Bičepangre 18:27 - O Debleskro Drom 2021 (Sinte)

²⁷ Palle kamas o Apollo an o them Achaja te djal. Un i patsle an o foro Efesus dan les i liil peha. An ko liil mangan le i phralendar an o them Achaja, te lenn jon o phrales Apollo pash pende pre. Un har job kote was, djas lo pash kolende, kai patslo wan dran o Debleskro latchepen, un sikras len o Debleskro drom feteder un budeder.

O Debleskro Lab 2024 (Sinte-Manouche)

²⁷ Palle kamas o Apollo an o them Akaya te djal. Oun i patsle an o foro Efesus dan les i liil peha. An ko liil mangan le i phralendar an o them Akaya, te lenn yon o phrales Apollo pash pende pre. Oun har yob kote vas, djas lo pash kolende, kay patslo van dran o Debleskro lačepen, oun sikras len o Debleskro drom feteder oun boudeder.

Bičepangre 18:27 ပူးပေါင်းရင်းမြစ်များ

Bičepangre 1:15

An kolla diwessa wan bud patsle khetne, sheel-te-biish menshe. Mashkral lende stas o Petro pre un penas:

Bičepangre 11:26

Har o Barnabas les hatsas, anas lo les an o foro Antiochia. Un kol dui atchan i tselo bersh kote pash i patslende, un penan bud menshenge o Debleskro lab. Kote dan jon i patslen ko lab Kriste.

Bičepangre 18:12

An ko tsiro, har his o Gallio o pralstuno un tchatchepaskro rai pral o them Achaja, tchiwan pen kol bibolde khetne, un anan o Paules glan leste,

Bičepangre 18:18

O Paulo atchas i tsiro an o foro Korint. Koi pal penas lo i patslenge: “Atchenn o Debleha!” Un job uleras ap o shiffo pral o baro pani an o them Syria. I Priska un o Akwila his pash leste. Glan kowa, har jon an o foro Kenchrea ap o shiffo djan, das pes o Paulo sowel un mukas peskre balla tele te tchinell.

Bičepangre 19:1

Har o Apollo an o foro Korint his, djas o Paulo an i themma Galatia un Frigia, un palle was lo an o foro Efesus. Koi hatsas job ninna patslen.

Bičepangre 9:27

O Barnabas las les pash peste un anas les pash kol Jesuseskre bitchepangre, un penas lenge, har o Saulo ap ko drom, kai djal an o foro Damaskus, o rai Jesuses dikas, un kowa leha rakras, un har job an o foro Damaskus i menshenge o Jesusestar penas, un les kek daar his, te rakrell lo lestar.

Remarja 1:5

Job das man koi Debleskri budi te djap pash i menshende an i tsele themma. Job bitchras man, te penap lenge, te patsenn le ap leste un shunenn ap leste.

1. Korintarja 15:10

O Dewel kamas an peskro baro latchepen, te wap me kowa, hoi me kanna hom. Un leskro baro latchepen, hoi job man das, his gar tchitcheske. Me budrom budeder har kol tsele wawar. Gar me kokres, o Debleskro latchepen an mande budras mantsa, te krap nai koi budi.

1. Korintarja 16:3

Te wom pash tumende, rodenn tumenge murshen win, kai hi mishto an tumare jaka. Un me bitchrau len kol lowentsa an o foro Jerusalem, un dau len lila peha, hoi dren tchinlo hi, koneske kol lowe hi un konestar.

1. Korintarja 3:6

Me hom har i hacho, kai witsras o djob an i phub. O Apollo hi har jek, kai tchoras o pani pre. Un o Dewel mukas o djob bares te well.

2. Korintarja 1:24

Mer kamah te kras tumen bachtelo, un rodah gar koi pal, te was raja pral tumaro patsepen. Na-a, mer djinah: Tumer han soreles an o patsepen tardo.

Filiparja 1:25

Doleske hi miro dji sorelo, un me djinau, te atchap djido, un wau pale pash tumende. Te hom pale pash tumende, wenn tumer soreles un bachteles an o patsepen, un parkrenn tumen pash o Jesus Kristeste, un sharenn les bud un budeder.

Filiparja 1:29

O Dewel hi tumenge latcho, un das tumen o patsepen ap o Jesus Kristeste, un gar o patsepen kokres. Na-a, dran o patsepen ap leste, hunte lenn tumer ninna duka ap tumende.

Kolossarja 2:12

Har wan tumer taufedo, was tumaro phuro djipen paskedo. Un jaake wan tumer o Jesus Kristeha paskedo. Har tumer ap leste patsan, kras o Dewel tumen djido, jaake har job o Jesus Kristes i mulendar djido kras.

Kolossarja 4:10

O Aristarcho, kai mantsa an o stilepen hi, penell tumenge “Atchenn o Debleha!” Ninna o Marko un ko Josua, kai ninna Justo kharella, penenn tumenge “Atchenn o Debleha!” O Marko hi o kakeskro tchawo o Barnabestar. Te well lo pash tumende, lenn les kamles pre, har penom tumenge glan i tsiro! Kolla triin mursha hi bibolde, kai ap o Jesus Kristeste patsenna. I tsele biboldendar, kai kate hi, krenna kol triin kokres mantsa khetne o Debleskri budi. Jon dan man soor an miro dji.