5. Mose 7:10 - O Debleskro Drom 2021 (Sinte)

¹⁰ Un kolen, kai kamenn lestar tchi te djinell, dell lo i phagi, un marell len sik. Kek tsiro mukell lo pes, te anell lo lenge lengro tchilatchepen pale ap lengre sherja.

O Debleskro Lab 2024 (Sinte-Manouche)

¹⁰ Oun kolen, kay kamenn lestar či te djinell, dell lo i phagi, oun marell len sik. Kek tsiro moukell lo pes, te anell lo lenge lengro čilačepen pale ap lengre sherya.

5. Mose 7:10 ပူးပေါင်းရင်းမြစ်များ

2. Mose 20:5

Tu witsress tut gar glan i wawar debleste tele, un mangess les gar an. Me, o baro Dewel, hom tiro Dewel, un kamau, te kamess man kokres. Kolen, kai kamenn mandar tchi te djinell un anenn doosh ap pende, dau me i phagi. Me dau ninna i phagi lengre tchawende un kolengre tchawende jaake rah har triin-te-star familje jek pal i wawar djiwenn.

2. Mose 34:7

Me sikrau miro latchepen ap lengre tchawende un kolengre tchawende un kolengre tchawende un serja kope jaake dureder. Un bistrau lengri doosh un lau lengro tchilatchepen krik. Koles, kai kamell mandar tchi te djinell, dau i phagi, un gar koles kokres, na-a ninna leskre tchawen un kolengre tchawen jaake rah har triin, star familje, jek pal i wawar, djiwan.”

Gosewe laba 11:31

Djiness, i latcho mensheske ap kai phub well o latchepen pale dino, hoi lo kras. Har bud budeder well palle o tchilatchepen pale dino kolenge, kai o tchilatchepen kran un o Debleskro drom mukan.

Jesaja 59:18

Kolen dell lo pale pal kowa, hoi jon kran. Bari choljah djal lo ap lende. Ninna kolen dell job pengri phagi, kai djiwenn dur krik wergel o baro pani.

Jeremia 32:18

Tu mukeh latchepen pral bud serja menshende te well. Un i doosh i dadendar mukeh ap i sherja lengre tchawendar te well. Tu hal o baro un sorelo Dewel. Tiro lab hi: Baro Dewel, ko rai pral o bolepen un i phub.

Nahum 1:2

O baro Dewel hi i Dewel, kai kamell, te mangenn i menshe kek wawar debles an har les kokres. Leskri choli well pral kolende, kai hadenn pen pral leste. Kolen, kai kamenn lestar tchi te djinell, dell job i phagi. Un bistrell gar, hoi jon ap leste kran.

4. Mose 10:35

Un har djas ko sonakaskro mochton dureder, penas o Mose: “Baro Dewel, ste pre, un trade kolen krik, kai kamenn tuke tchilatchepen! Kre, te nashenn le halauter penge tutar!”

4. Mose 14:18

Tu penal: ‘Me, o baro Dewel, wau gar sik chojedo, un man hi i latcho un baro dji, un me bistrau ko tchilatcho koowa, hoi kran un lau i doosh krik. Koles kokres, kai kamell mandar tchi te djinell, dau i phagi, un gar koles kokres, na-a ninna leskre tchawen un kolengre tchawen jaake rah har triin, star familje, jek pal i wawar djiwan.’

Remarja 12:19

Mire kamle phrala un phenja, ninna te kras jek tumenge tchilatcho koowa, ma denn leske pale! Mukenn les! O Dewel dell les i phagi. An o Debleskro lab hi tchinlo: O Dewel penas: Me dau len pale. Me dau len i phagi.

5. Mose 32:25

Ap i dromma marell len o charo, un an i khera i traash. Hakenes taprell o merepen: o terno murshes un i terni tchat, o ternepen un kolen parne ballentsa.

5. Mose 32:35

Job penell: Me hom kowa, kai dau len halauter ap lengro shero pale an ko tsiro, kai trissenn lengre herja. Gar dur hi o diwes, kai well lengri bibacht pral lende. Un kowa, hoi ap lende well, kowa well sikepah.

5. Mose 32:41

Me krau, te tchinell miro charo mishto, te well o tchatchepen kerdo. Un me dau o tchilatchepen ap kolengre sherja pale, kai kuran pen mantsa. Un miri choli well ap kolende, kai hi chojedo ap mande chojedo.

5. Mose 5:9

Tu witsress tut gar glan i wawar debleste tele, un mangess les gar an. Me, o baro Dewel, hom tiro Dewel, un kamau, te kamess man kokres. Kolen, kai kamenn mandar tchi te djinell un anenn doosh ap pende, dau me i phagi. Me dau ninna i phagi lengre tchawende un kolengre tchawende jaake rah har triin-te-star familje jek pal i wawar djiwenn.

5. Mose 7:11

Jaake rikrenn tumen hako tsiro ap leskre laba, krenn, hoi lo tumendar kamell, un djiwenn pal leskre tchatchepaskre laba, hoi kau diwes tumenge penau.

5. Mose 7:9

Djinenn: tumaro baro Dewel hi kokres o tchatcho Dewel. Job rikrell peskro lab, un hoi lo tumentsa win kras. Latchepen un kamlepen dell lo kolende, hoi les o djijestar kamenn un krenn, hoi lo penell. Ninna lengre tchawenge, kai pal lende wenna, hi lo latcho, jaake rah har seri familje jek pal i wawar djiwenn.