskre patria ačenn zenelo. Lauter, hoy yob krella, djala mishto.

Debleskri gili 1:3 ပူးပေါင်းရင်းမြစ်များ

1. Mose 39:23

Jaake rah, har lauter an o Josefeskro wast his, hunte kras o pralstuno pral o stilepen tchi. O baro Dewel his pash o Josefeste un das les bacht an halauter, hoi job kras.

1. Mose 39:3

Har leskro rai Potifar dikas, kai o baro Dewel pash o Josefeste his un les bacht das an lauter, hoi job peskre wastentsa kras, his job latches ap leste.

2. Rajengro liil 18:7

O baro Dewel his leha, un halauter hoi lo peske glan las, djas leske mishto. Un job peras tele o baro rajestar pral o them Assur, un mukas koles buder gar peskro rai te well.

1. Familjakro liil 22:11

Kanna, miro tchawo, mu well o baro Dewel ap tiri rig, te nai kreh tiro baro Debleske i kheer, jaake har job tutar penas.

1. Familjakro liil 22:13

Te rikreh tut ap kol laba, hoi o baro Dewel o Moseske penas, te djiwell o Israel koi pal, un kreh pal o Debleskro tchatchepen, palle djal tuke tiri budi mishto. Ab sorelo! Un ma traash! Ma dare tchi! Un ma traash kekestar!

2. Familjakro liil 31:21

Un halauter, hoi job kras, te well koi budi an o Debleskro kheer jaake kerdo har glan tchinlo hi, kowa kras lo peskro tselo djijeha. Job rodas, te krell lo, hoi peskro Dewel lestar kamas. Doleske mukas o baro Dewel kowa leske mishto te djal.

2. Familjakro liil 32:23

Bud menshe anan tchomone o baro Debleske an o foro Jerusalem un shukar un kutch koowa o baro rajeske an Juda, o Hiskija. Kau tsirestar his lo bares an-diklo kol menshendar an i tsele wawar themma.

Hiob 14:9

te perell pani ap leste, well lo pale senelo, ninna te hi kowa gar bud pani. Un newe tikne kashta wenn dran leste, har te wals lo i terno ruk.

Hiob 22:28

Hoi tu tuke glan lal, kowa djal tuke mishto. Un i momeli djal pre pral tire dromma.

Debleskri gili 128:2

Tu chah kolestar, hoi tire wasta budran. Mishto tuke! Tuke djal latcho.

Debleskri gili 129:8

Un kek, kai kote ap o drom djal, penell ap lende: “O baro Debleskri bacht well ap tumende! Mer rakrah bacht pral tumende an o baro Debleskro lab.”

Debleskri gili 92:14

Jon hi har ruka, kai hi tardo an o baro Debleskro kheer, un kai wenn senelo ap i platsa glan o Debleskro kheer.

Debleskri gili 92:15

Ninna te wenn le phuro, hi le senele, pherdi soor, un rukengre wenn ap lende baro.

Jesaja 27:11

Un lengre kashta wenn truk un phagenn tele. Un djuwja wenn un lenn len, te krenn le i jag. Kal menshe haiwan tchi. Doleske well koles, kai len kras, kek dji lenge, un hi lenge gar latcho.

Jesaja 3:10

I bacht well ap kolende, kai an o tchatchepen tardo hi! Un lauter djal lenge mishto. Ko latcho koowa, hoi le kran, well ap lende pale.

Jesaja 44:4

Un jon wenn baro har o senlepen pash o pani, un har i ruka pash i panjengre rigja.

Jesaja 58:11

Un hako tsireske sikrell tut o baro Dewel tiro drom. Ninna te djiweh an o mulo tato them, dell lo tut doha djipaske, un dell tut newi soor. Palle hal tu har i baar, kolat hako tsiro doha pani hi, awa, har i pani, hoi dran i phub pre djal, un koleskro pani hako tsiro nashell.

Jeremia 17:8

Kowa hi har i ruk, kai pash o pani tardo hi, un tchiwell peskre draba an o pani. Ninna te well o baro tatepen, hi les kek traash. Leskre patria atchenn senelo. Te well i bersh, kai dell kek brishin, hunte well les kek daar. Job mukell gar tele, te hidjrell lo rukengre.

Ezekiel 17:8

ninna te his job an latchi phub dren tchiddo, un his tardo pash bud pani. Un lestar nai djans bud kashta win, un nai djans bud drake ap leste pre, jaake te wals lo i shukar drakengro ruk.

Ezekiel 19:10

Tiri dai his har i drakengro ruk, hoi was pash o pani an i phub tchiddo. Un har les jaake bud pani his, hidjras lo bud drake, un bud senele kashta his ap leste.

Ezekiel 31:5

Doleske was lo bareder har kol wawar ruka an o weesh. Un les wan bud lengste senele kashta. Jaake was ko ruk buchlo dran ko bud pani.

Ezekiel 47:12

Ap kol dui rigja o lengsto panjestar hi ruka tardo. Kolla hi o tselo bersh senelo, un hidjrenn hako tsiro rukengre. Hako tchon wenn newe rukengre bares. Ko lengsto pani, kolestar jon pani lenn, well win dran o Debleskro kheer. Lengre rukengre hi o chapaske. Un lengre patria krenn i nasselen sasto.

4. Mose 24:6

Har i telstuno them, hoi well buchlo, har i baar pash o pani, har kol sorele ruka, hoi o baro Dewel an i phub tchiwas, har kol zedertikre ruka, hoi pash o pani tardo hi.

Mateo 13:6

Un har o kham djas pre, was ko djob, kai gar dur an i phub his, chatchedo un meras tele.

Mateo 21:19

Un har job i faigetikro ruk dikas, djas lo kote un hatsas tchi har i patria kokres ap leste. Koi penas lo ap ko ruk: “Kek tsireske wenna pale faige ap tute!” Un ap jek kopo meras kau ruk tele.

Mateo 21:34

Har ko tsiro was, te anenn le i drake dren, bitchras lo peskre budepangren pash i hachende, te lenn le lendar kol drake, hoi leske hi.

Mateo 21:41

Penan le ap o Jesuseste: “Job marell kol tchilatche murshen. Les khaitenn jon gar. Un job dell ko kotar them kol wawarende, kai leske i drake an o tchatcho tsiro dren anenna.”

Johanni 15:6

Koon atchell gar an mande, kowa well win witsedo, har kol kashta, kai tele tchinlo hi. Jon wenn khetne rodedo un an i jag tchiddo, te chatchrenn le.

5. Mose 28:8

Tumaro baro Dewel bitchrell tumenge peskri bacht ap tumaro djob, te well tumen bud kolestar an tumare djobengre khera, un ap halauter, hoi tumer krenna. Un job dell tumen peskri bacht an ko them, hoi lo tumende dell.

Judas 1:12

Kol menshenge hunte ladjenn tumen. Te wenn tumer khetne, te pijenn un te chan, palle chan jon pen thulles pash tumende un ladjenn pen gar. Jon dikenn ap pende kokres, te djal lenge kokres mishto. Jon krenn bare laba, hoi tchi moldo hi. Jon hi har ruka, ap kolende tchi baro wella, witar kek patria, un kai hi tseles mulo un wenn tele dino.

Debleskro tsiro 22:2

O pani nashell mashkral o baro drom. Ap haki rig o panjestar hi kol ruka tardo, kai denna o djipen. Ap lende wenna deesh-te-dui kope an i bersh rukengro chapen baro, hako tchon jek kopo. Un i patria kol rukendar krenn i menshen an i tsele themma sasto.