Čačepangre 8:10 - O Debleskro Drom 2021 (Sinte)

¹⁰ Un o Sebach un o Zalmunna his an o them Karkor. Un 15.000 (deesh-te-pantch-serja) lurde his pash lende, lauter kolla, kai pral atchan kol tsele lurdendar, kai dran o them wan, kai o kham pre djal. Kol wawar mursha, kai nai kuran pen o chareha, wan temerl dino. Kolla his 120.000 (sheel-te-biish-serja) mursha.

O Debleskro Lab 2024 (Sinte-Manouche)

¹⁰ Oun o Zeba oun o Zalmunna his an o them Karkor. Oun 15.000 (deesh-te-panč-zerya) lourde his pash lende, lauter kolla, kay pral ačan kol tsele lourdendar, kay dran o them van, kay o kham pre djal. Kol vavar morsha, kay nay kouran pen o rhareha, van temerl dino. Kolla his 120.000 (sheel-te-biish-zerya) morsha.

Čačepangre 8:10 ပူးပေါင်းရင်းမြစ်များ

2. Rajengro liil 3:26

Har ko baro rai pral kol Moabarja dikas, kai nashrell lo o kurepen, las job 700 (efta-sheel) lurden peha, kai kurenn pen nai o chareha, un kamas lentsa te nashell kote, kai o baro rai pral Edom peskre lurdentsa tardo hi. Kowa djas lenge gar.

2. Familjakro liil 13:17

Jaake was, kai o Abija un leskre lurde kol wawaren soreles dan. Lendar atchan 500.000 (pantch-sheel-serja) wi-rodede lurde mules tchiddo.

2. Familjakro liil 28:6

O Israelengro baro rai – leskro lab his Pekach, leskro dad his o Remalja – job peskre lurdentsa maras ap jek diwes 120.000 (sheel-te-biish-serja) kurepangre an o them Juda. Kowa his i phagi doleske, kai mukan jon o baro Debles, ko Dewel lengre phurendar.

2. Familjakro liil 28:8

Un kol lurde dran o them Israel lan pengre phralendar dran o them Juda 200.000 (dui-sheel-serja) djuwja, tchawe un tcha pandles pentsa. Koi pashel lan le bud kutch koowa lendar, un anan len an o foro Samaria.

Jesaja 37:36

Un an koi rati was o baro Debleskro bolepaskro kote, kai i lurde dran o them Assur sowan, un maras 185.000 (sheel-ochta-deesh-te pantch serja) mursha lendar. Un har le taissarlakro pre stan, his kote lauter mule tchiddo.

Jesaja 9:4

I lurdengre kircha, kolentsa i lurde phares pre stakran un lengre baja, kai rat ap lende hi, wenn an i jag witsedo un chatchrenn pre.

Čačepangre 20:15

Un jaake wan ap ko diwes 26.000 (biish-te-shob-serja) Benjaminarja khetne, kai nai kurenn o chareha. Koi pashel wan i mursha dran o foro Gibea. Kolla his 700 (efta-sheel) tchatche kurepangre.

Čačepangre 20:17

Un i mursha dran Israel his 400.000 (star-sheel serja) lurde, kai nai kurenn o chareha, lauter tchatche kurepangre. I Benjaminarja his koi gar pashel.

Čačepangre 20:2

400.000 (star-sheel serja) mursha dran kol deesh-te-dui bare familje, kai wenn o Jakobeskre tchawendar, wan khetne un kran i tsillo o Debleskre menshendar. Kolla lauter his lurde, kai nai kurenn pen i chareha.

Čačepangre 20:25

djan kolla ninna ko diwes pale dran o foro Gibea win un dan 18.000 (deesh-te-ochta-serja) murshen dran Israel mulo. Un kolla his lauter mursha, kai nai kuran o chareha.

Čačepangre 20:35

Un o baro Dewel was i murshenge dran Israel ap i rig, jaake te maran le kau diwes 25.100 (biish-te-pantch-serja-jek-sheel) Benjaminarjen.

Čačepangre 20:46

Un jaake meran ap ko diwes 25.000 (biish-te-pantch-serja) Benjaminarja, kai nai kuran i chareha, lauter tchatche kurepangre.

Čačepangre 7:12

Un i Midianarja un i Amalekarja un lauter, kai wan kotar, kai o kham pre djal, his kote tchiddo an o telstuno them un tchakran o them har i stepangre. Jaake bud his le. Un lengre khamele his jaake bud, te djinas kek, har bud jon hi. Kolla his jaake bud har i santa pash o baro pani.

Čačepangre 7:13

Un har o Gideon koi tele was, penas jek mursh peskro maleske peskri suni. Un job penas: “Shun, man his i suni: I maro dran djob peras i berga tele pash i platsa, kai i Midianarja hi. Un o maro was pash o plachteno kheer, un das les trujel, jaake te peras lo khetne. Un o pralstuno kotar was tella, un o telstuno kotar was pral.”

Čačepangre 7:22

Un har kol triin sheel mursha an pengre phurdepangre phurdan, kras o baro Dewel, te kuras pes ap i platsa hakeno hakeneha. Un jon lauter nashan bis pash o foro Bet-Shitta ap o drom pash o foro Zereda, un ninna bis pash o foro Abel-Mehola pash o foro Tabbat.

Čačepangre 8:11

Un o Gideon djas ko drom, kai kolla djan, kai an plachtene khera djiwenn. Ko drom djal pash i forja Nobach un Jogboha, ap koi rig, kai o kham pre djala. Un job peras pral i lurdende dran Midian kote, kai jon beshde hi, an ko tsiro, kai daran le gar, te merenn le.