Čačepangre 7:13 - O Debleskro Drom 2021 (Sinte)

¹³ Un har o Gideon koi tele was, penas jek mursh peskro maleske peskri suni. Un job penas: “Shun, man his i suni: I maro dran djob peras i berga tele pash i platsa, kai i Midianarja hi. Un o maro was pash o plachteno kheer, un das les trujel, jaake te peras lo khetne. Un o pralstuno kotar was tella, un o telstuno kotar was pral.”

O Debleskro Lab 2024 (Sinte-Manouche)

¹³ Oun har o Gideon koy tele vas, penas yek morsh peskro maleske peskri souni. Oun yob penas: “Shoun, man his i souni: I maro dran djob peras i berga tele pash i platsa, kay i Midianarya hi. Oun o maro vas pash o plarhteno kheer, oun das les trouyel, yaake te peras lo khetne. Oun o pralstouno kotar vas tella, oun o telstouno kotar vas pral.”

Čačepangre 7:13 ပူးပေါင်းရင်းမြစ်များ

1. Korintarja 1:27

O Dewel rodas kolen win, kai an i menshengre jaka gar gosewo hi, te dikenn i gosewe menshe, kai lengro goswepen tchi molella. Job rodas kolen win, kai hi len kek soor an i menshengre jaka, te dikenn i sorele, kai lengri soor tchi molella.

Čačepangre 3:15

Koi dan le ap o baro Debleste gole, te lell job len dran koleskre wasta win. Un o baro Dewel mukas i murshes pre te stell, kai lenge ap i rig was. Un kowa his o Ehud, leskro dad his o Gera, i Benjaminari. O Ehud his i mursh, kai i serwo wasteskro hi. Un i Israelitarja bitchran les, te anell job lengre lowe o baro rajeske pral o them Moab, kol lowe, hoi jon hunte leske dan.

Čačepangre 3:31

Un pal leste was o Shamgar o tchatchepaskro mursh. Koleskro dad his o Anat. Un o Shamgar das 600 (shob-sheel) Filistarjen mulo sawo kashteha, koleha jek i grumjen tradell. Un ninna job las i Israelitarjen win dran o wast kolendar, kai lenge o djipen phares kran.

Čačepangre 4:21

O Sisera his khino un sowas sik dren. Un i Jael, o Hebereskri romni, las i sasterno depaskro un i tikno saster, koleha o plachteno kheer an i phub pandlo well, un djas tchorchanes pale pale pash leste dren un das leske ko tikno saster an leskro shero jaake dur, te djas lo ap i wawar rig pale win, un an i phub dren. Jaake meras o Sisera kote.

Čačepangre 4:9

“Mishto”, penas li. “Me djau tuha. Ko jek djin, palle sharenn le gar tut an kau kurepen. O baro Dewel dell o Sisera an o wast i djuwjatar.” Un i Debora stas pre, un djas leha an o foro Kedesh.

Čačepangre 6:15

Job penas ap leste: “Mangau tut miro rai: Har lap me nai o Israel dran o Midianeskro wast win? Miri familja hi i tikneder an o tselo kheer Manasse. Un me hom o tikneder an miro dadeskro kheer.”

Čačepangre 7:12

Un i Midianarja un i Amalekarja un lauter, kai wan kotar, kai o kham pre djal, his kote tchiddo an o telstuno them un tchakran o them har i stepangre. Jaake bud his le. Un lengre khamele his jaake bud, te djinas kek, har bud jon hi. Kolla his jaake bud har i santa pash o baro pani.

Čačepangre 7:14

Un leskro maal penas: “Kawa hi tchi wawar har o charo o Gideonestar, koleskro dad o Israelitari Joash hi. Koles das o Dewel i tsele Midianarja pengre tsele lurdentsa an leskro wast.”

Čačepangre 8:10

Un o Sebach un o Zalmunna his an o them Karkor. Un 15.000 (deesh-te-pantch-serja) lurde his pash lende, lauter kolla, kai pral atchan kol tsele lurdendar, kai dran o them wan, kai o kham pre djal. Kol wawar mursha, kai nai kuran pen o chareha, wan temerl dino. Kolla his 120.000 (sheel-te-biish-serja) mursha.