5. Mose 6:5 - O Debleskro Drom 2021 (Sinte)

⁵ Tu kamess les tiro tselo djijestar un tiro tselo djipah un tiri tseli sorjah.

O Debleskro Lab 2024 (Sinte-Manouche)

⁵ Tou kamess les tiro tselo djiyestar oun tiro tselo djipah oun tiri tseli zoryah.

5. Mose 6:5 ပူးပေါင်းရင်းမြစ်များ

1. Rajengro liil 3:3

O Salomo kamas o baro Debles o djijestar, un djiwas pal kol laba, hoi leskro dad, o David, leske penas. Jek koowa kras lo, hoi gar mishto his: Job maras ninna viechen i wawar deblenge un chatchras lenge sungepaskro koowa.

2. Rajengro liil 23:25

Kek baro rai his glan leste, kai was jaake har o Josia pash o baro Debleste peskro tselo djijeha un peskro tselo djipah un peskri tseli sorjah, un djiwas jaake har an o Moseskre lila tchinlo hi. Un pal leste his witar kek har job.

2. Familjakro liil 15:12

Un jon dan pengro lab, te rikrenn le pen ap kowa, hoi o baro Dewel lengre phurentsa win kras, te rodenn le les o tselo djijeha un i tseli sorjah.

2. Familjakro liil 34:31

Un o baro rai his ap peskri platsa tardo un das o baro Debleste peskro lab, te djan le ap o Debleskro drom, un rikrenn leskre laba, un djiwenn jaake, har job len sikras un pal leskro tchatchepen. Pengro tselo djijeha un pengri tseli sorjah kaman le pal kal laba te djiwenn, hoi o Dewel len das, un hoi an kau liil tchinlo hi.

Debleskri gili 119:2

Har bachtelo hi kolla, kai jaake djiwenn, har job lenge sikras, un pengro tselo djijestar ap leste shunenn.

Debleskri gili 31:24

Kamenn o baro Debles o tselo djijestar, tumer kai leskre han! Koon ap leste patsella, hi an leskro wast. Koon pes pre phurdell, ap koleste well leskri choli.

Mateo 10:37

Koon kamell peskro dades un peskri dai budeder har man, hi gar moldo, te well lo miro maal. Un koon kamell peskro tchawes un peskri tchat budeder har man, hi gar moldo, te well lo miro maal.

Mateo 22:37

Penas o Jesus ap leste: “Tu kamess tiro Debles o tselo djijestar an tiro tselo djipen, an lauter, hoi tu djineh.

Markus 12:30

Tu kamess tiro Debles o tselo djijestar an tiro tselo djipen, an lauter, hoi tu kreh un djineh.

Markus 12:33

Te kamah mer les o tselo djijeha, an lauter hoi krah un djinah, un te ham jaake latcho ap koleste, kai pash mende hi, har ham latcho ap mende kokres, palle hi kowa feteder, har i tsele bakre un grumja, hoi mer marah un chatchrah o Debleske.”

Louka 10:27

Penas ko mursh: “Tu hunte kamess tiro Debles o tselo djijestar, an tiro tselo djipen, tiri tseli sorjah, un an lauter, hoi tu djineh. Un ap i wawar mensheste hunte wess jaake latches, har hal latches ap tute kokres.”

5. Mose 10:12

Un kanna Israel, shun, hoi tiro baro Dewel kamell, te kress! Tu mangess les an, djas ap leskro drom an halauter hoi tu kreh. Tu kamess les o tselo djijestar, un wess leske koi tiri tseli sorjah.

5. Mose 11:1

O Mose penas dureder ap i Israelitarjen: Tumer hunte kamenn tumaro baro Debles o tselo djijestar! Krenn lauter, hoi lo tumendar kamell. Rikrenn tumen ap leskre tchatchepaskre laba, un djiwenn pal leskre laba jaake rah har djiwenn.

5. Mose 11:13

Jaake shunenn ap kol laba, hoi tumenge kau diwes penau, te kamenn tumaro baro Debles o tselo djijestar un wenn leske koi tumari tseli sorjah.

5. Mose 13:3

un penell ninna: “Mer djas wawar deblen palla, hoi tumer gar prindjrenn, un mangas len an”, palle shunenn gar ap saweste, ninna te well kowa tchatcho, hoi job penas. Tumaro baro Dewel kamell te dikell, te kamenn les tumare tsele djijentsa un tumari tseli sorjah.

5. Mose 30:10

Shunenn ap leste, djiwenn pal leskre laba, hoi an kau tchatchepaskro liil tchinlo hi, un krenn, hoi job tumendar kamell! Tumer hunte wenn pale pash leste tumaro tselo djijestar un tumari tseli sorjah.

5. Mose 30:16

Te krenn tumer, hoi me tumenge kau diwes penom, un kamenn tumaro baro Debles un djan ap leskre dromma, un djiwenn pal leskre laba un krenn, hoi job tumendar kamell un rikrenn tumen ap leskre tchatchepaskre laba, palle atchenn tumer djido. Un tumendar wenn bud menshe. Un tumaro baro Dewel tchiwell peskri bacht ap tumende an o them, kai dren djan, te lenn les tumenge dren.

5. Mose 30:20

Kamenn tumaro baro Debles! Shunenn ap leste, un rikrenn tumen ap leste! Kowa hi tumaro djipen. Un jaake nai djiwenn bud bersha an ko them, kolestar o baro Dewel pes sowel das glan tumare phurende, glan o Abraham, o Isaak un o Jakob, te dell lo les lende.

5. Mose 30:6

Tumaro baro Dewel dell tumen djia, hoi shunenn un krenn, hoi lo tumendar kamell. Tumen un kolen, kai tumendar wenna, dell lo sawe djia, jaake te kamenn tumer tumaro baro Debles o tselo djijestar un tumari tseli sorjah. Un tumer atchenn djido.

5. Mose 4:29

An kol themma rodenn tumer palle o baro Debles, kai tumaro Dewel hi. Te putchenn pal leste tumaro tselo djijeha un tumari tseli sorjah, hatsenn tumer les.

Josua 22:5

Un denn jak, te rikrenn o Debleskre laba un djan ap leskro drom, hoi sikras tumen o Mose, koles o baro Debleskro tchatcho wast his, har penas lo: Kamenn tumaro baro Debles o tselo djijestar. Djan ap leskre tsele dromma! Djiwenn pal leskre laba un mukenn les gar! Awenn leske koi o tselo djijestar un tumari tseli sorjah!”

1. Johanni 5:3

Maro kamlepen o Debleske sikrell pes, te krah mer kowa, hoi job menge penella. Un kowa, hoi job menge penella te kras, kowa hi gar pharo.