Amos 8:11 - O Debleskro Drom 2021 (Sinte)

¹¹ I tsiro wella, penell o baro Dewel, maro rai, koi bitchrau i bok an o them. Kaja hi kek bok pal maro un kek trush pal pani. Na-a, kaja hi i bok pal o lab o baro Deblestar, te shunenn le les.

O Debleskro Lab 2024 (Sinte-Manouche)

¹¹ I tsiro vella, penell o baro Devel, maro ray, koy bičrau i bok an o them. Kaya hi kek bok pal maro oun kek troush pal pani. Na-a, kaya hi i bok pal o lab o baro Deblestar, te shounenn le les.

Amos 8:11 ပူးပေါင်းရင်းမြစ်များ

2. Familjakro liil 15:3

Bud bersha prindjran i Israelitarja o tchatcho Debles gar. Len his kek rashai, kai sikras lende o Debleskro drom, un kek Debleskro lab, hoi penas lenge, har te djiwenn le.

Debleskri gili 74:9

Kek sikepen hi buder kai, hoi men sikrell, te hal tu pash mende. Kek Debleskro rakepaskro hi buder kai. Un kek djinella, har rah kowa jaake atchell.

Gosewe laba 29:18

Te hi kek Debleskro rakepen koi, palle wenn i menshe diwjo un bi-pandlo. Bachtelo hi kowa, kai shunell ap o Debleskre laba.

Jesaja 5:6

Un me mukau ko them tchiddo, har lo hi. I ruka wenn gar pale tchinlo, un i phub gar trujel witsedo. Palle wenna subjengre burra un subjengro senlepen bares koi pre. Un me penau o brishineske, te perell lo gar koi tele.

Ezekiel 7:26

Bibacht pal bibacht well. Pale te pale shunenn le, hawo djungelo koowa was. Tchitcheske djan le pash o Debleskre rakepangre, un putchenn lendar, hoi o baro Dewel sikras len. Witar gar i rashaja nai penenn lenge, hoi te krenn le. Un i phureder djinenn kek drom win dran o merepen.

Hosea 2:3

Penenn tumare phralenge, te hi le mire menshe, un ap tumare phenja, te krau me miro dji lenge pre.

Micha 3:6

Doleske well pral tumende kali rati. Tumer dikenn buder kek dikepen. Kek lab o Deblestar well tumen. O kham djal tele tumenge, un o diwes hi tumenge har i rati.

Mateo 9:36

Un har job kol bud menshen dikas, khaitan le les. Jon his leske har bakre, kai hi len kek bakrengro, kai ap lende garda della. Jon his khino, un len his buder kek soor an lende.

1. Samuel 28:15

Un o Samuel putchas o Saulestar: “Hoske lal tu man dran miro sopen win, un mukal man pre te well?” Un o Saul penas: “Me hom an bari daar! I Filistarja djan an o kurepen te marenn le pen mantsa. Un o baro Dewel djas peske mandar, un rakrell gar buder ap mande. Leskre rakepangren hi kek lab mange, witar gar rakrell lo mantsa an sunja. Kote mukom me tut pale gole te dell, te peness mange, hoi me hunte krap!”

1. Samuel 28:6

Un o Saul putchas o baro Debles, hoi te krell lo. Un kowa penas leske tchi, das les kek suni, rakras gar leha kol tikne barrentsa, hoi witsedo wan, te sikrenn le, hoi kerdo hunte wella. Witar gar nai penas leske i Debleskro rakepaskro, hoi te krell lo.

1. Samuel 3:1

An ko tsiro, har budras o terno Samuel o baro Debleske tel o rashajeste, o Eli, rakras o baro Dewel gar bud kope ap jekeste. His witar gar bud kope, kai dikas jek i Debleskro dikepen.