5. Mose 5:10 - O Debleskro Drom 2021 (Sinte)

¹⁰ Latchepen un kamlepen dau me ap kolende, hoi man o djijestar kamenn un krenn, hoi me penau. Ninna lengre tchawenge, kai pal lende wenna, hom latcho, jaake rah har serja familje jek pal i wawar djiwenn.

O Debleskro Lab 2024 (Sinte-Manouche)

¹⁰ Lačepen oun kamlepen dau me ap kolende, hoy man o djiyestar kamenn oun krenn, hoy me penau. Ninna lengre čavenge, kay pal lende venna, hom lačo, yaake rah har zerya familye yek pal i vavar djivenn.

5. Mose 5:10 ပူးပေါင်းရင်းမြစ်များ

Debleskri gili 103:17

O latchepen o baro Deblestar hi gar jaake. Kowa atchella hako tsireske. An kek tsiro lell lo les krik kolendar, kai djiwenn leha. Ninna lengre tchawenge un kolengre tchawenge rikrell job peskro lab,

2. Mose 20:5

Tu witsress tut gar glan i wawar debleste tele, un mangess les gar an. Me, o baro Dewel, hom tiro Dewel, un kamau, te kamess man kokres. Kolen, kai kamenn mandar tchi te djinell un anenn doosh ap pende, dau me i phagi. Me dau ninna i phagi lengre tchawende un kolengre tchawende jaake rah har triin-te-star familje jek pal i wawar djiwenn.

2. Mose 34:7

Me sikrau miro latchepen ap lengre tchawende un kolengre tchawende un kolengre tchawende un serja kope jaake dureder. Un bistrau lengri doosh un lau lengro tchilatchepen krik. Koles, kai kamell mandar tchi te djinell, dau i phagi, un gar koles kokres, na-a ninna leskre tchawen un kolengre tchawen jaake rah har triin, star familje, jek pal i wawar, djiwan.”

Jeremia 32:18

Tu mukeh latchepen pral bud serja menshende te well. Un i doosh i dadendar mukeh ap i sherja lengre tchawendar te well. Tu hal o baro un sorelo Dewel. Tiro lab hi: Baro Dewel, ko rai pral o bolepen un i phub.

Daniel 9:4

Un me rakrom ap miro baro Debleste un mangom man tele, un penom: Ach, miro rai, tu hal o baro Dewel un mer sharah tut. Tu rikreh tiro lab, hoi kolenge dal, kai kamenn tut o djijestar un rikrenn tire laba. Un hal lenge latches.

4. Mose 14:18

Tu penal: ‘Me, o baro Dewel, wau gar sik chojedo, un man hi i latcho un baro dji, un me bistrau ko tchilatcho koowa, hoi kran un lau i doosh krik. Koles kokres, kai kamell mandar tchi te djinell, dau i phagi, un gar koles kokres, na-a ninna leskre tchawen un kolengre tchawen jaake rah har triin, star familje, jek pal i wawar djiwan.’

Johanni 14:15

“Te kamenn tumer man o djijestar, krenn tumer, hoi me tumenge penom.

Johanni 15:14

Te krenn tumer, hoi me tumenge penom, han mire mala.

Remarja 8:28

Mer djinah, halauter well mishto kolenge, kai o Debles kamenna. Glan rah tsiro his o Debles an peskro dji, te dell lo menshen gole, te djiwenn le leha khetne.

Galatarja 5:6

O Jesus Kristeske molell tchi, te hi i mursh ap o mass tchinlo, witar gar, te hi lo gar tchinlo. Kowa, hoi hi budeder moldo har lauter, hi o patsepen. Ko patsepen dikah mer ap o kamlepen, kai jekes hi i wawareske.

5. Mose 4:40

Denn jak ap kowa, hoi job tumendar kamella, un djiwenn pal leskre laba, hoi tumenge kau diwes penau. Palle djal mishto tumenge un tumare tchawenge pal tumende, un tumer djiwenn i rah tsiro an kau them, hoi tumaro baro Dewel tumenge della, te atchell les tumenge hako tsireske.

5. Mose 7:12

Te shunenn tumer leskro tchatchepen, un rikrenn tumen ap leskre laba, un djiwenn pal lende, palle rikrell tumaro baro Dewel, hoi lo tumare phurentsa win kras, un peskro wast pre das, un well tumenge latches.

5. Mose 7:9

Djinenn: tumaro baro Dewel hi kokres o tchatcho Dewel. Job rikrell peskro lab, un hoi lo tumentsa win kras. Latchepen un kamlepen dell lo kolende, hoi les o djijestar kamenn un krenn, hoi lo penell. Ninna lengre tchawenge, kai pal lende wenna, hi lo latcho, jaake rah har seri familje jek pal i wawar djiwenn.

Jakobo 1:25

Koon dikell pale un pale an o Debleskro latcho lab, hoi i menshen win lella dran lengro phuro djipen, ko mensho bistrell gar, hoi job dikas un shunas. Un kowa krella, hoi ko lab penella. Koles dell o Dewel peskri bacht an lauter, hoi job krella.

Josua 22:5

Un denn jak, te rikrenn o Debleskre laba un djan ap leskro drom, hoi sikras tumen o Mose, koles o baro Debleskro tchatcho wast his, har penas lo: Kamenn tumaro baro Debles o tselo djijestar. Djan ap leskre tsele dromma! Djiwenn pal leskre laba un mukenn les gar! Awenn leske koi o tselo djijestar un tumari tseli sorjah!”

1. Johanni 1:7

Mer te djiwah khetne o Debleha an o tchatchepen, jaake har o Dewel an o tchatchepen tardo hi, palle nai ham mer ninna lauter khetne an o tchatchepen. Un o rat leskro tchawestar thowell mari tseli doosh mendar tele.