Amos 5:16 - O Debleskro Drom 2021 (Sinte)

¹⁶ Un pral tumari doosh penell o baro Dewel, ko rai pral o bolepen un i phub: Ap i tsele platse wenn ropaskre gilja shunlo, un ap i tsele dromma denn le gole: Hawi grecha, hawi grecha! Ninna i hache wenn dren gole dino, te rowenn le pral kolende, kai meran. Un lauter, kai ropaskre gilja haiwenn, wenn kharedo, te giwenn le ropaskre gilja!

O Debleskro Lab 2024 (Sinte-Manouche)

¹⁶ Oun pral t'mari doosh penell o baro Devel, ko ray pral o bolepen oun i phoub: Ap i tsele platse venn ropaskre gilya shounlo, oun ap i tsele dromma denn le gole: Havi grerha, havi grerha! Ninna i harhe venn dren gole dino, te rovenn le pral kolende, kay meran. Oun lauter, kay ropaskre gilya hayvenn, venn kharedo, te givenn le ropaskre gilya!

Amos 5:16 ပူးပေါင်းရင်းမြစ်များ

2. Familjakro liil 35:25

Un o Jeremia giwas i ropaskri gili pral o Josia. Un i tsele gipangre, mursha har djuwja, giwan ropangre gilja pral o Josia bis ap kau diwes. Jaake well kowa gomme kau diwes kerdo an Israel. Kal tsele gilja hi tele tchinlo an o liil, hoi kharell: Ropangre gilja.

Jesaja 15:8

Trul o tselo them Moab trujel well ko ropen shunlo, un djal bis Eglajim un Beer-Elim.

Jesaja 22:12

Un ap ko diwes das o baro Dewel, ko rai pral o bolepen un i phub gole: “Rowenn un denn gole, tchinenn tumenge i balla tele, un riwenn tumen an ripja dran gone, te sikrenn, kai khaitell tumen tumari doosh!”

Jeremia 30:5

Job penas: Mer shunah i gole i trashatar; kokres i daar hi koi un kek latchepen.

Jeremia 4:31

Me shunau i gole, har i djuwjatar, kai lell o ersto kopo i ternepen. Kaja hi koi gole o forestar Zion, kai taprell pal ducho, un peskre wasta pre hadell, un gole dell: Me hom nashedo! Kolla wenna un denn man mulo!

Jeremia 9:10

O baro Dewel penell: Me kamau Jerusalem tele te phagell, jaake te atchenn kokres barra pral, un kai diwje djukle dren djiwenna. Un dran kol forja an Juda krau i mulo them, kai nai djiwell kek buder dren.

Jeremia 9:16

O baro Dewel, ko rai pral o bolepen un i phub, penell: Denn garda ap kowa, hoi wella! Denn kol djuwjen gole, kai i baro ropen krenna! Bitchrenn pal kolende, kai haiwenn ropaskre gilja te giwenn!

Hosea 4:3

Doleske trushell o them, un i menshe merenn; ninna i diwje vieche, i tchirkle un i matche hunte merenn.

Joel 1:11

I hachenge hi ropaske. Dell kek gib, un dell kek djob. Lauter hi nashedo.

Joel 1:14

Denn i menshen khetne gole! Penenn, te chan le tchi, te sikrenn le, kai lengri doosh len khaitell. Mukenn i phureden un i tsele menshen an kau them pash o baro Debleskro kheer te well! Job hi tumaro Dewel. Denn ap leste gole!

Joel 1:15

Hawo bibachtelo tsiro! O diwes, kai o baro Debleskri choli well, hi buder gar dur. Ap ko diwes anell o sorelo Dewel bari bibacht pral mende.

Joel 1:8

Rob har i terni tchai, kai nashras lakro pirno, un riwell pes an i gono.

Amos 3:13

O baro Dewel, ko rai pral o bolepen un i phub, penell: Shunenn kal laba, un penenn i menshenge dran o Jakobeskro kheer: Kowa hi tchatcho:

Amos 5:27

an ko tsiro, kai anau tumen pandles an i them, hoi hi tchiddo pal o foro Damaskus. Me, o baro Dewel, ko rai pral o bolepen un i phub, penau kowa.

Amos 8:10

Tumare bare diwessa, kai hans bachtelo, wenn kanna diwessa, kai denn gole i bibachtjatar. Un tumare gilja wenna ropangre gilja. Tumer riwenn tumen an gone, un tchinenn tumare tsele balla ap o shero tele. Un han jaake har i dad un i dai, kai pral pengro tchaweste rowenn, kai meras, un len hi kek wawar tchawe. Un lauter, hoi djal an ko diwes, krell i menshenge bari daar.

Amos 8:3

An ko diwes giwenn i gipangre an o rajeskro kheer ropaskre gilja. An i tsele gaba un forja hi mule menshe tchiddo. Kolen witsran le pokones koi. Kowa penau me, o baro Dewel.

Micha 1:8

Pral kowa halauter hunte dap i bari gole un hunte rowap, me nashau pirkenes un nanges, te sikrap har miro dji rowella. Har i diwjo djuklo dau gole, un rowau har ko tchirklo, hoi kharell straussa.

Micha 2:4

An ko tsiro giwenn le i sapaskri gili pral tumende, un krenn tumen palla, har tumer rowenn: “Halauter hi nashedo. Mer ham khetne maredo! Maro them las o Dewel mendar, un das les kolende, kai lan men pandlo.”

Debleskro tsiro 18:10

Dur glan o foro hi le tardo i darjatar, te well koi bibacht ninna ap lende, un jon penenna: “Dikenn! Hawi bibacht! Hawi bibacht! O baro foro Babilon, o sorelo foro! Leskri phagi was an jek tikno tsiro pral leste.”

Debleskro tsiro 18:19

Un jon lan tchik, un tchiwan les ap pengre shere un rowan, un dan lengre wasta pral o shero khetne, dan gole, un penan: “Hawi bibacht! Hawi bibacht! Dikenn, o baro foro! Leskro brawlepen kras lauter kolen brawelo, kai hi len shiffe ap o baro pani! Un an jek tikno tsiro peras ko foro khetne.”